ಅಷ್ಟಾದಶಃ ಪರಿಚ್ಛೇದಃ

ಪ್ರಾಣಲಿಂಗಿಸ್ಥಲಾಂತರ್ಗತ ನವವಿಧಲಿಂಗ ಸ್ಥಲ ಪ್ರಸಂಗಃ

ಅಥ ಪ್ರಾಣಲಿಂಗಿ ಸ್ಥಲಮ್

|| ಅಗಸ್ತ್ಯ ಉವಾಚ ||

ಪ್ರಸಾದಿಸ್ಥಲ ಸಂಬದ್ಧಾಃ

ಸ್ಥಲಭೇದಾಃ ಪ್ರಕೀರ್ತಿತಾಃ |

ಪ್ರಾಣಲಿಂಗಿಸ್ಥಲಾ ರೂಢಾನ್

ಸ್ಥಲಭೇದಾನ್ ವದಸ್ವ ಮೇ || 18-1

|| ಶ್ರೀ ರೇಣುಕ ಉವಾಚ ||

#ಸ್ಥಲಾನಾಂ ನವಕಂ ಪ್ರೋಕ್ತಮ್

ಪ್ರಾಣಲಿಂಗಿ ಸ್ಥಲಾ ಶ್ರಿತಮ್ |

ಆದಾವಾತ್ಮ ಸ್ಥಲಂ ಪ್ರೋಕ್ತಮ್

ಅಂತರಾತ್ಮ ಸ್ಥಲಂ ತತಃ || 18-2

ಪರಮಾತ್ಮ ಸ್ಥಲಂ ಪಶ್ಚಾತ್

ನಿರ್ದೆಹಾಗಮ ಸಂಜ್ಞಕಮ್ |

ನಿರ್ಭಾವಾಗಮ ಸಂಜ್ಞಂ ಚ

ತತೋ ನಷ್ಟಾಗಮ ಸ್ಥಲಮ್ || 18-3

#ಆದಿ ಪ್ರಸಾದನಾಮಾ ಥ

ತತೋಪ್ಯಂತ್ಯ ಪ್ರಸಾದಕಮ್ |

ಸೇವ್ಯ ಪ್ರಸಾದಕಂ ಚಾಥ

ಶ್ರುಣು ತೇಷಾಂ ಚ ಲಕ್ಷಣಮ್ || 18-4

ಇತಿ ಪ್ರಾಣಲಿಂಗಿ ಸ್ಥಲಮ್

ಅಥ ಆತ್ಮಸ್ಥಲಮ್

ಜೀವ ಭಾವಂ ಪರಿತ್ಯಜ್ಯ

ಯದಾ ತತ್ತ್ವಂ ವಿಭಾವ್ಯತೇ |

ಗುರೋಶ್ಚ ಬೋಧ ಯೋಗೇನ

ತದಾತ್ಮಾಯಂ ಪ್ರಕೀರ್ತಿ ತಃ || 18-5

#ವಾಲಾಗ್ರ ಶತಭಾಗೇನ

ಸದೃಶೋ ಹೃದಯ ಸ್ಥಿತಃ |

ಅಶ್ನನ್ ಕರ್ಮಫಲಂ ಸರ್ವಮ್

ಆತ್ಮಾ ಸ್ಫುರತಿ ದೀಪವತ್ || 18-6

ಆತ್ಮಾಪಿ ಸರ್ವಭೂತಾನಾಮ್

ಅಂತಃಕರಣ ಮಾಶ್ರಿತಃ |

ಅಣುಭೂತೋ ಮಲಾ ಸಂಗಾದ್

ಆದಿಕರ್ಮ ನಿಯಂತ್ರಿತಃ || 18-7

#ಜಪಾ ಯೋಗಾದ್ಯಥಾ ರಾಗಃ

ಸ್ಫಟಿಕಸ್ಯ ಮಣೇರ್ಭವೇತ್ |

ತಥಾಹಂಕಾರ ಸಂಬಂಧಾತ್

ಆತ್ಮ ನೋ ದೇಹಮಾನಿತಾ || 18-8

ಅಶರೀರೋಪಿ ಸರ್ವತ್ರ

ವ್ಯಾಪಕೋಪಿ ನಿರಂಜನಃ|

ಆತ್ಮಾ ಮಾಯಾ ಶರೀರಸ್ಥಃ

ಪರಿಭ್ರಮತಿ ಸಂಸೃತೌ || 18-9

#ಆತ್ಮ ಸ್ವರೂಪ ವಿಜ್ಞಾನಮ್

ದೇಹೇಂದ್ರಿಯ ವಿಭಾಗತಃ |

ಅಖಂಡ ಬ್ರಹ್ಮ ರೂಪೇಣ

