ಅಥಾಗಸ್ತ್ಯ ವಚಃ ಶ್ರುತ್ವಾ

ರೇಣುಕೋ ಗಣನಾಯಕಃ |

ಧ್ಯಾತ್ವಾ ಕ್ಷಣಂ ಮಹಾದೇವಮ್

ಸಾಂಬಮಾಹ ಸಮಾಹಿತಃ || 5-1

ಅಥ ಶ್ರೀರೇಣುಕಶಾಸನಂ ಪ್ರಾರಂಭ0

ಅಗಸ್ತ್ಯ ಮುನಿಶಾರ್ದೂಲ

ಸಮಸ್ತಾಗಮ ಪಾರಗ |

ಶಿವಜ್ಞಾನ ಕರಂ ವಕ್ಷ್ಯೇ

ಸಿದ್ಧಾಂತಂ ಶ್ರುಣು ಸಾದರಮ್ || 5-2

ಅಗಸ್ತ್ಯ ಖಲು ಸಿದ್ಧಾಂತಾಃ

ವಿಖ್ಯಾತಾ ರುಚಿಭೇದತಃ |

ಭಿನ್ನಾಚಾರ ಸಮಾಯುಕ್ತಾ

ಭಿನ್ನಾರ್ಥ ಪ್ರತಿ ಪಾದಕಾಃ || 5-3

ಸಾಂಖ್ಯಂ ಯೋಗಃ ಪಾಂಚರಾತ್ರಮ್

ವೇದಾಃ ಪಾಶುಪತಂ ತಥಾ |

ಏತಾನಿ ಮಾನ ಭೂತಾನಿ

ನೋಪ ಹನ್ಯಾನಿ ಯುಕ್ತಿ ಭಿಃ || 5-4

ವೇದಃ ಪ್ರಧಾನಂ ಸರ್ವೆಷಾಮ್

ಸಾಂಖ್ಯಾದೀನಾಂ ಮಹಾಮುನೇ |

ವೇದಾನುಸರಣಾ ದೇಷಾಮ್

ಪ್ರಾಮಾಣ್ಯ ಮಿತಿ ನಿಶ್ಚಿತಮ್ || 5-5

ಪಾಂಚರಾತ್ರಸ್ಯ ಸಾಂಖ್ಯಸ್ಯ

ಯೋಗಸ್ಯ ಚ ತಥಾ ಮುನೇ |

ವೇದೈಕ ದೇಶ ವರ್ತಿತ್ವಮ್

ಶೈವಂ ವೇದ ಮಯಂ ಮತಮ್ || 5-6

ವೇದೈಕ ದೇಶ ವರ್ತಿಭ್ಯಃ

ಸಾಂಖ್ಯಾ ದಿಭ್ಯೋ ಮಹಾಮುನೇ |

ಸರ್ವ ವೇದಾನುಸಾರಿತ್ವಾತ್

ಶೈವತಂತ್ರಂ ವಿಶಿಷ್ಯತೇ || 5-7

ಶೈವತಂತ್ರ ಮಿತಿ ಪ್ರೋಕ್ತಮ್

ಸಿದ್ಧಾಂತಾಖ್ಯಂ ಶಿವೋದಿತಮ್ |

ಸರ್ವ ವೇದಾರ್ಥ ರೂಪತ್ವಾತ್

ಪ್ರ್ರಾಮಾಣ್ಯಂ ವೇದವತ್ ಸದಾ || 5-8

ಆಗಮಾ ಬಹುಧಾ ಪ್ರೋಕ್ತಾಃ

ಶಿವೇನ ಪರಮಾತ್ಮನಾ |

ಶೈವಂ ಪಾಶುಪತಂ ಸೋಮಮ್

ಲಾಕುಲಂ ಚೇತಿ ಭೇದತಃ || 5-9

ತೇಷು ಶೈವಂ ಚತುರ್ಭೆದಮ್

ತಂತ್ರಂ ಸರ್ವ ವಿನಿಶ್ಚಿತಮ್ |

ವಾಮಂ ಚ ದಕ್ಷಿಣಂ ಚೈವ

ಮಿಶ್ರಂ ಸಿದ್ಧಾಂತ ಸಂಜ್ಞಕಮ್ || 5-10

ಶಕ್ತಿ ಪ್ರಧಾನಂ ವಾಮಾಖ್ಯಮ್

