ಚತುರ್ದಶಃ ಪರಿಚ್ಛೇದಃ

ಐಕ್ಯಸ್ಯ ಚತುರ್ವಿಧಸ್ಥಲಪ್ರಸಂಗಃ

ಐಕ್ಯಸ್ಥಲಮ್

|| ಅಗಸ್ತ್ಯ ಉವಾಚ ||

ತಾಮಸ ತ್ಯಾಗ ಸಂಬಂಧಾತ್

ನಿರ್ದೆಶಾಚ್ಛೀಲ ತ ಸ್ತಥಾ |

ಶರಣಾಖ್ಯಸ್ಯ ಭೂಯೋಸ್ಯ

ಕಥಮೈಕ್ಯ ನಿರೂಪಣಮ್ || 14-1

||ಶ್ರೀ ರೇಣುಕ ಉವಾಚ ||

#ಪ್ರಾಣ ಲಿಂಗಾದಿ ಯೋಗೇನ

ಸುಖಾತಿಶಯ ಮೇಯಿವಾನ್ |

ಶರಣಾಖ್ಯಃ ಶಿವೇನೈಕ್ಯ-

ಭಾವನಾದೈಕ್ಯ ವಾನ್ ಭವೇತ್ || 14-2

ಐಕ್ಯ ಸ್ಥಲ ಮಿದಂ ಪ್ರೋಕ್ತಮ್

ಚತುರ್ಧಾ ಮುನಿ ಪುಂಗವ |

ಐಕ್ಯ ಮಾಚಾರ ಸಂಪತ್ತಿಃ

ಏಕ ಭಾಜನ ಮೇವ ಚ |

ಸಹಭೋಜನ ಮಿತ್ಯೇಷಾಮ್

ಕ್ರಮಾಲ್ಲಕ್ಷಣ ಮುಚ್ಯತೇ || 14-3

ಅಥ ಐಕ್ಯಸ್ಥಲಮ್

ವಿಷಯಾನಂದ ಕಣಿಕಾ-

ನಿಃಸ್ಪೃಹೋ ನಿರ್ಮಲಾಶಯಃ |

ಶಿವಾನಂದ ಮಹಾಸಿಂಧು-

ಮಜ್ಜನಾದೈಕ್ಯ ಮುಚ್ಯತೇ || 14-4

#ನಿರ್ಧೂತಮಲ ಸಂಬಂಧೋ

ನಿಷ್ಕಲಂಕ ಮನೋಗತಃ |

ಶಿವೋಹ ಮಿತಿ ಭಾವೇನ

ನಿರೂಢೋ ಹಿ ಶಿವೈಕ್ಯತಾಮ್ || 14-5

ಶಿವೇನೈಕ್ಯಂ ಸಮಾಪನ್ನಃ

ಚಿದಾನಂದ ಸ್ವರೂಪಿಣಾ |

ನ ಪಶ್ಯತಿ ಜಗಜ್ಜಾಲಮ್

ಮಾಯಾಕಲ್ಪಿತ ವೈಭವಮ್ || 14-6

#ಬ್ರಹ್ಮಾಂಡ ಬುದ್ಬುದೋದ್ಭೇದ-

ವಿಜೃಂಭೀ ತತ್ತ್ವವೀಚಿಮಾನ್ |

ಮಾಯಾ ಸಿಂಧುರ್ಲಯಂ ಯಾತಿ

ಶಿವೈಕ್ಯ ವಡ ವಾನಲೇ || 14-7

ಮಾಯಾ ಶಕ್ತಿ ತಿರೋಧಾನಾತ್

ಶಿವೇ ಭೇದ ವಿಕಲ್ಪನಾ |

ಆತ್ಮನಸ್ತ ದ್ವಿನಾಶೇ ತು

ನಾದ್ವೈತಾ ತ್ಕಿಂಚಿ ದಿಷ್ಯತೇ || 14-8

#ಪಶುತ್ವಂ ಚ ಪತಿತ್ವಂ ಚ

ಮಾಯಾ ಮೋಹ ವಿಕಲ್ಪಿತಮ್ |

ತಸ್ಮಿನ್ ಪ್ರಲಯ ಮಾಪನ್ನೇ

ಕಃ ಪಶುಃ ಕೋ ನು ವಾ ಪತಿಃ || 14-9

ಘೋರ ಸಂಸಾರ ಸರ್ಪಸ್ಯ

ಭೇದವಲ್ಮೀಕ ಶಾಯಿನಃ |

