ಏಕವಿಂಶಃ ಪರಿಚ್ಛೇದಃ#ವಿಭೀಷಣಾಭೀಷ್ಟಪ್ರದಾನಮ್

ಇತ್ಯುಕ್ತ್ವಾ ಪಶ್ಯತಸ್ತಸ್ಯ

ಪುರಸ್ತಾದೇವ ರೇಣುಕಃ |

ಅಂತರ್ದಧೇ ಮಹಾದೇವಮ್

ಚಿಂತಯನ್ನಂತರಾತ್ಮನಾ || 21-1

# ಅಂತರ್ಹಿತೇ ತದಾ ತಸ್ಮಿನ್

ಮುನಿರಾಶ್ಚರ್ಯಸಂಕುಲಃ |

ತಚ್ಛಾಸ್ತ್ರಪ್ರವಣೋ ಭೂತ್ವಾ

ಸಮವರ್ತತ ಸಂಯಮೀ || 21-2

ಯ ಇದಂ ಶಿವಸಿದ್ಧಾಂತಮ್

ವೀರಶೈವಮತಂ ಪರಮ್ |

ಶ್ರುಣೋತಿ ಶುದ್ಧಮನಸಾ

ಸ ಯಾತಿ ಪರಮಾಂ ಗತಿಮ್ || 21-3

# ಸ್ವಚ್ಛಂದಾಚಾರರಸಿಕಃ

ಸ್ವೇಚ್ಛಾನಿರ್ಮಿತ ವಿಗ್ರಹಃ |

ಆಸಸಾದ ಪುರೀಂ ಲಂಕಾಮ್

ರೇಣುಕೋ ಗಣನಾಯಕಃ || 21-4

ತಮಾಗತಂ ಮಹಾಭಾಗಮ್

ಸರ್ವಾಗಮ ವಿಶಾರದಮ್ |

ವಿಭೀಷಣಃ ಸಮಾಲೋಕ್ಯ

ಗೇಹಂ ಪ್ರಾವೇಶಯನ್ನಿಜಮ್ || 21-5

#ಭದ್ರಾಸನೇ ನಿಜೇ ರಮ್ಯೇ

ನಿವೇಶ್ಯ ಗಣನಾಯಕಮ್ |

ಅಘ್ರ್ಯಪಾದ್ಯಾದಿಭಿಃ ಸರ್ವೆಃ

ಉಪಚಾರೈರಪೂಜಯತ್ || 21-6

ಪೂಜಿತೇನ ಪ್ರಸನ್ನೇನ

ರೇಣುಕೇನ ನಿರೂಪಿತಃ |

ನಿಷಸಾದ ತದಭ್ಯಾಸೇ

ಸ ನಿಜಾಸನಮಾಶ್ರಿತಃ || 21-7

#ಆಬಭಾಷೇ ಗಣೇಂದ್ರಂ ತಮ್

ಕೃತಾಂಜಲಿರ್ವಿಭೀಷಣಃ |

ಮಾನುಷಾಕಾರ ಸಂಪನ್ನಮ್

ಸಾಕ್ಷಾಚ್ಛಿವಮಿವಾಪರಮ್ || 21-8

ರೇಣುಕ ತ್ವಂ ಗಣಾಧೀಶ

ಶಿವಜ್ಞಾನಪರಾಯಣ |

ಅವತೀರ್ಣಂ ಮಹೀಮೇನಾಮ್

ಇತಿ ಸಮ್ಯಕ್ ಶ್ರುತಂ ಮಯಾ || 21-9

#ಮದ್ಭಾಗ್ಯ ಗೌರವಾದದ್ಯ

ಸಮಾಯಾಸ್ತ್ವಂ ಪುರೀಮಿಮಾಮ್ |

ಕಥಂ ಭಾಗ್ಯವಿಹೀನಾನಾಮ್

ಸುಲಭಾಃ ಸ್ಯುರ್ಭವಾದೃಶಾಃ || 21-10

ಮತ್ಸಮೋ ನಾಸ್ತಿ ಲೋಕೇಷು

ಭಾಗ್ಯಾತಿಶಯ ವತ್ತಯಾ |

ಯಸ್ಯ ಗೇಹಂ ಸ್ವಯಂ ಪ್ರಾಪ್ತೋ