ತದಾತ್ಮ ಪ್ರಾಪ್ತಿ ರುಚ್ಯತೇ || 18-10

ನ ಚಾಸ್ತಿ ದೇಹ ಸಂಬಂಧೋ

ನಿರ್ದೆಹಸ್ಯ ಸ್ವಭಾವತಃ |

ಅಜ್ಞಾನ ಕರ್ಮ ಯೋಗೇನ

ದೇಹೀ ಭವತಿ ಭುಕ್ತಯೇ || 18-11

#ನಾ ಸೌ ದೇವೋ ನ ಗಂಧರ್ವೊ

ನ ಯಕ್ಷೊ ನೈವ ರಾಕ್ಷಸಃ |

ನ ಮನುಷ್ಯೋ ನ ತಿರ್ಯಕ್ ಚ

ನ ಚ ಸ್ಥಾವರವಿಗ್ರಹಃ |

ತತ್ತಚ್ಛರೀರ ಯೋಗೇನ

ತತ್ತನ್ನಾಮ್ನಾ ವಿರಾಜತೇ || 18-12

ನಾನಾ ಕರ್ಮವಿಪಾಕಾಶ್ಚ

ನಾನಾ ಯೋನಿಸಮಾಶ್ರಿತಾಃ |

ನಾನಾ ಯೋಗ ಸಮಾಪನ್ನಾ

ನಾನಾ ಬುದ್ಧಿ ವಿಚೇಷ್ಟಿತಾಃ || 18-13

#ನಾನಾ ಮಾರ್ಗ ಸಮಾರೂಢಾ

ನಾನಾ ಸಂಕಲ್ಪ ಕಾರಿಣಃ|

ಅ ಸ್ವತಂತ್ರಾಶ್ಚ ಕಿಂಚಿಜ್ಜ್ಞಾಃ

ಕಿಂಚಿತ್ಕರ್ತೃತ್ವ ಹೇತವಃ |

ಲೀಲಾ ಭಾಜನ ತಾಂ ಪ್ರಾಪ್ತಾಃ

ಶಿವಸ್ಯ ಪರಮಾತ್ಮನಃ || 18-14

ಚೋದಿತಾಃ ಪರಮೇಶೇನ

ಸ್ವಸ್ವ ಕರ್ಮಾನು ರೂಪತಃ |

ಸ್ವರ್ಗಂ ವಾ ನರಕಂ ವಾಪಿ

ಪ್ರಾಣಿನೋ ಯಾಂತಿ ಕರ್ಮಿಣಃ || 18-15

#ಪುನಃ ಕರ್ಮಾವಶೇಷೇಣ

ಜಾಯಂತೇ ಗರ್ಭಕೋಟರಾತ್ |

ಜಾತಾ ಮೃತಾಃ ಪುನರ್ಜಾತಾಃ

ಪುನರ್ಮರಣ ಭಾಜಿನಃ |

ಭ್ರಮಂತಿ ಘೋರ ಸಂಸಾರೇ

ವಿಶ್ರಾಂತಿ ಕಥಯಾ ವಿನಾ || 18-16

ಜೀವತ್ವಂ ದುಃಖ ಸರ್ವಸ್ವಮ್

ತದಿದಂ ಮಲ ಕಲ್ಪಿತಮ್ |

ನಿರಸ್ಯತೇ ಗುರೋರ್ಬೊಧಾತ್

ಜ್ಞಾನಶಕ್ತಿಃ ಪ್ರಕಾಶತೇ || 18-17

ಇತಿ ಆತ್ಮ ಸ್ಥಲಂ

---------------------------------------------------

ಅಥ ಅಂತರಾತ್ಮ ಸ್ಥಲಮ್

ಯದಾ ನಿರಸ್ತಂ ಜೀವತ್ವಮ್

ಭವೇದ್ ಗುರ್ವನುಬೋಧತಃ |

ತದಾಂತರಾತ್ಮ ಭಾವೋಪಿ

ನಿರಸ್ತಸ್ಯ ಭವೇದ್ ಧ್ರುವಮ್ || 18-18

#ದೇಹ ಸ್ಥಿತೋಪ್ಯಯಂ ಜೀವೋ

ದೇಹಸಂಗ ವಿವರ್ಜಿತಃ |

ಬೋಧಾತ್ಪರಾತ್ಮ ಭಾವಿತ್ವಾತ್

