ಸಪ್ತದಶಃ ಪರಿಚ್ಛೇದಃ

ಪ್ರಸಾದಿಸ್ಥಲಾಂತರ್ಗತ

ನವವಿಧಲಿಂಗ ಸ್ಥಲ ಪ್ರಸಂಗಃ

ಅಥ ಪ್ರಸಾದಿಸ್ಥಲಮ್

|| ಅಗಸ್ತ್ಯ ಉವಾಚ ||

ಸ್ಥಲಾನಿ ತಾನಿ ಚೋಕ್ತಾನಿ

ಯಾನಿ ಮಾಹೇಶ್ವರಸ್ಥಲೇ |

ವದಸ್ವ ಸ್ಥಲಭೇದಂ ಮೇ

ಪ್ರಸಾದಿಸ್ಥಲ ಸಂಶ್ರಿತಮ್ || 17-1

|| ಶ್ರೀ ರೇಣುಕ ಉವಾಚ ||

#ಸ್ಥಲಭೇದಾ ನವ ಪ್ರೋಕ್ತಾಃ

ಪ್ರಸಾದಿಸ್ಥಲ ಸಂಶ್ರಿತಾಃ |

ಕಾಯಾನುಗ್ರಹಣಂ ಪೂರ್ವಮ್

ಇಂದ್ರಿಯಾನುಗ್ರಹಂ ತತಃ || 17-2

ಪ್ರಾಣಾನುಗ್ರಹಣಂ ಪಶ್ಚಾತ್

ತತಃ ಕಾಯಾರ್ಪಿತಂ ಮತಮ್|

ಕರಣಾರ್ಪಿತ ಮಾಖ್ಯಾತಮ್

ತತೋ ಭಾವಾರ್ಪಿತಂ ಮತಮ್ || 17-3

#ಶಿಷ್ಯಸ್ಥಲಂ ತತಃ ಪ್ರೋಕ್ತಮ್

ಶುಶ್ರೂಷಾ ಸ್ಥಲಮೇವ ಚ |

ತತಃ ಸೇವ್ಯಸ್ಥಲಂ ಚೈಷಾಮ್

ಕ್ರಮಶಃ ಶ್ರುಣು ಲಕ್ಷಣಮ್ || 17-4

ಇತಿ ಪ್ರಸಾದಿಸ್ಥಲಮ್

----------------------------------------

ಅಥ ಕಾಯಾನುಗ್ರಹಸ್ಥಲಮ್

ಅನುಗೃಹ್ಣಾತಿ ಯಲ್ಲೋಕಾನ್

ಸ್ವಕಾಯಂ ದರ್ಶಯನ್ನಸೌ |

ತಸ್ಮಾದೇಷ ಸಮಾಖ್ಯಾತಃ

ಕಾಯಾನುಗ್ರಹ ನಾಮಕಃ || 17-5

#ಯಥಾ ಶಿವೋನುಗೃಹ್ಣಾತಿ

ಮೂರ್ತಿಮಾವಿಶ್ಯ ದೇಹಿನಃ |

ತಥಾ ಯೋಗೀ ಶರೀರಸ್ಥಃ

ಸರ್ವಾನುಗ್ರಾಹಕೋ ಭವೇತ್ || 17-6

ಶಿವಃ ಶರೀರಯೋಗೇಪಿ

ಯಥಾ ಸಂಗ ವಿವರ್ಜಿತಃ |

ತಥಾ ಯೋಗೀ ಶರೀರಸ್ಥೋ

ನಿಃಸಂಗೋ ವರ್ತತೇ ಸದಾ || 17-7

#ಶಿವಭಾವನಯಾ ಯುಕ್ತಃ

ಸ್ಥಿರಯಾ ನಿರ್ವಿಕಲ್ಪಯಾ |

ಶಿವೋ ಭವತಿ ನಿರ್ಧೂತ-

ಮಾಯಾವೇಶ ಪರಿಪ್ಲವಃ || 17-8

ಚಿತ್ತವೃತ್ತಿಷು ಲೀನಾಸು

ಶಿವೇ ಚಿತ್ಸುಖಸಾಗರೇ |

ಅವಿದ್ಯಾಕಲ್ಪಿತಂ ವಸ್ತು

ನಾನ್ಯತ್ ಪಶ್ಯತಿ ಸಂಯಮೀ || 17-9