ಭವಾನ್ ಸಾಕ್ಷಾನ್ಮಹೇಶ್ವರಃ || 21-11

#ಕೃತಾರ್ಥಾ ಮೇ ಪುರೀ ಹ್ಯೇಷಾ

ಕೃತಾರ್ಥೊ ರಾಕ್ಷಸಾನ್ವಯಃ |

ಜೀವಿತಂ ಚ ಕೃತಾರ್ಥಂ ಮೇ

ಯಸ್ಯ ತ್ವಂ ದೃಷ್ಟಿಗೋಚರಃ || 21-12

ಇತಿ ಬ್ರುವಾಣಂ ಕಲ್ಯಾಣಮ್

ರಾಕ್ಷಸೇಂದ್ರಂ ಗಣೇಶ್ವರಃ |

ಬಭಾಷೇ ಸಸ್ಮಿತೋ ವಾಣೀಮ್

ವಿಶ್ವೋಲ್ಲಾಸಕರೀಂ ಶುಭಾಮ್|| 21-13

#ವಿಭೀಷಣ ಮಹಾಭಾಗ

ಜಾನೇ ತ್ವಾಂ ಧರ್ಮಕೋವಿದಮ್ |

ತ್ವಾಂ ವಿನಾ ಕಸ್ಯ ಲೋಕೇಷು

ಜಾಯತೇ ಭಕ್ತಿರೀದೃಶೀ || 21-14

ಸಮಸ್ತಶಾಸ್ತ್ರ ಸಾರಜ್ಞಮ್

ಸರ್ವಧರ್ಮ ಪರಾಯಣಮ್ |

ಅಧ್ಯಾತ್ಮ ವಿದ್ಯಾನಿರತಮ್

ಆಹುಸ್ತ್ವಾಂ ರಾಕ್ಷಸೇಶ್ವರ || 21-15

#ತ್ವದೀಯಧರ್ಮಸಂಪತ್ತಿಮ್

ಶ್ರುತ್ವಾಹಂ ವಿಸ್ಮಿತಾಶಯಃ |

ವ್ರಜನ್ ಕೈಲಾಸಮಚಲಮ್

ತ್ವದಂತಿಕಮುಪಾಗತಃ || 21-16

ಪ್ರೀತೋಸ್ಮಿ ತವ ಚಾರಿತ್ರೈಃ

ಶೋಭನೈರ್ಲೊಕ ವಿಶ್ರುತೈಃ |

ದಾಸ್ಯಾಮಿ ತೇ ವರಂ ಸಾಕ್ಷಾತ್

ಪ್ರಾರ್ಥಯಸ್ವ ಯಥೇಪ್ಸಿತಮ್ || 21-17

#ಇತಿ ಪ್ರಸಾದ ಸುಮುಖೇ

ಭಾಷಮಾಣೇ ಗಣೇಶ್ವರೇ |

ಪ್ರಣಮ್ಯ ಪರಯಾ ಪ್ರೀತ್ಯಾ

ವ್ಯಾಜಹಾರ ವಿಭೀಷಣಃ || 21-18

ಆಗಮಾನುಗ್ರಹಾದೇವ

ಭವತಃ ಶಿವಯೋಗಿನಃ |

ದುರ್ಲಭಾಃ ಸರ್ವಲೋಕಾನಾಮ್

ಸಮಪದ್ಯಂತ ಸಂಪದಃ || 21-19

#ತಥಾಪಿ ಪ್ರಾರ್ಥನೀಯಂ ಮೇ

ಕಿಂಚಿದಸ್ತಿ ಗಣೇಶ್ವರ |

ಸುಕೃತೇ ಪರಿಪಕ್ವೇ ಹಿ

ಸ್ವಯಂ ಸಿದ್ಧ್ಯತಿ ವಾಂಛಿತಮ್ || 21-20

ರಾವಣೋ ಹಿ ಮಮ ಭ್ರಾತಾ

ಮಾಹೇಶ್ವರಶಿಖಾಮಣಿಃ |

ಅದೃಷ್ಟಶತ್ರುಸಂಬಾಧಮ್

ಶಶಾಸ ಹಿ ಜಗತ್ತ್ರಯಮ್ || 21-21