ಅಂತರಾತ್ಮೇತಿ ಕೀರ್ತಿತಃ || 18-19

ಆತ್ಮಾಂತರಾಲ ವರ್ತಿತ್ವಾತ್

ಜೀವಾತ್ಮ ಪರಮಾತ್ಮನೋಃ |

ಯೋಗಾದುಭಯ ಧರ್ಮಾಣಾಮ್

ಅಂತರಾತ್ಮೇತಿ ಕೀರ್ತಿತಃ || 18-20

#ಅಹಂಕಾರಸ್ಯ ಸಂಬಂಧಾತ್

ಮನುಷ್ಯತ್ವಾದಿ ವಿಭ್ರಮಃ |

ನ ಸ್ವಭಾವ ಇತಿ ಜ್ಞಾನಾತ್

ಅಂತರಾತ್ಮೇತಿ ಕಥ್ಯತೇ || 18-21

ಯಥಾ ಪದ್ಮ ಪಲಾಶಸ್ಯ

ನ ಸಂಗೋ ವಾರಿಣಾ ಭವೇತ್ |

ತಥಾ ದೇಹಜುಷೋಪ್ಯಸ್ಯ

ನ ಶರೀರೇಣ ಸಂಗತಿಃ || 18-22

#ನೀಡಸ್ಥಿತೋ ಯಥಾ ಪಕ್ಷೀ

ನಿಡಾದ್ಭಿನ್ನಃ ಪ್ರದೃಶ್ಯತೇ |

ದೇಹಸ್ಥಿತ ಸ್ತಥಾತ್ಮಾಯಮ್

ದೇಹಾದನ್ಯಃ ಪ್ರಕಾಶ್ಯತೇ || 18-23

ಆಚ್ಛಾದ್ಯತೇ ಯಥಾ ಚಂದ್ರೋ

ಮೇಘೈರಾಸಂಗವರ್ಜಿತೈಃ |

ತಥಾತ್ಮಾ ದೇಹಸಂಘಾತೈಃ

ಅಸಂಗ ಪರಿವೇಷ್ಟಿತಃ || 18-24

#ನಿರ್ಮಮೋ ನಿರಹಂಕಾರೋ

ನಿರಸ್ತೋಪಾಧಿ ವಿಕ್ಲವಃ |

ದೇಹಸ್ಥೋಪಿ ಸದಾ ಹ್ಯಾತ್ಮಾ

ಶಿ ವಂ ಪಶ್ಯತಿ ಯೋಗತಃ || 18-25

ಭೋಕ್ತೃ ಭೋಜ್ಯ ಪರಿತ್ಯಾಗಾತ್

ಪ್ರೇರಕಸ್ಯ ಪ್ರಸಾದತಃ |

ಭೋಕ್ತೃತಾಭಾವ ಗಲಿತಃ

ಸ್ಫುರತ್ಯಾತ್ಮಾ ಸ್ವಭಾವತಃ || 18-26

#ಸರ್ವೆಷಾಂ ಪ್ರೇರಕತ್ವೇನ

ಶಂಭುರಂತಃ ಸ್ಥಿತಃ ಸದಾ |

ತತ್ಪರಿಜ್ಞಾನ ಯೋಗೇನ

ಯೋಗೀ ನಂದತಿ ಮುಕ್ತವತ್ || 18-27

ಇತಿ ಅಂತರಾತ್ಮಸ್ಥಲಂ

------------------------------------

ಅಥ ಪರಮಾತ್ಮಸ್ಥಲಮ್

ನಿರ್ಧೂತೇ ತತ್ಪ್ರ ಬೋಧೇನ

ಮಲೇ ಸಂಸಾರಕಾರಣೇ |

ಸಾಮರಸ್ಯಾತ್ ಪರಾತ್ಮಸ್ಥಾತ್

ಪರಮಾತ್ಮಾ ಯಮುಚ್ಯತೇ || 18-28

#ಸರ್ವೆಷಾಮಾತ್ಮ ಭೇದಾನಾಮ್

ಉತ್ಕೃಷ್ಟತ್ವಾತ್ ಸ್ವತೇಜಸಾ |

ಪರಮಾತ್ಮಾ ಶಿವಃ ಪ್ರೋಕ್ತಃ

ಸರ್ವಗೋಪಿ ಪ್ರಕಾಶವಾನ್ || 18-29

ಬ್ರಹ್ಮಾಂಡ ಬುದ್ಬುದ ಸ್ತೋಮಾ