ದಕ್ಷಿಣಂ ಭೈರವಾತ್ಮಕಮ್ |

ಸಪ್ತ ಮಾತೃ ಪರಂ ಮಿಶ್ರಮ್

ಸಿದ್ಧಾಂತಂ ವೇದ ಸಮ್ಮತಮ್ || 5-11

ವೇದ ಧರ್ಮಾಭಿ ಧಾಯಿತ್ವಾತ್

ಸಿದ್ಧಾಂತಾಖ್ಯಃ ಶಿವಾಗಮಃ |

ವೇದ ಬಾಹ್ಯ ವಿರೋಧಿತ್ವಾದ್

ವೇದ ಸಮ್ಮತ ಉಚ್ಯತೇ || 5-12

ವೇದ ಸಿದ್ಧಾಂತ ಯೋರ್ ಐಕ್ಯಮ್

ಏಕಾರ್ಥ ಪ್ರತಿಪಾದನಾತ್ |

ಪ್ರಾಮಾಣ್ಯಂ ಸದೃಶಂ ಜ್ಞೇಯಮ್

ಪಂಡಿತೈ ರೇತಯೋಃ ಸದಾ || 5-13

ಸಿದ್ಧಾಂತಾಖ್ಯೇ ಮಹಾತಂತ್ರೇ

ಕಾಮಿಕಾದ್ಯೇ ಶಿವೋದಿತೇ |

ನಿರ್ದಿಷ್ಟಮ್ ಉತ್ತರೇ ಭಾಗೇ

ವೀರಶೈವ ಮತಂ ಪರಮ್ || 5-14

ವಿದ್ಯಾಯಾಂ ಶಿವರೂಪಾಯಾಮ್

ವಿಶೇಷಾದ್ ರಮಣಂ ಯತಃ |

ತಸ್ಮಾದೇತೇ ಮಹಾಭಾಗಾ

ವೀರಶೈವಾ ಇತಿ ಸ್ಮೃತಾಃ || 5-15

ವೀಶಬ್ದೇ ನೋಚ್ಯತೇ ವಿದ್ಯಾ

ಶಿವಜೀವೈಕ್ಯ ಬೋಧಿಕಾ |

ತಸ್ಯಾಂ ರಮಂತೇ ಯೇ ಶೈವಾ

ವೀರಶೈವಾಸ್ತು ತೇ ಮತಾಃ || 5-16

ವಿದ್ಯಾಯಾಂ ರಮತೇ ಯಸ್ಮಾತ್

ಮಾಯಾಂ ಹೇ ಯಾಂ ಶ್ವವದ್ ರಹೇತ್

ಅನೇನೈವ ನಿರುಕ್ತೇನ

ವೀರಮಾಹೇಶ್ವರಃ ಸ್ಮೃತಃ || 5-17

ವೇದಾಂತ ಜನ್ಯಂ ಯಜ್ಜ್ಞಾನಮ್

ವಿದ್ಯೇತಿ ಪರಿಕೀತ್ರ್ಯತೇ |

ವಿದ್ಯಾಯಾಂ ರಮತೇ ತಸ್ಯಾಮ್

ವೀರ ಇತ್ಯ-ಭಿ-ಧೀಯತೇ || 5-18

ಶೈವೈರ್ ಮಾಹೇಶ್ವರೈ ಶ್ಚೈವ

ಕಾರ್ಯಮಂತರ್ಬಹಿಃ ಕ್ರಮಾತ್ |

ಶಿವೋ ಮಹೇಶ್ವರಶ್ಚೇತಿ

ನಾತ್ಯಂತ ಮಿಹ ಭಿದ್ಯತೇ || 5-19

ಯಥಾ ಯ(ತ)ಥಾ ನ ಭಿದ್ಯಂತೇ

ಶೈವಾ ಮಾಹೇಶ್ವರಾ ಅಪಿ |

ಶಿವಾಶ್ರಿತೇಷು ತೇ ಶೈವಾಃ

ಜ್ಞಾನ ಯಜ್ಞ ರತಾಃ ನರಾಃ || 5-20

ವೀರಶೈವಾಃ ಷಡ್ಭೇದಾಃ

ಮಾಹೇಶ್ವರಾಃ ಸಮಾಖ್ಯಾತಾಃ