#ಯಸ್ಯ ಪ್ರತಾಪ ಮತುಲಮ್

ಸೋಢುಮಕ್ಷತ ಶಕ್ತಯಃ |

ಇಂದ್ರಾದಯಃ ಸುರಾಃ ಸರ್ವೆ

ರಾಜ್ಯಲಕ್ಷ್ಮ್ಯಾ ವಿಯೋಜಿತಾಃ || 21-22

ಸ ತು ಕಾಲವಶೇನೈವ

ಸ್ವಚರಿತ್ರವಿಪರ್ಯಯಾತ್ |

ರಣೇ ವಿಷ್ಣ್ವವತಾರೇಣ

ರಾಮೇಣ ನಿಹತೋಭವತ್ || 21-23

#ಸ ತು ರಾಮಶರಾವಿದ್ಧಃ

ಕಂಠಸ್ಖಲಿತಜೀವಿತಃ |

ಅವಶಿಷ್ಟಂ ಸಮಾಲೋಕ್ಯ

ಮಾಮವಾದೀತ್ಸುದುಃಖಿತಃ || 21-24

ವಿಭೀಷಣ ವಿಶೇಷಜ್ಞ

ಮಹಾಬುದ್ಧೇ ಸುಧಾರ್ಮಿಕ |

ಅವಶಿಷ್ಟೋಸಿ ವಂಶಸ್ಯ

ರಕ್ಷಸಾಂ ಭಾಗ್ಯಗೌರವಾತ್ || 21-25

#ವಯಮ ಜ್ಞಾನ ಸಂಪನ್ನಾ

ಮಹತ್ಸು ದ್ರೋಹಕಾರಿಣಃ |

ಈದೃಶೀಂ ತು ಗತಿಂ ಪ್ರಾಪ್ತಾ

ದುಸ್ತರಾ ಹಿ ವಿಧಿಸ್ಥಿತಿಃ || 21-26

ನವಕಂ ಲಿಂಗಕೋಟೀನಾಮ್

ಪ್ರತಿಷ್ಠಾಪ್ಯಮಿಹ ಸ್ಥಲೇ |

ಇತಿ ಸಂಕಲ್ಪಿತಂ ಪೂರ್ವಮ್

ಮಯಾ ತದವಶಿಷ್ಯತೇ || 21-27

ಕೋಟಿಷಟ್ಕಂ ತು ಲಿಂಗಾನಾಮ್

ಮಯಾ ಸಾಧು ಪ್ರತಿಷ್ಠಿತಮ್ |

ಕೋಟಿತ್ರಯಂ ತು ಲಿಂಗಾನಾಮ್

ಸ್ಥಾಪನೀಯಮತಸ್ತ್ವಯಾ || 21-28

ಇತಿ ತಸ್ಯ ವಚಃ ಶ್ರುತ್ವಾ

ದೀನಬುದ್ಧೇರ್ಮರಿಷ್ಯತಃ |

ತಥಾ ಸಾಧು ಕರೋಮೀತಿ

ಪ್ರತಿಜ್ಞಾತಂ ಮಯಾ ತಥಾ || 21-29

#ಯುಗಪಚ್ಛಿವ ಲಿಂಗಾನಾಮ್

ಕೋಟಿತ್ರಯ ಮನುತ್ತಮಮ್ |

ಪ್ರತಿಷ್ಠಾಪ್ಯಂ ಯಥಾಶಾಸ್ತ್ರಮ್

ಇತಿ ಮೇ ನಿಶ್ಚಯೋಭವತ್ || 21-30

ಲಿಂಗಕೋಟಿ ತ್ರಯಸ್ಯೇಹ

ಯುಗಪತ್ ಸ್ಥಾಪನಾ ವಿಧೌ |

ಅವಿದನ್ನೇ ಕಮಾಚಾರ್ಯಮ್

ಅಹಮೇವಮ ವಸ್ಥಿತಃ || 21-31

#ಶಿವಶಾಸ್ತ್ರ ವಿಶೇಷಜ್ಞ

ಶಿವಜ್ಞಾನ ನಿಧಿರ್ಭವಾನ್ |

ಆಚಾರ್ಯ ಭಾವಮಾಸಾದ್ಯ