#ನೇದಂ ರಜತಮಿತ್ಯುಕ್ತೇ

ಯಥಾ ಶುಕ್ತಿಃ ಪ್ರಕಾಶತೇ |

ನೇದಂ ಜಗದಿತಿ ಜ್ಞಾತೇ

ಶಿವತತ್ತ್ವಂ ಪ್ರಕಾಶತೇ || 17-10

ಯಥಾ ಸ್ವಪ್ನಕೃತಂ ವಸ್ತು

ಪ್ರಬೋಧೇನೈವ ಶಾಮ್ಯತಿ |

ತಥಾ ಶಿವಸ್ಯ ವಿಜ್ಞಾನೇ

ಸಂಸಾರಂ ನೈವ ಪಶ್ಯತಿ || 17-11

#ಅಜ್ಞಾನಮೇವ ಸರ್ವೆಷಾಮ್

ಸಂಸಾರಭ್ರಮಕಾರಣಮ್ |

ತನ್ನಿವೃತ್ತೌ ಕಥಂ ಭೂಯಃ

ಸಂಸಾರಭ್ರಮ ದರ್ಶನಮ್ || 17-12

ಗಲಿತಾಹಂಕೃತಿ ಗ್ರಂಥಿಃ

ಕ್ರೀಡಾಕಲ್ಪಿತ ವಿಗ್ರಹಃ |

ಜೀವನ್ಮುಕ್ತಶ್ಚರೇದ್ ಯೋಗೀ

ದೇಹಿವನ್ನಿರುಪಾಧಿಕಃ || 17-13

ಇತಿ ಕಾಯಾನುಗ್ರಹಸ್ಥಲಮ್

----------------------------------

ಅಥ ಇಂದ್ರಿಯಾನುಗ್ರಹಸ್ಥಲಮ್

ದರ್ಶನಾತ್ ಪರಕಾಯಸ್ಯ

ಕರಣಾನಾಂ ವಿವೇಕತಃ |

ಇಂದ್ರಿಯಾನುಗ್ರಹಃ ಪ್ರೋಕ್ತಃ

ಸರ್ವೆಷಾಂ ತತ್ತ್ವವೇದಿಭಿಃ || 17-14

#ಇಂದ್ರಿಯಾಣಾಂ ಸಮಸ್ತಾನಾಮ್

ಸ್ವಾರ್ಥೆಷು ಸತಿ ಸಂಗಮೇ |

ರಾಗೋ ವಾ ಜಾಯತೇ ದ್ವೇಷಃ

ತೌ ಯೋಗೀ ಪರಿವರ್ಜಯೇತ್|17-15

ಇಂದ್ರಿಯಾಣಾಂ ಬಹಿರ್ವೃತ್ತಿಃ

ಪ್ರಪಂಚಸ್ಯ ಪ್ರಕಾಶಿನೀ |

ಅಂತಃ ಶಿವೇ ಸಮಾವೇಶೋ

ನಿಷ್ಪ್ರಪಂಚಸ್ಯ ಕಾರಣಮ್ || 17-16

#ಕ್ಷಣಮಂತಃ ಶಿವಂ ಪಶ್ಯನ್

ಕೇವಲೇನೈವ ಚೇತಸಾ |

ಬಾಹ್ಯಾರ್ಥಾನಾಮ್ ಅನುಭವಮ್

ಕ್ಷಣಂ ಕುರ್ವನ್ ದೃಗಾದಿಭಿಃ || 17-17

ಸರ್ವೆಂದ್ರಿಯ ನಿರೂಢೋಪಿ

ಸರ್ವೆಂದ್ರಿಯ ವಿಹೀನವಾನ್ |

ಶಿವಾಹಿತ ಮನಾ ಯೋಗೀ

ಶಿವಂ ಪಶ್ಯತಿ ನಾಪರಮ್ || 17-18

#ನ ಜರಾ ಮರಣಂ ನಾಸ್ತಿ

ನ ಪಿಪಾಸಾ ನ ಚ ಕ್ಷುಧಾ |

ಶಿವಾಹಿತೇಂದ್ರಿಯ ಸ್ಯಾಸ್ಯ

ನಿರ್ಮಾನಸ್ಯ ಮಹಾತ್ಮನಃ || 17-19