ಬಾಧಕಂ ಪರಮಾದ್ವೈತ-

ಭಾವನಾ ಪರಮೌಷಧಮ್ || 14-10

#ಭೇದಬುದ್ಧಿ ಸಮುತ್ಪನ್ನ-

ಮಹಾಸಂಸಾರ ಸಾಗರಮ್ |

ಅದ್ವೈತ ಬುದ್ಧಿ ಪೋತೇನ

ಸಮುತ್ತರತಿ ದೇಶಿಕಃ || 14-11

ಅಜ್ಞಾನ ತಿಮಿರೋದ್ರಿಕ್ತಾ

ಕಾಮರಕ್ಷಃಕ್ರಿಯಾಕರೀ |

ಸಂಸಾರ ಕಾಲ ರಾತ್ರಿಸ್ತು

ನಶ್ಯೇದದ್ವೈತ ಭಾನು ನಾ || 14-12

#ತಸ್ಮಾದದ್ವೈತ ಭಾವಸ್ಯ

ಸದೃಶೋ ನಾಸ್ತಿ ಯೋಗಿನಾಮ್ |

ಉಪಾಯೋ ಘೋರ ಸಂಸಾರ-

ಮಹಾತಾಪ ನಿವೃತ್ತಯೇ || 14-13

ಅದ್ವೈತ ಭಾವನಾ ಜಾತಮ್

ಕ್ಷಣಮಾತ್ರೇಪಿ ಯತ್ಸುಖಮ್ |

ತತ್ಸುಖಂ ಕೋಟಿ ವರ್ಷೆಣ

ಪ್ರಾಪ್ಯತೇ ನೈವ ಭೋಗಿಭಿಃ || 14-14

#ಚಿತ್ತವೃತ್ತಿ ಸಮಾಲೀನ-

ಜಗತಃ ಶಿವಯೋಗಿನಃ |

ಶಿವಾನಂದ ಪರಿಸ್ಫೂರ್ತಿಃ

ಮುಕ್ತಿರಿತ್ಯ ಭಿಧೀಯತೇ || 14-15

ಇತಿ ಐಕ್ಯಸ್ಥಲಂ

----------------

ಅಥ ಆಚಾರ ಸಂಪತ್ತಿ ಸ್ಥಲಮ್

ಶಿವೈಕ ಭಾವನಾಪನ್ನ-

ಶಿವತ್ವೋ ದೇಹ ವಾನಪಿ |

ದೇಶಿಕೋ ಹಿ ನ ಲಿಪ್ಯೇತ

ಸ್ವಾಚಾರೈಃ ಸೂತಕಾದಿಭಿಃ || 14-16

#ಶಿವಾದ್ವೈತ ಪರಿಜ್ಞಾನೇ

ಸ್ಥಿತೇ ಸತಿ ಮನಸ್ವಿನಾಮ್ |

ಕರ್ಮಣಾ ಕಿಂ ನು ಭಾವ್ಯಂ ಸ್ಯಾದ್

ಅಕೃತೇನ ಕೃತೇನ ವಾ || 14-17

ಶಂಭೋರೇಕತ್ವ ಭಾವೇನ

ಸರ್ವತ್ರ ಸಮದರ್ಶನಃ |

ಕುರ್ವನ್ನಪಿ ಮಹಾಕರ್ಮ

ನ ತತ್ಫಲ ಮವಾಪ್ನುಯಾತ್ || 14-18

#ಸುಕೃತೀ ದುಷ್ಕೃತೀ ವಾಪಿ

ಬ್ರಾಹ್ಮಣೋ ವಾಂತ್ಯಜೋಪಿ ವಾ |

ಶಿವೈಕಭಾವ ಯುಕ್ತಾನಾಮ್

ಸದೃಶೋ ಭವತಿ ಧ್ರುವಮ್ || 14-19

ವರ್ಣಾಶ್ರಮ ಸದಾಚಾರೈಃ

ಜ್ಞಾನಿನಾಂ ಕಿಂ ಪ್ರಯೋಜನಮ್ |

ಲೌಕಿಕಸ್ತು ಸದಾಚಾರಃ

ಪಲಾಭಾವೇಪಿ ಭಾವ್ಯತೇ || 14-20