ಮಮ ಪೂರಯ ವಾಂಛಿತಮ್ || 21-32

ತಸ್ಯೇತಿ ವಚನಂ ಶ್ರುತ್ವಾ

ರಾಕ್ಷಸೇಂದ್ರಸ್ಯ ಧೀಮತಃ |

ತಥೇತಿ ಪ್ರತಿಶುಶ್ರಾವ

ಸರ್ವಜ್ಞೋ ಗಣನಾಯಕಃ || 21-33

#ತತ್ ಸಂತುಷ್ಟಚಿತ್ತಸ್ಯ

ಪೌಲಸ್ತ್ಯಸ್ಯೇಷ್ಟಸಿದ್ಧಯೇ |

ಕೋಟಿತ್ರಯಂ ತು ಲಿಂಗಾನಾಮ್

ಯಥಾಶಾಸ್ತ್ರಂ ಯಥಾವಿಧಿ |

ತ್ರಿಕೋಟ್ಯಾಚಾರ್ಯ ರೂಪೇಣ

ಸ್ಥಾಪಿತಂ ತೇನ ತತ್ಕ್ಷಣೇ || 21-34

ತಾದೃಶಂ ತಸ್ಯ ಮಾಹಾತ್ಯ್ಶಮ್

ಸಮಾಲೋಕ್ಯ ವಿಭೀಷಣಃ |

ಪ್ರಣನಾಮ ಮುಹುರ್ಭಕ್ತ್ಯಾ

ಪಾದಯೋಸ್ತಸ್ಯ ವಿಸ್ಮಿತಃ || 21-35

#ಪ್ರಣತಂ ವಿನಯೋಪೇತಮ್

ಪ್ರಹೃಷ್ಟಂ ರಾಕ್ಷಸೇಶ್ವರಮ್ |

ಅನುಗೃಹ್ಯ ಸ್ವಮಾಹಾತ್ಮಾ ್ಯದ್

ರೇಣುಕೋಂತರ್ಹಿತೋ ಭವತ್ |21-36

ವಿಭೀಷಣೋಪಿ ಹೃಷ್ಟಾತ್ಮಾ

ರೇಣುಕಸ್ಯ ಪ್ರಸಾದತಃ |

ಶಿವಭಕ್ತಿ ರಸಾಸಕ್ತಃ

ಸ್ಥಿರರಾಜ್ಯ ಮಪಾಲಯತ್ || 21-37

#ರೇಣುಕೋಪಿ ಮಹಾತೇಜಾಃ

ಸಂಚರನ್ ಕ್ಷಿತಿಮಂಡಲೇ |

ಪ್ರಚ್ಛನ್ನಶ್ಚ ಪ್ರಕಾಶಶ್ಚ

ಪರಮಾದ್ವೈತ ಭಾವಿತಃ || 21-38

ಕಾಂಶ್ಚಿದ್ ದೃಷ್ಟಿ ನಿಪಾತೇನ

ಕರುಣಾ ರಸವರ್ಷಿಣಾ |

ಅಪರಾನುಪದೇಶೇನ

ಶಿವಾದ್ವೈತಾಭಿಮರ್ಶಿನಾ || 21-39

#ಅನ್ಯಾಂಶ್ಚ ಸಹವಾಸೇನ

ಸಮಸ್ತಮಲ ಹಾರಿಣಾ |

ಕೃತಾರ್ಥಯನ್ ಜನಾನ್ ಸರ್ವಾನ್

ಕೃತಿನಃ ಪಕ್ವ ಕರ್ಮಿಣಃ |21-40

ದರ್ಶಯಿತ್ವಾ ನಿಜಾಧಿಕ್ಯಮ್

ಶಿವದರ್ಶನ ಲಾಲಸಃ |

ಖಂಡಯಿತ್ವಾ ದುರಾಚಾರಾನ್

ಪಾಷಂಡಾನ್ ಭಿನ್ನ ದರ್ಶನಾನ್ || 21-41

#ಯಂತ್ರಮಂತ್ರ ಕಲಾಸಿದ್ಧಾನ್

ವಿಮತಾನ್ ಸಿದ್ಧಮಂಡಲಾನ್ |

ಸ್ಥಾಪಯಿತ್ವಾ ಶಿವಾಗಮಾನ್ |