ಮನೋ ಯತ್ರ ಪ್ರವರ್ತೆತ

ತತ್ರ ಸರ್ವೆಂದ್ರಿಯ ಸ್ಥಿತಿಃ |

ಶಿವೇ ಮನಸಿ ಸಂಲ್ಲೀನೇ

ಕ್ವ ಚೇಂದ್ರಿಯ ವಿಚಾರಣಾ || 17-20

#ಯದ್ಯತ್ ಪಶ್ಯನ್ ದೃಶಾ ಯೋಗೀ

ಮನಸಾ ಚಿಂತಯತ್ಯಪಿ |

ತತ್ತತ್ ಸರ್ವಂ ಶಿವಾಕಾರಮ್

ಸಂವಿದ್ರೂಪಂ ಪ್ರಕಾಶತೇ || 17-21

ಕರಣೈಃ ಸಹಿತಂ ಪ್ರಾಣಮ್

ಮನಸ್ಯಾಧಾಯ ಸಂಯಮೀ |

ಯೋಜಯೇತ್ ಸ ಶಿವಃ ಸಾಕ್ಷಾತ್

ಯತ್ರ ನಾಸ್ತಿ ಜಗದ್ಭ್ರಮಃ || 17-22

#ಸರ್ವೆಂದ್ರಿಯ ಪ್ರವೃತ್ತ್ಯಾ ಚ

ಬಹಿರಂತಃ ಶಿವಂ ಯಜನ್ |

ಸ್ವಚ್ಛಂದಚಾರೀ ಸರ್ವತ್ರ

ಸುಖೀ ಭವತಿ ಸಂಯಮೀ || 17-23

ಇತಿ ಇಂದ್ರಿಯಾನುಗ್ರಹಸ್ಥಲಂ

-----------------------------------

ಅಥ ಪ್ರಾಣಾನುಗ್ರಹಸ್ಥಲಮ್

ಶಿವಸ್ಯ ಪರಕಾಯಸ್ಯ

ಯತ್ ತಾತ್ಪರ್ಯಾವ ಲೋಕನಮ್ |

ತತ್ಪ್ರಾಣಾನುಗ್ರಹಃ ಪ್ರೋಕ್ತಃ

ಸರ್ವೆಷಾಂ ತತ್ತ್ವದರ್ಶಿಭಿಃ || 17-24

#ಪ್ರಾಣೋ ಯಸ್ಯ ಲಯಂ ಯಾತಿ

ಶಿವೇ ಪರಮಕಾರಣೇ |

ಕುತಸ್ತಸ್ಯೇಂದ್ರಿಯ ಸ್ಫೂರ್ತಿಃ

ಕುತಃ ಸಂಸಾರದರ್ಶನಮ್ || 17-25

ಕರಣೇಷು ನಿವೃತ್ತೇಷು

ಸ್ವಾರ್ಥಸಂಗಾತ್ ಪ್ರಯತ್ನತಃ |

ತೈಃ ಸಮಂ ಪ್ರಾಣಮಾರೋಪ್ಯ

ಸ್ವಾಂತೇ ಶಾಂತಮತಿಃ ಸ್ವಯಮ್17-26

#ಶಾಂತತ್ವಾತ್ ಪ್ರಾಣವೃತ್ತೀನಾಮ್

ಮನಃಶಾಮ್ ಯತಿ ವೃತ್ತಿಭಿಃ |

ತಚ್ಛಾಂತೌ ಯೋಗಿನಾಂ ಕಿಂಚಿತ್

ಶಿವಾದನ್ಯನ್ನ ದೃಶ್ಯತೇ || 17-27

ಪ್ರಾಣ ಏವ ಮನುಷ್ಯಾಣಾಮ್

ದೇಹಧಾರಣ ಕಾರಣಮ್ |

ತದಾಧಾರಃ ಶಿವಃ ಪ್ರೋಕ್ತಃ

ಸರ್ವಕಾರಣ ಕಾರಣಮ್ || 17-28

#ನಿರಾಧಾರಃ ಶಿವಃ ಸಾಕ್ಷಾತ್

ಪ್ರಾಣಸ್ತೇನ ಪ್ರತಿಷ್ಠಿತಃ |

ತದಾಧಾರಾ ತನುರ್ಜ್ಞೆಯಾ:

ಜೀವೋ ಯೇನೈವ ಚೇಷ್ಟತೇ || 17-29

ಶಿವೇ ಪ್ರಾಣೋ ವಿಲೀನೋಪಿ

ಯೋಗಿನೋ ಯೋಗಮಾರ್ಗತಃ |

ಸ್ವಶಕ್ತಿ ವಾಸನಾಯೋಗಾದ್

ಧಾರಯತ್ಯೇವ ವಿಗ್ರಹಮ್ || 17-30

#ಸ ಚಾಭ್ಯಾಸವಶಾದ್ ಭೂಯಃ

ಸರ್ವತತ್ತ್ವಾತಿವರ್ತಿನಿ |

ನಿಷ್ಕಲಂಕೇ ನಿರಾಕಾರೇ

ನಿರಸ್ತಾಶೇಷವಿಕ್ಲವೇ || 17-31

ಚಿದ್ವಿಲಾಸಪರಿಸ್ಫೂರ್ತಿ

ಪರಿಪೂರ್ಣಸುಖಾಹ್ವಯೇ |

ಶಿವೇ ವಿಲೀನಃ ಸರ್ವಾತ್ಮಾ

ಯೋಗೀ ಚಲತಿ ನ ಕ್ವಚಿತ್ || 17-32

#ಪ್ರಧ್ವಸ್ತವಾಸನಾಸಂಗಾತ್

ಪ್ರಾಣವೃತ್ತಿಪರಿಕ್ಷಯಾತ್ |

ಶಿವೈಕೀಭೂತಸರ್ವಾತ್ಮಾ

ಸ್ಥಾಣುವದ್ ಭಾತಿ ಸಂಯಮೀ || 17-33

ಇತಿ ಪ್ರಾಣಾನುಗ್ರಹಸ್ಥಲಂ

------------------------

ಅಥ ಕಾಯಾರ್ಪಿತಸ್ಥಲಮ್

ಶಿವಸ್ಯ ಪರರೂಪಸ್ಯ

ಸರ್ವಾನುಗ್ರಾಹಿಣೋರ್ಚನೇ |

ತ್ಯಾಗೋ ದೇಹಾಭಿಮಾನಸ್ಯ

ಕಾಯಾರ್ಪಿತಮುದಾಹೃತಮ್ || 17-34

#ಯದಾ ಯೋಗೀ ನಿಜಂ ದೇಹಮ್

ಶಿವಾಯ ವಿನಿವೇದಯೇತ್ |

ತದಾ ಭವತಿ ತದ್ರೂಪಮ್

ಶಿವರೂಪಂ ನ ಸಂಶಯಃ || 17-35

ಇಂದ್ರಿಯಪ್ರೀತಿಹೇತೂನಿ

ವಿಷಯಾಸಂಗಜಾನಿ ಚ |

ಸುಖಾನಿ ಸುಖಚಿದ್ರೂಪೇ

ಶಿವಯೋಗೀ ನಿವೇದಯೇತ್|| 17-36

#ದರ್ಶನಾತ್ ಸ್ಪ್ಪರ್ಶನಾದ್ ಭುಕ್ತೇಃ

ಶ್ರವಣಾದ್ ಘ್ರಾಣನಾದಪಿ |

ವಿಷಯೇಭ್ಯೋ ಯದುತ್ಪನ್ನಮ್

ಶಿವೇ ತತ್ಸುಖಮರ್ಪಯೇತ್ || 17-37

ದೇಹದ್ವಾರೇಣ ಯದ್ಯತ್ ಸ್ಯಾತ್

ಸುಖಂ ಪ್ರಾಸಂಗಮಾತ್ಮನಃ |

ತತ್ತನ್ನಿವೇದಯನ್ ಶಂಭೋಃ

ಯೋಗೀ ಭವತಿ ನಿರ್ಮಲಃ || 17-38

ಇತಿ ಕಾಯಾರ್ಪಿತಸ್ಥಲಂ

------------------------

ಅಥ ಕರಣಾರ್ಪಿತಸ್ಥಲಮ್