#ನಿರ್ದಗ್ಧ ಕರ್ಮಬೀಜಸ್ಯ

ನಿರ್ಮಲಜ್ಞಾನ ವಹ್ನಿನಾ |

ದೇಹಿವದ್ ಭಾಸ ಮಾನಸ್ಯ

ದೇಹಯಾತ್ರಾ ತು ಲೌಕಿಕೀ || 14-21

ಶಿವಜ್ಞಾನ ಸಮಾಪನ್ನ-

ಸ್ಥಿರ ವೈರಾಗ್ಯ ಲಕ್ಷಣಃ |

ಸ್ವಕರ್ಮಣಾ ನ ಲಿಪ್ಯೇತ

ಪದ್ಮಪತ್ರ ಮಿವಾಂಭಸಾ || 14-22

#ಗಚ್ಛಂಸ್ತಿ ಷ್ಠನ್ ಸ್ವಪನ್ ವಾಪಿ

ಜಾಗ್ರನ್ ವಾಪಿ ಮಹಾಮತಿಃ |

ಶಿವಜ್ಞಾನ ಸಮಾ ಯೋಗಾತ್

ಶಿವ ಪೂಜಾ ಪರಃ ಸದಾ || 14-23

ಯದ್ಯತ್ಪಶ್ಯತಿ ಸಾಮೋದಮ್

ವಸ್ತು ಲೋಕೇಷು ದೇಶಿಕಃ |

ಶಿವ ದರ್ಶನ ಸಂಪತ್ತಿಃ

ತತ್ರ ತತ್ರ ಮಹಾತ್ಮನಃ || 14-24

#ಯದ್ಯ ಚ್ಚಿಂತ ಯತೇ ಯೋಗೀ

ಮನಸಾ ಶುದ್ಧ ಭಾವನಃ |

ತತ್ತ ಚ್ಛಿವ ಮಯತ್ವೇನ

ಶಿವ ಧ್ಯಾನ ಮುದಾಹೃತಮ್ || 14-25

ಯತ್ಕಿಂಚಿದ್ ಭಾಷಿತಂ ಲೋಕೇ

ಸ್ವೇಚ್ಛಯಾ ಶಿವ ಯೋಗಿನಾ |

ಶಿವ ಸ್ತೋತ್ರ ಮಿದಂ ಸರ್ವಮ್

ಯಸ್ಮಾತ್ ಸರ್ವಾತ್ಮಕಃ ಶಿವಃ || 14-26

#ಯಾ ಯಾ ಚೇಷ್ಟಾ ಸಮುತ್ಪನ್ನಾ

ಜಾಯತೇ ಶಿವ ಯೋಗಿನಾಮ್ |

ಸಾ ಸಾ ಪೂಜಾ ಮಹೇಶಸ್ಯ

ಸರ್ವದಾ ತದ್ಗತಾತ್ಮನಾಮ್ || 14-27

ಇತಿ ಆಚಾರ ಸಂಪತ್ತಿ ಸ್ಥಲಂ

-----------------------

ಅಥ ಏಕ ಭಾಜನ ಸ್ಥಲಮ್

ವಿಶ್ವಂ ಶಿವಮಯಂ ಚೇತಿ

ಸದಾ ಭಾವಯತೋ ಧಿಯಾ |

ಶಿವೈಕ ಭಾಜನಾತ್ ಮತ್ವಾತ್

ಏಕಭಾಜನ ಮುಚ್ಯತೇ || 14-28

#ಸ್ವಸ್ಯ ಸರ್ವಸ್ಯ ಲೋಕಸ್ಯ

ಶಿವಸ್ಯಾದ್ವೈತ ದರ್ಶನಾತ್ |

ಏಕಭಾಜನ ಯೋಗೇನ

ಪ್ರಸಾದೈಕ್ಯ ಮತಿರ್ಭವೇತ್ || 14-29

ಶಿವೇ ವಿಶ್ವಮಿದಂ ಸರ್ವಮ್

ಶಿವಃ ಸರ್ವತ್ರ ಭಾಸತೇ |

ಆಧಾರಾಧೇಯ ಭಾವೇನ

ಶಿವಸ್ಯ ಜಗತಃ ಸ್ಥಿತಿಃ || 14-30