ಆಜಗಾಮ ನಿಜಾವಾಸಮ್

ಕೊಲ್ಲಿಪಾಕ್ಯಾಭಿಧಂ ಪುರಮ್ || 21-42

ತತ್ರ ಸಂಭಾವಿತಃ ಸರ್ವೆಃ

ಜನೈಃ ಶಿವ ಪರಾಯಣೈಃ |

ಸೋಮನಾಥಾಭಿಧಾನಸ್ಯ

ಶಿವಸ್ಯ ಪ್ರಾಪ ಮಂದಿರಮ್ || 21-43

#ಪಶ್ಯತಾಂ ತತ್ರ ಸರ್ವೆಷಾಮ್

ಭಕ್ತಾನಾಂ ಶಿವಯೋಗಿನಾಮ್ |

ತನ್ವಾನೋ ವಿಸ್ಮಯಂ ಭಾವೈಃ

ತುಷ್ಟಾವ ಪರಮೇಶ್ವರಮ್ || 21-44

ದೇವ ದೇವ ಜಗನ್ನಾಥ

ಜಗತ್ಕಾರಣಕಾರಣ |

ಬ್ರಹ್ಮವಿಷ್ಣುಸುರಾಧೀಶ-

ವಂದ್ಯಮಾನಪದಾಂಬುಜ || 21-45

#ಸಂಸಾರ ನಾಟಕ ಭ್ರಾಂತಿ-

ಕಲಾನಿರ್ವಹಣಪ್ರದ |

ಸಮಸ್ತವೇದವೇದಾಂತ-

ಪರಿಬೋಧಿತವೈಭವ || 21-46

ಸಂಸಾರವೈದ್ಯ ಸರ್ವಜ್ಞ

ಸರ್ವಶಕ್ತಿನಿರಂಕುಶ |

ಸಚ್ಚಿದಾನಂದ ಸರ್ವಸ್ವ

ಪರಮಾಕಾಶವಿಗ್ರಹ || 21-47

ಸಮಸ್ತ ಜಗದಾಧಾರ-

ಜ್ಯೋತಿರ್ಲಿಂಗ ವಿಜೃಂಭಣ |

ಸದಾಶಿವ ಮುಖಾನೇಕ-

ದಿವ್ಯಮೂರ್ತಿ ಕಲಾಧರ || 21-48

# ಗುಣತ್ರಯ ಪದಾತೀತ

ಮಲತ್ರಯ ವಿನಾಶನ |

ಜಗತ್ತ್ರಯ ವಿಲಾಸಾತ್ಮನ್

ಶ್ರುತಿತ್ರಯ ವಿಲೋಚನ || 21-49

ಪಾಹಿ ಮಾಂ ಪರಮೇಶಾನ

ಪಾಹಿ ಮಾಂ ಪಾರ್ವತೀಪತೇ |

#ತ್ವದಾಜ್ಞಯಾ ಮಯೈತಾವತ್

ಕಾಲಮಾತ್ರಂ ಮಹೀತಲೇ |

ಅಚಾರಿ ಭವದುಕ್ತಾನಾಮ್

ಆಗಮಾನಾಂ ಪ್ರಸಿದ್ಧಯೇ || 21-50

ಅತಃ ಪರಂ ಸ್ವರೂಪಂ ತೇ

ಪ್ರಾಪ್ತುಕಾಮೋಸ್ಮಿ ಶಂಕರ |

ಅಂತರಂ ದೇಹಿ ಮೇ ಕಿಂಚಿತ್

ಅನುಕಂಪಾವಿಶೇಷತಃ || 21-51

#ಇತ್ಯುಕ್ತೇ ಗಣನಾಯಕೇನ ಸಹಸಾ ಲಿಂಗಾತ್ತತಃ ಶಾಂಕರಾತ್

ವತ್ಸಾಗಚ್ಛ ಮಹಾನುಭಾವ ಭವತೋ ಭಕ್ತ್ಯಾ ಪ್ರಸನ್ನೋಸ್ಮ್ಯಹಮ್|

ಇತ್ಯುಚ್ಚೆ ರಗದಾದ್ವಚಸ್ತನುಭೃತಾ ಮಾಶ್ಚರ್ಯ ಮಾಸೀತ್ ತ್ತದಾ