ಕರ್ಮ ಯಜ್ಞ ರತಾ ಭುವಿ |

ತಸ್ಮಾದಾಭ್ಯಂತರೇ ಕುರ್ಯುಃ

ಶೈವಾಃ ಮಾಹೇಶ್ವರಾಃ ಬಹಿಃ || 5-21

ಇತಿ ಸಿದ್ಧಾಂತ ಕಥನಮ್

ವೀರಶೈವಾಸ್ತು ಷಡ್ಭೇದಾಃ

ಸ್ಥಲಧರ್ಮವಿಭೇದತಃ |

ಭಕ್ತಾದಿ ವ್ಯವಹಾರೇಣ

ಪ್ರೋಚ್ಯಂತೇ ಶಾಸ್ತ್ರ ಪಾರಗೈಃ || 5-22

ಶಾಸ್ತ್ರಂ ತು ವೀರಶೈವಾನಾಮ್

ಷಡ್ ವಿಧಂ ಸ್ಥಲ ಭೇದತಃ |

ಧರ್ಮಭೇದ ಸಮಾಯೋಗಾತ್

ಅಧಿಕಾರಿ-ವಿ-ಭೇದತಃ || 5-23

ಆದೌ ಭಕ್ತ ಸ್ಥಲಂ ಪ್ರೋಕ್ತಮ್

ತತೋ ಮಾಹೇಶ್ವರಸ್ಥಲಮ್ |

ಪ್ರಸಾದಿ ಸ್ಥಲ ಮನ್ಯತ್ತು

ಪ್ರಾಣ ಲಿಂಗಿ ಸ್ಥಲಂ ತತಃ |

ಶರಣ ಸ್ಥಲ ಮಾಖ್ಯಾತಮ್

ಷಷ್ಠ ಮೈಕ್ಯ ಸ್ಥಲಂ ಮತಮ್ || 5-24

ಇತಿ ವೀರಶೈವಾಃ ಷಡ್ಭೇದಾಃ

ಭಕ್ತ ಸ್ಥಲಮ್

ಭಕ್ತಸ್ಥಲಂ ಪ್ರವಕ್ಷ್ಯಾಮಿ

ಪ್ರಥಮಂ ಕಲಶೋದ್ಭವ |

ತದವಾಂತರ ಭೇದಾಂಶ್ಚ

ಸಮಾಹಿತ ಮನಾಃ ಶ್ರುಣು || 5-25

ಶೈವೀ ಭಕ್ತಿಃ ಸಮುತ್ಪನ್ನಾ

ಯಸ್ಯಾಸೌ ಭಕ್ತ ಉಚ್ಯತೇ |

ತಸ್ಯಾನುಷ್ಠೇಯಧರ್ಮಾಣಾ-

ಮುಕ್ತಿರ್ ಭಕ್ತಸ್ಥಲಂ ಮತಮ್ || 5-26

ಅವಾಂತರಸ್ಥಲಾನ್ಯತ್ರ

ಪ್ರಾಹುಃ ಪಂಚದಶೋತ್ತಮಾಃ |

ಪಿಂಡತಾ ಪಿಂಡವಿಜ್ಞಾನಮ್

ಸಂಸಾರಗುಣ ಹೇಯತಾ || 5-27

ದೀಕ್ಷಾ ಲಿಂಗಧೃತಿ ಶ್ಚೈವ

ವಿಭೂತೇರಪಿ ಧಾರಣಮ್ |

ರುದ್ರಾಕ್ಷ ಧಾರಣಂ ಪಶ್ಚಾತ್

ಪಂಚಾಕ್ಷರ ಜಪ ಸ್ತಥಾ || 5-28

ಭಕ್ತಮಾರ್ಗ ಕ್ರಿಯಾ ಚೈವ

ಗುರೋರ್ ಲಿಂಗಸ್ಯ ಚಾರ್ಚನಮ್ |

ಜಂಗಮಸ್ಯ ತಥಾ ಹ್ಯೇಷಾಮ್

ಪ್ರಸಾದ ಸ್ವೀಕೃತಿ ಸ್ತಥಾ || 5-29

ಅತ್ರ ದಾನತ್ರಯಂ ಪ್ರೋಕ್ತಮ್

ಸೋಪಾಧಿನಿರುಪಾಧಿಕಮ್ |

ಸಹಜಂ ಚೇತಿ ನಿರ್ದಿಷ್ಟಮ್