ಯಸ್ಯ ಮಾಯಾಮಹೋದಧೌ |

ಉನ್ಮಜ್ಜಂತಿ ನಿಮಜ್ಜಂತಿ

ಪರಮಾತ್ಮಾ ಸ ಉಚ್ಯತೇ || 18-30

#ಯಸ್ಮಿನ್ ಜ್ಯೋತಿರ್ಗಣಾಃ ಸರ್ವೆ

ಸ್ಫುಲಿಂಗಾ ಇವ ಪಾವಕಾತ್ |

ಉತ್ಪತ್ಯ ವಿಲಯಂ ಯಾಂತಿ

ತದ್ರೂಪಂ ಪರಮಾತ್ಮನಃ || 18-31

ಯಸ್ಮಿನ್ ಸಮಸ್ತ ವಸ್ತೂನಿ

ಕಲ್ಲೋಲಾ ಇವ ವಾರಿಧೌ |

ಸಂಭೂಯ ಲಯ ಮಾಯಾಂತಿ

ತದ್ರೂಪಂ ಪರಮಾತ್ಮನಃ || 18-32

#ನಿರಸ್ತ ಮಲ ಸಂಬಂಧಮ್

ನಿಃಶೇಷ ಜಗದಾತ್ಮಕಮ್ |

ಸರ್ವತತ್ತ್ವೋ ಪರಿ ಪ್ರೋಕ್ತಮ್

ಸ್ವರೂಪಂ ಪರಮಾತ್ಮನಃ || 18-33

ಯಥಾ ವ್ಯಾಪ್ಯ ಜಗತ್ಸರ್ವಮ್

ಸ್ವಭಾಸಾ ಭಾತಿ ಭಾಸ್ಕರಃ |

ತಥಾ ಸ್ವಶಕ್ತಿ ಭಿರ್ವ್ಯಾಪ್ಯ

ಪರಮಾತ್ಮಾ ಪ್ರಕಾಶತೇ || 18-34

#ವಿಶ್ವತೋ ಭಾಸಮಾನೋಪಿ

ವಿಶ್ವ ಮಾಯಾ ವಿಲಕ್ಷಣಃ |

ಪರಮಾತ್ಮಾ ಸ್ವಯಂಜ್ಯೋತೀ –

ರೂಪೋ ಜೀವಾತ್ಮನಾಂ ಭವೇತ್|| 18-35

ಇತಿ ಪರಮಾತ್ಮ ಸ್ಥಲಂ

----------------------------

ಅಥ #ನಿರ್ದೆಹಾಗಮ ಸ್ಥಲಮ್

ದೇಹಿನೋಪಿ ಪರಾತ್ಮತ್ವ-

ಭಾವಿನೋ ನಿರಹಂಕೃತೇಃ |

ನಿರಸ್ತದೇಹಧರ್ಮಸ್ಯ

ನಿರ್ದೆಹಾಗಮ ಉಚ್ಯತೇ || 18-36

#ಗಲಿತೇ ಮಮತಾ ಹಂತೇ

ಸಂಸಾರ ಭ್ರಮಕಾರಣೇ |

ಪರಾಹಂತಾಂ ಪ್ರವಿಷ್ಟಸ್ಯ

ಕುತೋ ದೇಹಃ ಕುತೋ ರತಿಃ || 18-37

ಕೇವಲೇ ನಿಷ್ಪ್ರ ಪಂಚೌಘೇ

ಗಂಭೀರೇ ಚಿನ್ಮಹೋದಧೌ |

ನಿಮಗ್ನ ಮಾನಸೋ ಯೋಗೀ

ಕಥಂ ದೇಹಂ ವಿಚಿಂತಯೇತ್ || 18-38

#ಅಪರಿಚ್ಛೇದ್ಯ ಮಾತ್ಮಾನಮ್

ಚಿದಂಬರ ಮಿತಿ ಸ್ಮರನ್ |

ದೇಹ ಯೋಗೇಪಿ ದೇಹಸ್ಥೈಃ

ವಿಕಾರೈರ್ನ ವಿಲಿಪ್ಯತೇ || 18-39

ಅಖಂಡ ಸಂವಿದಾಕಾರಮ್

ಅದ್ವಿತೀಯಂ ಸುಖಾತ್ಮಕಮ್ |

ಪರಮಾಕಾಶ ಮಾತ್ಮಾನಮ್

ಮನ್ವಾನಃ ಕುತ್ರ ಮುಹ್ಯತಿ || 18-40