ದಿವ್ಯೋ ದುಂದುಭಿರಾನನಾದ ಗಗನೇ ಪುಷ್ಪಂ ವವರ್ಷುರ್ಗಣಾಃ||21-52

#ಶ್ರುತ್ವಾ ಲಿಂಗಾದ್ವಚನ ಮುದಿತಂ ಶಾಂಕರಂ, ಸಾನುಕಂಪಮ್

ಸಂಹೃಷ್ಟಾತ್ಮಾ ಗಣಪತಿರಥೋ, ಜ್ಯೋತಿಷಾ ದೀಪ್ಯಮಾನಃ |

ಜಾತೋತ್ಕಂಠೈಃ ಪರಮನುಚರೈಃ,ಯೋಗಿಭಿಃ ಸ್ತೂಯಮಾನೋ

ಜ್ಯೋತಿರ್ಲಿಂಗಂ ಪರಮನುವಿಶತ್ ಸ್ವಪ್ರಕಾಶಂ ತದಾನೀಮ್ || 21-53

# ಲೀನೇ ತಸ್ಮಿನ್ ಶಾಂಕರೇ ಸ್ವಪ್ರಕಾಶೇ

ದಿವ್ಯಾಕಾರೇ ರೇಣುಕೋ ಸಿದ್ಧನಾಥೇ |

ಸರ್ವೊ ಲೋಕೋ ವಿಸ್ಮಿತೋಭೂತ್ ತದಾನೀಂ

ಶೈವೀ ಭಕ್ತಿಃ ಸಪ್ರಮಾಣಾ ಬಭೂವ || 21-54

# ಲೀನೇ ತಸ್ಮಿನ್ ಶಾಂಕರೇ ಸ್ವಪ್ರಕಾಶೇ

ದಿವ್ಯಾಕಾರೇ ರೇಣುಕೋ ಸಿದ್ಧನಾಥೇ |

ಸರ್ವೊ ಲೋಕೋ ವಿಸ್ಮಿತೋಭೂತ್ ತದಾನೀಂ

ಶೈವೀ ಭಕ್ತಿಃ ಸಪ್ರಮಾಣಾ ಬಭೂವ || 21-54

#ಶ್ರೀವೇದಾಗಮವೀರಶೈವಸರಣಿಂ ಶ್ರೀಷಟ್ಸ್ಥಲೋದ್ಯನ್ಮಣಿಮ್

ಶ್ರೀಜೀವೇಶ್ವರಯೋಗಪದ್ಮತರಣಿಂ ಶ್ರೀಗೋಪ್ಯಚಿಂತಾಮಣಿಮ್

ಶ್ರೀಸಿದ್ಧಾಂತಶಿಖಾಮಣಿಂ ಲಿಖಯಿತಾ ಯಸ್ತಂ ಲಿಖಿತ್ವಾ ಪರಾನ್

ಶ್ರುತ್ವಾ ಶ್ರಾವಯಿತಾ ಸ ಯಾತಿ ವಿಮಲಾಂ ಭುಕ್ತಿಂ ಚ ಮುಕ್ತಿಂ ಪರಾಮ್|21-55

ಇತಿ ವಿಭೀಷಣಾಭೀಷ್ಟಪ್ರದಾನಂ

ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು ಶಿವಾದ್ವೈತವಿದ್ಯಾಯಾಂ ಶಿವಯೋಗಶಾಸ್ತ್ರೇ

ಶ್ರೀರೇಣುಕಾಗಸ್ತ್ಯಸಂವಾದೇ ವೀರಶೈವಧರ್ಮನಿರ್ಣಯೇ

ಶ್ರೀ ಶಿವಯೋಗಿ ಶಿವಾಚಾರ್ಯವಿರಚಿತೇ ಶ್ರೀ ಸಿದ್ಧಾಂತ ಶಿಖಾಮಣೌ

ವಿಭೀಷಣಾಭೀಷ್ಟವರ ಪ್ರದಾನಪ್ರಸಂಗೋ ನಾಮ ಏಕವಿಂಶತಿತಮಃ ಪರಿಚ್ಛೇದಃ ||