ಸಮಸ್ತಾಗಮ ಪಾರಗೈಃ || 5-30

ಏತಾನಿ ಶಿವಭಕ್ತಸ್ಯ

ಕರ್ತವ್ಯಾನಿ ಪ್ರಯತ್ನತಃ || 5-31

ಅಥ ಪಿಂಡಸ್ಥಲಮ್

ಬಹುಜನ್ಮಕೃತೈಃ ಪುಣ್ಯೈಃ

ಪ್ರಕ್ಷೀಣೇ ಪಾಪಪಂಜರೇ |

ಶುದ್ಧಾಂತಃಕರಣೋ ದೇಹೀ

ಪಿಂಡಶಬ್ದೇನ ಗೀಯತೇ || 5-32

ಶಿವಶಕ್ತಿ ಸಮುತ್ಪನ್ನೇ

ಪ್ರಪಂಚೇಸ್ಮಿನ್ ವಿಶಿಷ್ಯತೇ |

ಪುಣ್ಯಾಧಿಕಃ ಕ್ಷೀಣಪಾಪಃ

ಶುದ್ಧಾತ್ಮಾ ಪಿಂಡನಾಮಕಃ || 5-33

ಏಕ ಏವ ಶಿವಃ ಸಾಕ್ಷಾತ್

ಚಿದಾನಂದ ಮಯೋ ವಿಭುಃ|

ನಿರ್ವಿಕಲ್ಪೋ ನಿರಾಕಾರೋ

ನಿರ್ಗುಣೋ ನಿಷ್ಪ್ರ ಪಂಚಕಃ |

ಅನಾದ್ಯ ವಿದ್ಯಾ ಸಂಬಂಧಾತ್|

ತದಂಶೋಜೀವ ನಾಮಕಃ|34

ದೇವತಿರ್ಯಙ್ಮನುಷ್ಯಾದಿ-

ಜಾತಿಭೇದೇ ವ್ಯವಸ್ಥಿತಃ |

ಮಾಯೀ ಮಹೇಶ್ವರ ಸ್ತೇಷಾಮ್

ಪ್ರೇರಕೋ ಹೃದಿ ಸಂಸ್ಥಿತಃ || 5-35

ಚಂದ್ರಕಾಂತೇ ಯಥಾ ತೋಯಮ್

ಸೂರ್ಯಕಾಂತೇ ಯಥಾನಲಃ |

ಬೀಜೇ ಯಥಾಂಕುರಃ ಸಿದ್ಧಃ

ತಥಾತ್ಮನಿ ಶಿವಃ ಸ್ಥಿತಃ || 5-36

ಆತ್ಮತ್ವಮೀಶ್ವರತ್ವಂ ಚ

ಬ್ರಹ್ಮಣ್ಯೇಕತ್ರ ಕಲ್ಪಿತಮ್ |

ಬಿಂಬತ್ವಂ ಪ್ರತಿಬಿಂಬತ್ವಮ್

ಯಥಾ ಪೂಷಣಿ ಕಲ್ಪಿತಮ್ || 5-37

ಗುಣತ್ರಯ ವಿಭೇದೇನ

ಪರತತ್ತ್ವೇ ಚಿದಾತ್ಮನಿ |

ಭೋಕ್ತೃತ್ವಂ ಚೈವ ಭೋಜ್ಯತ್ವಮ್

ಪ್ರೇರಕತ್ವಂ ಚ ಕಲ್ಪಿತಮ್ || 5-38

ಗುಣತ್ರಯಾತ್ಮಿಕಾ ಶಕ್ತಿಃ

ಬ್ರಹ್ಮನಿಷ್ಠಾ ಸನಾತನೀ |

ತದ್ವೈಷಮ್ಯಾತ್ ಸಮುತ್ಪನ್ನಾ

ತಸ್ಮಿನ್ ವಸ್ತುತ್ರಯಾಭಿಧಾ || 5-39

ಕಿಂಚಿತ್ಸತ್ತ್ವರಜೋರೂಪಮ್

ಭೋಕ್ತೃಸಂಜ್ಞಕಮುಚ್ಯತೇ|

ಅತ್ಯಂತ ತಾಮಸೋಪಾಧಿ-

ರ್ಭೊಜ್ಯಮಿತ್ಯ ಭಿಧೀಯತೇ|

ಪರತತ್ತ್ವಮಯೋಪಾಧಿಃ