#ಉಪಾಧಿ ವಿಹಿತಾ ಭೇದಾ

ದೃಶ್ಯಂತೇ ಚೈಕ ವಸ್ತುನಿ |

ಇತಿ ಯಸ್ಯ ಮತಿಃ ಸೋಯಮ್

ಕಥಂ ದೇಹಮಿತೋ ಭವೇತ್ || 18-41

ಭೇದ ಬುದ್ಧಿಃ ಸಮಸ್ತಾನಾಮ್

ಪರಿಚ್ಛೇದಸ್ಯ ಕಾರಣಮ್ |

ಅಭೇದ ಬುದ್ಧೌ ಜಾತಾಯಾಮ್

ಪರಿಚ್ಛೇದಸ್ಯ ಕಾ ಕಥಾ || 18-42

#ಶಿವೋಹ ಮಿತಿ ಯಸ್ಯಾಸ್ತಿ

ಭಾವನಾ ಸರ್ವಗಾಮಿನೀ |

ತಸ್ಯ ದೇಹೇನ ಸಂಬಂಧಃ

ಕಥಂ ಸ್ಯಾದಮಿತಾತ್ಮನಃ || 18-43

ಇತಿ ನಿರ್ದೆಹಾಗಮಸ್ಥಲಂ

-------------------------------

#ಅಥ #ನಿರ್ಭಾವಾಗಮಸ್ಥಲಮ್

ವ್ಯತಿ ರೇಕಾತ್ ಸ್ವ್ವರೂಪಸ್ಯ

ಭಾವಾಂತರ ನಿರಾಕೃತೇಃ|

ಭಾವೋ ವಿಕಾರ ನಿರ್ಮುಕ್ತೋ

ನಿರ್ಭಾವಾಗಮ ಉಚ್ಯತೇ || 18-44

#ಅಹಂ ಬ್ರಹ್ಮೇತಿ ಭಾವಸ್ಯ

ವಸ್ತು ದ್ವಯ ಸಮಾಶ್ರಯಃ |

ಏಕೀ ಭೂತಸ್ಯ ಚಿದ್ವ್ಯೋಮ್ನಿ

ತದಭಾವೋ ವಿನಿಶ್ಚಿತಃ || 18-45

ಏಕಭಾವ ನಿರೂಢಸ್ಯ

ನಿಷ್ಕಲಂಕೇ ಚಿದಂಬರೇ |

ಕ್ವ ಜಾತಿ ವಾಸನಾ ಯೋಗಃ

ಕ್ವ ದೇಹಿತ್ವಂ ಪರಿಭ್ರಮಃ || 18-46

#ಶೂನ್ಯೇ ಚಿದಂಬರೇ ಸ್ಥಾನೇ

ದೂರೇ ವಾಙ್ಮಾನ ಸಾಧ್ವನಃ |

ವಿಲೀನಾತ್ಮಾ ಮಹಾಯೋಗೀ

ಕೇನ ಕಿಂ ವಾಪಿ ಭಾವಯೇತ್ || 18-47

ಅವಿಶುದ್ಧೇ ವಿಶುದ್ಧೇ ವಾ

ಸ್ಥಲೇ ದೀಪ್ತಿರ್ಯಥಾ ರವೇಃ |

ಪತತ್ಯೇವಂ ಸದಾದ್ವೈತೀ

ಸರ್ವತ್ರ ಸಮವೃತ್ತಿಮಾನ್ || 18-48

#ನ ಬಿಭೇತಿ ಜರಾಮೃತ್ಯೋಃ

ನ ಕ್ಷುಧಾಯಾ ವಶಂ ವ್ರಜೇತ್ |

ಪರಿಪೂರ್ಣ ನಿಜಾನಂದಮ್

ಸಮಾಸ್ವಾದನ್ ಮಹಾಸುಖೀ || 18-49

ಕುತೋ ಭಾವಃ ಕುತಶ್ಚಿತ್ತಮ್

ಕುತಃ ಸಂಕಲ್ಪ ವಾಸನಾ |

ನಿಸ್ತರಂಗೇ ಚಿದಂ ಬೋಧೌ

ವಿಲೀನಸ್ಯ ಮಹಾತ್ಮನಃ || 18-50

ಇತಿ ನಿರ್ಭಾವಾಗಮಸ್ಥಲಂ

-------------------------------------------