#ಚಿದೇಕ ಭಾಜನಂ ಯಸ್ಯ

ಚಿತ್ತವೃತ್ತೇಃ ಶಿವಾತ್ಮಕಮ್ |

ನಾನ್ಯತ್ ತಸ್ಯ ಕಿಮೇತೇನ

ಮಾಯಾ ಮೂಲೇನ ವಸ್ತುನಾ || 14-31

ಚಿತ್ಪ್ರಕಾಶ ಯತೇ ವಿಶ್ವಮ್

ತದ್ವಿನಾ ನಾಸ್ತಿ ವಸ್ತು ಹಿ |

ಚಿದೇಕ ನಿಷ್ಠ ಚಿತ್ತಾನಾಮ್

ಕಿಂ ಮಾಯಾ ಪರಿಕಲ್ಪಿತೈಃ || 14-32

#ವೃತ್ತಿಶೂನ್ಯೇ ಸ್ವಹೃದಯೇ

ಶಿವಲೀನೇ ನಿರಾಕುಲೇ |

ಯಃ ಸದಾ ವರ್ತತೇ ಯೋಗೀ

ಸ ಮುಕ್ತೋ ನಾತ್ರ ಸಂಶಯಃ || 14-33

ಇತಿ ಏಕಭಾಜನ ಸ್ಥಲಂ

------------------------

ಅಥ ಸಹ ಭೋಜನ ಸ್ಥಲಮ್

ಗುರೋಃ ಶಿವಸ್ಯ ಶಿಷ್ಯಸ್ಯ

ಸ್ವಸ್ವರೂಪ ತಯಾ ಸ್ಮೃತಿಃ |

ಸಹಭೋಜನ ಮಾಖ್ಯಾತಮ್

ಸರ್ವಗ್ರಾಸಾತ್ಮ ಭಾವತಃ || 14-34

#ಶಿವಂ ವಿಶ್ವಂ ಗುರುಂ ಸಾಕ್ಷಾದ್

ಯೋಜಯೇನ್ನಿತ್ಯ ಮಾತ್ಮನಿ |

ಏಕತ್ವೇನ ಚಿದಾಕಾರೇ

ತದಿದಂ ಸಹ ಭೋಜನಮ್ || 14-35

ಅಯಂ ಶಿವೋ ಗುರುಶ್ಚೈಷ

ಜಗದೇತ ಚ್ಚರಾ ಚರಮ್ |

ಅಹಂ ಚೇತಿ ಮತಿರ್ಯಸ್ಯ

ನಾಸ್ತ್ಯಸೌ ವಿಶ್ವ ಭೋಜಕಃ || 14-36

#ಅಹಂ ಭೃತ್ಯಃ ಶಿವಃ ಸ್ವಾಮೀ

ಶಿಷ್ಯೋಹಂ ಗುರುರೇವ ವೈ |

ಇತಿ ಯಸ್ಯ ಮತಿರ್ನಾಸ್ತಿ

ಸ ಚಾದ್ವೈತ ಪದೇ ಸ್ಥಿತಃ || 14-37

ಪರಾ ಹಂತಾಮಯೇ ಸ್ವಾತ್ಮ-

ಪಾವಕೇ ವಿಶ್ವ ಭಾಸ್ವತಿ |

ಇದಂತಾ ಹವ್ಯ ಹೋಮೇನ

ವಿಶ್ವ ಹೋಮೀತಿ ಕಥ್ಯತೇ || 14-38

#ಅಹಂ ಶಿವೋ ಗುರುಶ್ಚಾಹಮ್

ಅಹಂ ವಿಶ್ವಂ ಚರಾಚರಮ್ |

ಯಯಾ ವಿಜ್ಞಾಯತೇ ಸಮ್ಯಕ್

ಪೂರ್ಣಾ ಹಂತೇತಿ ಸಾ ಸ್ಮೃತಾ || 14-39

ಆಧಾರ ವಹ್ನೌ ಚಿದ್ರೂಪೇ

ಭೇದಜಾತಂ ಜಗದ್ಧವಿಃ |

ಜುಹೋತಿ ಜ್ಞಾನ ಯಜ್ವಾ ಯಃ

ಸ ಜ್ಞೇಯೋ ವಿಶ್ವ ಹವ್ಯಭುಕ್ || 14-40