ಬ್ರಹ್ಮ ಚೈತನ್ಯಮೀಶ್ವರಃ|| 5-40

ಭೋಕ್ತಾ ಭೋಜ್ಯಂ ಪ್ರೇರಯಿತಾ

ವಸ್ತುತ್ರಯಮಿದಂ ಸ್ಮೃತಮ್ |

ಅಖಂಡೇ ಬ್ರಹ್ಮಚೈತನ್ಯೇ

ಕಲ್ಪಿತಂ ಗುಣಭೇದತಃ || 5-41

ಅತ್ರ ಪ್ರೇರಯಿತಾ ಶಂಭುಃ

ಶುದ್ಧೋಪಾಧಿರ್ಮಹೇಶ್ವರಃ |

ಸಮ್ಮಿಶ್ರೋಪಾಧಯಃ ಸರ್ವೆ

ಭೋಕ್ತಾರಃ ಪಶವಃ ಸ್ಮೃತಾಃ || 5-42

ಭೋಜ್ಯಮವ್ಯಕ್ತಮಿತ್ಯುಕ್ತಮ್

ಶುದ್ಧತಾಮಸರೂಪಕಮ್|

ಸರ್ವಜ್ಞಃ ಪ್ರೇರಕಃ ಶಂಭುಃ|

ಕಿಂಚಿಜ್ಜ್ಞೋ ಜೀವ ಉಚ್ಯತೇ|

ಅತ್ಯಂತ ಗೂಢ ಚೈತನ್ಯಮ್

ಜಡಮ ವ್ಯಕ್ತ ಮುಚ್ಯತೇ || 5-43

ಉಪಾಧಿಃ ಪುನರಾಖ್ಯಾತಃ

ಶುದ್ಧಾಶುದ್ಧವಿಭೇದತಃ |

ಶುದ್ಧೋಪಾಧಿಃ ಪರಾ ಮಾಯಾ

ಸ್ವಾಶ್ರಯಾ ಮೋಹಕಾರಿಣೀ || 5-44

ಅಶುದ್ಧೋಪಾಧಿ ರಪ್ಯೇವಮ್

ಅವಿದ್ಯಾಶ್ರಯ ಮೋಹಿನೀ |

ಅವಿದ್ಯಾ ಶಕ್ತಿ ಭೇದೇನ

ಜೀವಾಃ ಬಹು ವಿಧಾಃ ಸ್ಮೃತಾಃ || 5-45

ಮಾಯಾ ಶಕ್ತಿ ವಶಾದೀಶೋ

ನಾನಾ ಮೂರ್ತಿ ಧರಃ ಪ್ರಭುಃ |

ಸರ್ವಜ್ಞಃ ಸರ್ವಕರ್ತಾ ಚ

ನಿತ್ಯಮುಕ್ತೋ ಮಹೇಶ್ವರಃ || 5-46

ಕಿಂಚಿತ್ಕರ್ತಾ ಚ ಕಿಂಚಿಜ್ಜ್ಞೋ

ಬದ್ಧೋನಾದಿಶರೀರವಾನ್ |

ಅವಿದ್ಯಾಮೋಹಿತಾಃ ಜೀವಾಃ

ಬ್ರಹ್ಮೈಕ್ಯಜ್ಞಾನವರ್ಜಿತಾಃ || 5-47

ಪರಿಭ್ರಮಂತಿ ಸಂಸಾರೇ

ನಿಜಕರ್ಮಾನುಸಾರತಃ |

ದೇವತಿರ್ಯಙ್ಮನುಷ್ಯಾದಿ-

ನಾನಾ ಯೋನಿ ವಿಭೇದತಃ || 5-48

ಚಕ್ರ ನೇಮಿ ಕ್ರಮೇಣೈವ

ಭ್ರಮಂತಿ ಹಿ ಶರೀರಿಣಃ |

ಜಾತ್ಯಾಯು ರ್ಭೊಗವೈಷಮ್ಯ-

ಕಾರಣಂ ಕರ್ಮ ಕೇವಲಮ್ || 5-49

ಏತೇಷಾಂ ದೇಹಿನಾಂ ಸಾಕ್ಷೀ

ಪ್ರೇರಕಃ ಪರಮೇಶ್ವರಃ |

ಏತೇಷಾಂ ಭ್ರಮತಾಂ ನಿತ್ಯಮ್

ಕರ್ಮಯಂತ್ರ ನಿಯಂತ್ರಣೇ || 5-50