ಅಥ #ನಷ್ಟಾಗಮಸ್ಥಲಮ್

ಭೇದಶೂನ್ಯೇ ಮಹಾಬೋಧೇ

ಜ್ಞಾತ್ರಾದಿತ್ರಯಹೀನಕಃ |

ಜ್ಞಾನಸ್ಯ ನಷ್ಟಭಾವೇನ

ನಷ್ಟಾಗಮ ಇಹೋಚ್ಯತೇ || 18-51

#ಅದ್ವೈತ ವಾಸನಾವಿಷ್ಟ-

ಚೇತಸಾಂ ಪರಯೋಗಿನಾಮ್ |

ಪಶ್ಯತಾಮಂತರಾತ್ಮಾನಮ್

ಜ್ಞಾತೃತ್ವಂ ಕಥಮನ್ಯಥಾ || 18-52

ಅಕರ್ತಾಹಮವೇತ್ತಾಹಮ್

ಅದೇಹೋಹಂ ನಿರಂಜನಃ |

ಇತಿ ಚಿಂತಯತಃ ಸಾಕ್ಷಾತ್

ಸಂವಿದೇವ ಪ್ರಕಾಶತೇ || 18-53

#ನಿರಸ್ತ ಭೇದ ಜಲ್ಪಸ್ಯ

ನಿರೀಹಸ್ಯ ಪ್ರಶಾಮ್ಯತಃ |

ಸ್ವೇ ಮಹಿಮ್ನಿ ವಿಲೀನಸ್ಯ

ಕಿಮನ್ಯಜ್ಜ್ಞೇಯ ಮುಚ್ಯತೇ || 18-54

ಏಕೀಭೂತೇ ನಿಜಾಕಾರೇ

ಸಂವಿದಾ ನಿಷ್ಪ್ರಪಂಚಯಾ |

ಕೇನ ಕಿಂ ವೇದನೀಯಂ ತದ್

ವೇತ್ತಾ ಕಃ ಪರಿಭಾಷ್ಯತೇ || 18-55

#ಮಹಾಸತ್ತಾ ಮಹಾಸಂವಿದ್

ವಿಶ್ವ ರೂಪಾ ಪ್ರಕಾಶತೇ |

ತದ್ವಿನಾ ನಾಸ್ತಿ ವಸ್ತ್ವೇಕಮ್

ಭೇದ ಬುದ್ಧಿಂ ವಿಮುಂಚತಃ || 18-56

ಇತಿ #ನಷ್ಟಾಗಮಸ್ಥಲಂ

---------------------------

ಅಥ #ಆದಿಪ್ರಸಾದಿಸ್ಥಲಮ್

ಸರ್ವಾಧಿಷ್ಠಾಕೃತಃ ಶಂಭುಃ

ಆದಿಸ್ತಸ್ಯ ಪ್ರಸಾದತಃ |

ಆದಿಪ್ರಸಾದೀತ್ಯುಕ್ತೋಯಮ್

ನಿರ್ವಿಕಾರ ಪದೇ ಸ್ಥಿತಃ || 18-57

#ಅನೇಕಜನ್ಮಶುದ್ಧಸ್ಯ

ನಿರಹಂಕಾರಭಾವಿನಃ |

ಅಪ್ರಪಂಚಸ್ಯಾದಿ ದೇವಃ

ಪ್ರಸೀದತಿ ವಿಮುಕ್ತಯೇ || 18-58

ಶಿವಪ್ರಸಾದ ಸಂಪತ್ತ್ಯಾ

ಶಿವಭಾವ ಮುಪೇಯುಷಿ |

ಶಿವಾದನ್ಯ ಜ್ಜಗಜ್ಜಾಲಮ್

ದೃಶ್ಯತೇ ನ ಚ ದೃಶ್ಯತೇ || 18-59

#ಶಂಭೋಃ ಶಿವ ಪ್ರಸಾದೇನ

ಸಂಸಾರಚ್ಛೇದ ಕಾರಿಣಾ |

ಮೋಹಗ್ರಂಥಿಂ ವಿನಿರ್ಭಿದ್ಯ

ಮುಕ್ತಿಂ ಯಾಂತಿ ವಿವೇಕಿನಃ || 18-60

ವಿನಾ ಪ್ರಸಾದಮೀಶಸ್ಯ

ಸಂಸಾರೋ ನ ನಿವರ್ತತೇ |

ವಿನಾ ಸೂರ್ಯೊದಯಂ ಲೋಕೇ