#ಚಿದಾಕಾರೇ ಪರಾಕಾಶೇ

ಪರಮಾನಂದ ಭಾಸ್ವತಿ |

ವಿಲೀನ ಚಿತ್ತ ವೃತ್ತೀನಾಮ್

ಕಾ ವಾ ವಿಶ್ವಕ್ರಮಸ್ಥಿತಿಃ || 14-41

ನಿರಸ್ತ ವಿಶ್ವ ಸಂಬಾಧೇ

ನಿಷ್ಕಲಂಕೇ ಚಿದಂಬರೇ |

ಭಾವಯೇಲ್ಲೀನ ಮಾತ್ಮಾನಮ್

ಸಾಮರಸ್ಯ ಸ್ವಭಾವತಃ || 14-42

#ಸೈಷಾ ವಿದ್ಯಾ ಪರಾ ಜ್ಞೇಯಾ

ಸತ್ತಾನಂದ ಪ್ರಕಾಶಿನೀ |

ಮುಕ್ತಿ ರಿತ್ಯುಚ್ಯತೇ ಸದ್ಭಿಃ

ಜಗನ್ಮೋಹನಿ ವರ್ತಿನೀ || 14-43

ಭಕ್ತಾದಿ ಧಾಮಾರ್ಪಿತ ಧರ್ಮ ಯೋಗಾತ್

ಪ್ರಾಪ್ತೈಕ ಭಾವಃ ಪರಮಾದ್ಭುತೇನ |

ಶಿವೇನ ಚಿದ್ವ್ಯೋ ಮಮಯೇನ ಸಾಕ್ಷಾತ್

ಮೋಕ್ಷಶ್ರಿಯೋ ಭಾಜನ ತಾಮುಪೈತಿ|1444

ಇತಿ ಸಹಭೋಜನಸ್ಥಲಮ್ ಪರಿಸಾಮಪ್ತಂ ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು

ಶಿವಾದ್ವೈತವಿದ್ಯಾಯಾಂ ಶಿವಯೋಗಶಾಸ್ತ್ರೇ

ಶ್ರೀರೇಣುಕಾಗಸ್ತ್ಯಸಂವಾದೇ ವೀರಶೈವಧರ್ಮನಿರ್ಣಯೇ

ಶ್ರೀಶಿವಯೋಗಿಶಿವಾಚಾರ್ಯವಿರಚಿತೇ ಶ್ರೀಸಿದ್ಧಾಂತಶಿಖಾಮಣೌ

ಐಕ್ಯಸ್ಥಲೇ ಐಕ್ಯಸ್ಥಲಾದಿ ಚತುರ್ವಿಧ ಸ್ಥಲ ಪ್ರಸಂಗೋ-ನಾಮ

ಚತುರ್ದಶಃ ಪರಿಚ್ಛೇದಃ ||

ಇಲ್ಲಿಗೆ ಸಹಭೋಜನಸ್ಥಲವು ಮುಗಿಯಿತು ಓಂ ತತ್ಸತ್ ಇತಿ ಶ್ರೀ ಶಿವನಿಂದ ಉಪದೇಶಿಸಲ್ಪಟ್ಟು, ಶ್ರೀ ಸಿದ್ಧಾಂತಾಗಮಗಳಲ್ಲಿಯ ಶಿವಾದ್ವೈತವಿದ್ಯಾರೂಪವೂ, ಶಿವಯೋಗಶಾಸ್ತ್ರವೂ, ಶ್ರೀ ರೇಣುಕಾಗಸ್ತ್ಯಸಂವಾದರೂಪವೂ, ಶ್ರೀ ವೀರಶೈವಧರ್ಮನಿರ್ಣಯವೂ, ಶ್ರೀ ಶಿವಯೋಗಿ ಶಿವಾಚಾರ್ಯ ವಿರಚಿತವಾದ ಶ್ರೀ ಸಿದ್ಧಾಂತ ಶಿಖಾಮಣಿಯಲ್ಲಿ ಐಕ್ಯಸ್ಥಲದಲ್ಲಿಯ ಐಕ್ಯಸ್ಥಲಾದಿ ನಾಲ್ಕು ವಿಧ ಸ್ಥಲಪ್ರಸಂಗವೆಂಬ ಹೆಸರಿನ ಹದಿನಾಲ್ಕನೆಯ ಪರಿಚ್ಛೇದವು ಮುಗಿದುದು.ತ