ದೇಹಿನಾಂ ಪ್ರೇರಕಃ ಶಂಭುಃ

ಹಿತ ಮಾರ್ಗೊಪದೇಶಕಃ |

ಪುನರಾವೃತ್ತಿ ರಹಿತ-

ಮೋಕ್ಷಮಾರ್ಗೊ ಪದೇಶಕಃ || 5-51

ಸ್ವಕರ್ಮ ಪರಿಪಾಕೇನ

ಪ್ರಕ್ಷೀಣ ಮಲ ವಾಸನಃ |

ಶಿವ ಪ್ರಸಾದಾಜ್ಜೀ ವೋಯಮ್

ಜಾಯತೇ ಶುದ್ಧಮಾನಸಃ || 5-52

ಶುದ್ಧಾಂತಃಕರಣೇ ಜೀವೇ

ಶುದ್ಧಕರ್ಮವಿಪಾಕತಃ |

ಜಾಯತೇ ಶಿವಕಾರುಣ್ಯಾತ್

ಪ್ರಸ್ಫುಟಾ ಭಕ್ತಿರೈಶ್ವರೀ || 5-53

ಜಂತುರಂತ್ಯ ಶರೀರೋ ಸೌ

ಪಿಂಡ ಶಬ್ದಾಭಿ ಧೇಯಕಃ || 5-54

ಅಥ ಪಿಂಡ ಜ್ಞಾನ ಸ್ಥಲಮ್

ಶರೀರಾತ್ಮ ವಿವೇಕೇನ

ಪಿಂಡಜ್ಞಾನೀ ಸ ಕಥ್ಯತೇ |

ಶರೀರಮೇವ ಚಾರ್ವಾಕೈಃ

ಆತ್ಮೇತಿ ಪರಿಕೀರ್ ತ್ಯತೇ || 5-55

ಇಂದ್ರಿಯಾಣಾಂ ತಥಾತ್ಮ ತ್ವಮ್

ಅಪರೈಃ ಪರಿಭಾಷ್ಯತೇ |

ಬುದ್ಧಿತತ್ತ್ವ ಗತೈರ್ ಭೌದ್ಧೈಃ

ಬುದ್ಧಿರಾತ್ಮೇತಿ ಗೀಯತೇ || 5-56

ನೇಂದ್ರಿಯಾಣಾಂ ನ ದೇಹಸ್ಯ

ನ ಬುದ್ಧೇರಾತ್ಮ ತಾ ಭವೇತ್ |

ಅಹಂ ಪ್ರತ್ಯಯ ವೇದ್ಯತ್ವಾತ್

ಅನುಭೂತ ಸ್ಮೃತೇರಪಿ || 5-57

ಶರೀರೇಂದ್ರಿಯ ಬುದ್ಧಿಭ್ಯೋ

ವ್ಯತಿರಿಕ್ತಃ ಸನಾತನಃ |

ಆತ್ಮಸ್ಥಿತಿ ವಿವೇಕೀ ಯಃ

ಪಿಂಡಜ್ಞಾನೀ ಸ ಕಥ್ಯತೇ || 5-58

ನಶ್ವರಾಣಿ ಶರೀರಾಣಿ

ನಾನಾರೂಪಾಣಿ ಕರ್ಮಣಾ |

ಆಶ್ರಿತೋ ನಿತ್ಯ ಏ ವಾಸೌ

ಇತಿ ಜಂತೋರ್ ವಿವೇಕಿತಾ || 5-59

ಶರೀರಾತ್ ಪೃಥ ಗಾತ್ಮಾನಮ್

ಆತ್ಮಭ್ಯಃ ಪೃಥ ಗೀಶ್ವರಮ್ |

ಪ್ರೇರಕಂ ಯೋ ವಿಜಾನಾತಿ

ಪಿಂಡಜ್ಞಾ ನೀತಿ ಕಥ್ಯತೇ || 5-60

ಇತಿ ಪಿಂಡಜ್ಞಾನ ಸ್ಥಲಂ

ಅಥ ಸಂಸಾರ ಹೇಯಸ್ಥಲಮ್

ನಿರಸ್ತಹೃತ್ಕಲಂಕಸ್ಯ

ನಿತ್ಯಾನಿತ್ಯವಿವೇಕಿನಃ |