ಕುತಃ ಸ್ಯಾತ್ ತಮಸೋ ಲಯಃ || 18-61

#ಸರ್ವಾನು ಗ್ರಾಹಕಃ ಶಂಭುಃ

ಕೇವಲಂ ಕೃಪಯಾ ಪ್ರಭುಃ |

ಮೋಚಯೇತ್ ಸಕಲಾನ್ ಜಂತೂನ್

ನ ಕಿಂಚಿದಿಹ ಕಾರಣಮ್ || 18-62

ಇತಿ ಆದಿಪ್ರಸಾದಿಸ್ಥಲಂ

-----------------------------------------

ಅಥ #ಅಂತ್ಯಪ್ರಸಾದಿಸ್ಥಲಮ್

ಲಯಃ ಸರ್ವಪದಾರ್ಥಾನಾಮ್

ಅಂತ್ಯ ಇತ್ಯುಚ್ಯತೇ ಬುಧೈಃ |

ಪ್ರಸಾದೋನು ಭವಸ್ತಸ್ಯ

ತದ್ವಾನಂತ್ಯ ಪ್ರಸಾದವಾನ್ || 18-63

#ದೇವತಿರ್ಯಙ್ಮನುಷ್ಯಾದಿ-

ವ್ಯವಹಾರ ವಿಕಲ್ಪನಾ |

ಮಾಯಾಕೃತಾ ಪರೇ ತತ್ತ್ವೇ

ತಲ್ಲಯೇ ತತ್ಕ್ಷಯೋ ಭವೇತ್ || 18-64

ಸಾಕ್ಷಾತ್ಕೃತೇ ಪರೇ ತತ್ತ್ವೇ

ಸಚ್ಚಿದಾನಂದ ಲಕ್ಷಣೇ |

ಕ್ವ ಪದಾರ್ಥ ಪರಿಜ್ಞಾನಮ್

ಕುತೋ ಜ್ಞಾತೃತ್ವ ಸಂಭವಃ || 18-65

#ಪದಾರ್ಥಾಃ ಸ್ವಪ್ನ ಸಂದೃಷ್ಟಾ

ಯಥಾ ಬೋಧೇ ಲಯಂ ಗತಾಃ |

ತಥಾ ಸಂಸಾರಜಾಃ ಭಾವಾ

ಲೀಯಂತೇ ಬ್ರಹ್ಮ ಬೋಧತಃ || 18-66

ಸುಷುಪ್ತಸ್ಯ ಯಥಾ ವಸ್ತು

ನ ಕಿಂಚಿದಪಿ ಭಾಸತೇ |

ತಥಾ ಮುಕ್ತಸ್ಯ ಜೀವಸ್ಯ

ನ ಕಿಂಚಿದ್ವಸ್ತು ದೃಶ್ಯತೇ || 18-67

#ಯಥಾಕಾಶ ಮವಿಚ್ಛಿನ್ನಮ್

ನಿರ್ವಿಕಾರಂ ಸ್ವರೂಪತಃ |

ತಥಾ ಮುಕ್ತಸ್ಯ ಜೀವಸ್ಯ

ಸ್ವರೂಪಮವ ಶಿಷ್ಯತೇ || 18-68

ನ ಕಿಂಚಿದಪಿ ಮುಕ್ತಸ್ಯ

ದೃಶ್ಯಂ ಕರ್ತವ್ಯಮೇವ ವಾ |

ಸುಖ ಸ್ಫೂರ್ತಿ ಸ್ವರೂಪೇಣ

ನಿಶ್ಚಲಾ ಸ್ಥಿತಿರುಚ್ಯತೇ || 18-69

#ಶಿವಾದ್ವೈತಪರಿಜ್ಞಾನ-

ಶಿಥಿಲಾಶೇಷ ವಸ್ತು ನಃ |

ಕೇವಲಂ ಸಂವಿದುಲ್ಲಾಸ-

ದರ್ಶಿನಃ ಕೇನ ಕೋ ಭವೇತ್ || 18-70

ಇತಿ ಅಂತ್ಯಪ್ರಸಾದಿಸ್ಥಲಂ

-------------------------------

ಅಥ #ಸೇವ್ಯಪ್ರಸಾದಿಸ್ಥಲಮ್

ಸೇವ್ಯೋ ಗುರುಃ ಸಮಸ್ತಾನಾಮ್

ಶಿವ ಏವ ನ ಸಂಶಯಃ |

ಪ್ರಸಾದೋಸ್ಯ ಪರಾನಂದ-

ಪ್ರಕಾಶಃ ಪರಿಕೀತ್ರ್ಯತೇ || 18-71

#ಸೇವ್ಯೋ ಗುರುಃ ಸ್ಮೃತೋ ಹ್ಯಸ್ಯ

ಪ್ರಸಾದೋನುಭವೋ ಮತಃ |

ತದೇಕಾವೇಶರೂಪೇಣ

ತದ್ವಾನ್ ಸೇವ್ಯ ಪ್ರಸಾದವಾನ್ || 18-72

ಗುರುದೇವಃ ಪರಂ ತತ್ತ್ವಮ್

ಪರತತ್ತ್ವಂ ಗುರುಃ ಸ್ಮೃತಃ |

ತದೇಕತ್ವಾನು ಭಾವೇನ

ನ ಕಿಂಚಿದವ ಶಿಷ್ಯತೇ || 18-73

#ಅಪರಿಚ್ಛೇದ್ಯಮಾತ್ಮಸ್ಥಮ್

ಅವಾಙ್ಮನಸ ಗೋಚರಮ್ |

ಆನಂದಂ ಪಶ್ಯತಾಂ ಪುಂಸಾಮ್

ರತಿರನ್ಯತ್ರ ಕಾ ಭವೇತ್ || 18-74

ಜ್ಞಾನಾಮೃತೇನ ತೃಪ್ತಸ್ಯ

ಕಿಮನ್ಯೈರ್ಭೊಜ್ಯವಸ್ತುಭಿಃ |

ಜ್ಞಾನಾದೇವ ಪರಾನಂದಮ್

ಪ್ರಕಾಶಯತಿ ಸಚ್ಛಿವಃ || 18-75

#ಮುಕ್ತಿರೇವ ಪರಾ ತೃಪ್ತಿಃ

ಸಚ್ಚಿದಾನಂದ ಲಕ್ಷಣಾ |

ನಿತ್ಯತೃಪ್ತಸ್ಯ ಮುಕ್ತಸ್ಯ

ಕಿಮನ್ಯೈರ್ಭೊಗಸಾಧನೈಃ || 18-76

ನ ಬಾಹ್ಯಂ ಕರ್ಮ ತಸ್ಯಾಸ್ತಿ

ನ ಚಾಂತನೆರ್ವ ಕುತ್ರಚಿತ್ |

ಶಿವೈಕ್ಯ ಜ್ಞಾನರೂಢಸ್ಯ

ದೇಹಭ್ರಾಂತಿಂ ವಿಮುಂಚತಃ || 18-77

ನ ಕರ್ಮಬಂಧೇ ನ ತಪೋವಿಶೇಷೇ

ನ ಮಂತ್ರಯೋಗಾಭ್ಯಸನೇ ತಥೈವ |

ಧ್ಯಾನೇ ನ ಬೋಧೇ ಚ ತಥಾತ್ಮತತ್ತ್ವೇ

ಮನಃಪ್ರವೃತ್ತಿಃ ಪರಯೋಗಭಾಜಾಮ್|| 18-78

ಇತಿ ಸೇವ್ಯಪ್ರಸಾದಿಸ್ಥಲಂ

#ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು

ಶಿವಾದ್ವೈತ ವಿದ್ಯಾಯಾಂ ಶಿವಯೋಗಶಾಸ್ತ್ರೇ

ಶ್ರೀರೇಣುಕಾಗಸ್ತ್ಯಸಂವಾದೇ ವೀರಶೈವಧರ್ಮನಿರ್ಣಯೇ,

ಶ್ರೀಶಿವಯೋಗಿ ಶಿವಾಚಾರ್ಯವಿರಚಿತೇ

ಶ್ರೀಸಿದ್ಧಾಂತಶಿಖಾಮಣೌ

ಲಿಂಗ ಸ್ಥಲಾಂತರ್ಗತ ಪ್ರಾಣಲಿಂಗಿ ಸ್ಥಲೇ

ಆತ್ಮಸ್ಥಲಾದಿ ನವವಿಧ ಸ್ಥಲಾಂತರ್ಗತಪ್ರಸಂಗೋ ನಾಮ

ಅಷ್ಟಾದಶಃ ಪರಿಚ್ಛೇದಃ ||