ಸಂಸಾರಹೇಯತಾಬುದ್ಧಿಃ

ಜಾಯತೇ ವಾಸನಾ ಬಲಾತ್ || 5-61

ಐಹಿಕೇ ಕ್ಷಣಿಕೇ ಸೌಖ್ಯೇ

ಪುತ್ರದಾರಾದಿಸಂಭವೇ |

ಕ್ಷಯಿತ್ವಾದಿಯುತೇ ಸ್ವರ್ಗೆ

ಕಸ್ಯ ವಾಂಛಾ ವಿವೇಕಿನಃ || 5-62

ಜಾತಸ್ಯ ಹಿ ಧ್ರುವೋ ಮೃತ್ಯುಃ

ಧ್ರುವಂ ಜನ್ಮ ಮೃತಸ್ಯ ಚ |

ಜಂತುರ್ಮರಣಜನ್ಮಾಭ್ಯಾಮ್

ಪರಿ ಭ್ರಮತಿ ಚಕ್ರವತ್ || 5-63

ಮತ್ಸ್ಯ ಕೂರ್ಮ ವರಾಹಾಂಗೈಃ

ನೃಸಿಂಹ ಮನುಜಾದಿಭಿಃ |

ಜಾತೇನ ನಿಧನಂ ಪ್ರಾಪ್ತಮ್

ವಿಷ್ಣುನಾಪಿ ಮಹಾತ್ಮನಾ || 5-64

ಭೂತ್ವಾ ಕರ್ಮ ವಶಾಜ್ಜಂತುಃ

ಬ್ರಾಹ್ಮಣಾದಿಷು ಜಾತಿಷು |

ತಾಪತ್ರಯ ಮಹಾವಹ್ನಿ-

ಸಂತಾಪಾದ್ ದಹ್ಯತೇ ಭೃಶಮ್ || 5-65

ಕರ್ಮ ಮೂಲೇನ ದುಃಖೇನ

ಪೀಡ್ಯಮಾನಸ್ಯ ದೇಹಿನಃ |

ಆಧ್ಯಾತ್ಮಿಕಾದಿನಾ ನಿತ್ಯಮ್

ಕುತ್ರ ವಿಶ್ರಾಂತಿರಿಷ್ಯತೇ || 5-66

ಆಧ್ಯಾತ್ಮಿಕಂ ತು ಪ್ರಥಮಮ್

ದ್ವಿತೀಯಂ ಚಾಧಿ ಭೌತಿಕಮ್ |

ಆಧಿ ದೈವಿಕ ಮನ್ಯಚ್ಚ

ದುಃಖ ತ್ರಯ ಮಿದಂ ಸ್ಮೃತಮ್ || 5-67

ಆಧ್ಯಾತ್ಮಿಕಂ ದ್ವಿಧಾ ಪ್ರೋಕ್ತಮ್

ಬಾಹ್ಯಾಭ್ಯಂತರ ಭೇದತಃ |

ವಾತಪಿತ್ಥಾದಿಜಂ ದುಃಖಮ್

ಬಾಹ್ಯಮಾಧ್ಯಾತ್ಮಿಕಂ ಮತಮ್ || 5-68

ರಾಗದ್ವೇಷಾದಿಸಂಪನ್ನಮ್

ಆಂತರಂ ಪರಿಕೀತ್ರ್ಯತೇ |

ಆಧಿಭೌತಿಕಮೇತದ್ಧಿ

ದುಃಖಂ ರಾಜಾದಿಭೂತಜಮ್|| 5-69

ಆಧಿದೈವಿಕ ಮಾಖ್ಯಾತಮ್

ಗ್ರಹಯಕ್ಷಾದಿ ಸಂಭವಮ್ |

ದುಃಖೈ ರೇತೈ ರುಪೇತಸ್ಯ

ಕರ್ಮಬದ್ಧಸ್ಯ ದೇಹಿನಃ|

ಸ್ವರ್ಗೆ ವಾ ಯದಿ ವಾ ಭೂಮೌ

ಸುಖಲೇಶೋ ನ ವಿದ್ಯತೇ || 5-70

ತಟಿತ್ಸು ವೀಚಿ ಮಾಲಾಸು

ಪ್ರದೀಪಸ್ಯ ಪ್ರಭಾಸು ಚ |

ಸಂಪತ್ಸು ಕರ್ಮ ಮೂಲಾಸು

ಕಸ್ಯ ವಾ ಸ್ಥಿರತಾಮತಿಃ || 5-71

ಮಲಕೋಶೇ ಶರೀರೇಸ್ಮಿನ್

ಮಹಾದುಃಖ ವಿವರ್ಧನೇ |

ತಟಿದಂಕುರ ಸಂಕಾಶೇ

ಕೋ ವಾ ರುಚ್ಯೇತ ಪಂಡಿತಃ || 5-72

ನಿತ್ಯಾನಂದ ಚಿದಾಕಾರಮ್

ಆತ್ಮತತ್ತ್ವಂ ವಿಹಾಯ ಕಃ |

ವಿವೇಕೀ ರಮತೇ ದೇಹೇ

ನಶ್ವರೇ ದುಃಖಭಾಜನೇ || 5-73

ವಿವೇಕೀ ಶುದ್ಧಹೃದಯೋ

ನಿಶ್ಚಿತಾತ್ಮ ಸುಖೋದಯಃ |

ದುಃಖಹೇತೌ ಶರೀರೇಸ್ಮಿನ್

ಕಲತ್ರೇ ಚ ಸುತೇಷು ಚ || 5-74

ಸುಹೃತ್ಸು ಬಂಧುವರ್ಗೆಷು

ಧನೇಷು ಕುಲ ಪದ್ಧತೌ |

ಅನಿತ್ಯ ಬುದ್ಧ್ಯಾ ಸರ್ವತ್ರ

ವೈರಾಗ್ಯಂ ಪರಮಶ್ನುತೇ || 5-75

ವಿವೇಕಿನೋ ವಿರಕ್ತಸ್ಯ

ವಿಷಯೇ ಷ್ವಾತ್ಮ ರಾಗಿಣಃ |

ಸಂಸಾರ ದುಃಖ ವಿಚ್ಛೇದ-

ಹೇತೌ ಬುದ್ಧಿಃ ಪ್ರವರ್ತತೇ || 5-76

ನಿತ್ಯಾನಿತ್ಯ ವಿವೇಕಿನಃ

ಸುಕೃತಿನಃ ಶುದ್ಧಾಶಯಸ್ಯಾತ್ಮನೋ

ಬ್ರಹ್ಮೋಪೇಂದ್ರ ಮಹೇಂದ್ರಮುಖ್ಯ

ವಿಭವೇಷ್ವ ಸ್ಥಾಯಿತಾಂ ಪಶ್ಯತಃ |

ನಿತ್ಯಾನಂದಪದೇನಿರಾಕೃತ

ಜಗತ್ಸಂಸಾರದುಃಖೋದಯೇ

ಸಾಂಬೇ ಚಂದ್ರಶಿರೋಮಣೌ

ಸಮುದಯೇದ್ ಭಕ್ತಿರ್ ಭವಧ್ವಂಸಿನೀ|| 5-77

ಇತಿ ಸಂಸಾರಹೇಯಸ್ಥಲಂ ಪರಿಸಮಾಪ್ತಂ

ಇತಿ ಅಗಸ್ತ್ಯಪ್ರಾರ್ಥನಾ ಪರಿಸಮಾಪ್ತಂ ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು -

ಶಿವಾದ್ವೈತವಿದ್ಯಾಯಾಂ ಶಿವಯೋಗಶಾಸ್ತ್ರೇ,

ಶ್ರೀ ರೇಣುಕಾಗಸ್ತ್ಯ ಸಂವಾದೇ

ಶ್ರೀವೀರಶೈವಧರ್ಮ ನಿರ್ಣಯೇ,

ಶ್ರೀಶಿವಯೋಗಿ ಶಿವಾಚಾರ್ಯ ವಿರಚಿತೇ

ಶ್ರೀಸಿದ್ಧಾಂತ ಶಿಖಾಮಣೌ

ಭಕ್ತಸ್ಥಲೇ ಪಿಂಡಾದಿಸ್ಥಲ ತ್ರಯ

ಪ್ರಸಂಗೋ ನಾಮ ಪಂಚಮಃ ಪರಿಚ್ಛೇದಃ