ಆಸಂಜನಂ ಸಮಸ್ತಾನಾಮ್

ಕರಣಾನಾಂ ಪರಾತ್ಪರೇ |

ಶಿವೇ ಯತ್ ತದಿದಂ ಪ್ರೋಕ್ತಮ್

ಕರಣಾರ್ಪಿತಮಾಗಮೇ || 17-39

#ಯದ್ಯತ್ಕರಣಮಾಲಂಬ್ಯ

ಭುಂಕ್ತೇ ವಿಷಯಜಂ ಸುಖಮ್ |

ತತ್ತಚ್ಛಿವೇ ಸಮರ್ಪೆ್ಯಷ

ಕರಣಾರ್ಪಕ ಉಚ್ಯತೇ || 17-40

ಅಹಂಕಾರ ಮದೋದ್ರಿಕ್ತಮ್

ಅಂತಃಕರಣವಾರಣಮ್ |

ಬಧ್ನೀಯಾದ್ ಯಃ ಶಿವಾಲಾನೇ

ಸ ಧೀರಃ ಸರ್ವಸಿದ್ಧಿಮಾನ್ || 17-41

#ಇಂದ್ರಿಯಾಣಾಂ ಸಮಸ್ತಾನಾಮ್

ಮನಃ ಪ್ರಥಮಮುಚ್ಯತೇ |

ವಶೀಕೃತೇ ಶಿವೇ ತಸ್ಮಿನ್

ಕಿಮನ್ಯೈಸ್ತದ್ವ ಶಾನುಗೈಃ || 17-42

ಇಂದ್ರಿಯಾಣಾಂ ವಶೀಕಾರೋ

ನಿವೃತ್ತಿ ರಿತಿ ಗೀಯತೇ |

ಲಕ್ಷೀಕೃತೇ ಶಿವೇ ತೇಷಾಮ್

ಕುತಃ ಸಂಸಾರಗಾಹನಮ್ || 17-43

#ಸಂಸಾರ ವಿಷಕಾಂತಾರ-

ಸಮುಚ್ಛೇದ ಕುಠಾರಿಕಾ |

ಉಪಶಾಂತಿರ್ಭವೇತ್ ಪುಂಸಾಮ್

ಇಂದ್ರಿಯಾಣಾಂ ವಶೀಕೃತೌ || 17-44

ಇಂದ್ರಿಯೈರೇವ ಜಾಯಂತೇ

ಪಾಪಾನಿ ಸುಕೃತಾನಿ ಚ |

ತೇಷಾಂ ಸಮರ್ಪಣಾದೀಶೇ

ಕುತಃ ಕರ್ಮನಿಬಂಧನಮ್ || 17-45

#ಪ್ರಕಾಶಮಾನೇ ಚಿದ್ವಹ್ನೌ

ಬಹಿರಂತರ್ಜಗನ್ಮಯೇ |

ಸಮಪ್ರ್ಯ ವಿಷಯಾನ್ ಸರ್ವಾನ್

ಮುಕ್ತವಜ್ಜಾಯತೇ ಜನಃ || 17-46

ಚಿತ್ತದ್ರವ್ಯಂ ಸಮಾದಾಯ

ಜಗಜ್ಜಾತಂ ಮಹಾಹವಿಃ |

ಚಿದ್ವಹ್ನೌ ಜುಹ್ವತಾಮಂತಃ

ಕುತಃ ಸಂಸಾರವಿಪ್ಲವಃ || 17-47

ಆತ್ಮಜ್ಯೋತಿಷಿ ಚಿದ್ರೂಪೇ

ಪ್ರಾಣವಾಯುನಿಬೋಧಿತೇ |

ಜುಹ್ವನ್ ಸಮಸ್ತವಿಷಯಾನ್

ತನ್ಮಯೋ ಭವತಿ ಧ್ರುವಮ್ || 17-48

ಇಂದ್ರಿಯಾಣಿ ಸಮಸ್ತಾನಿ

ಶರೀರಂ ಭೋಗಸಾಧನಮ್ |

ಶಿವಪೂಜಾಂಗಭಾವೇನ

ಭಾವಯನ್ ಮುಕ್ತಿಮಾಪ್ನುಯಾತ್ ||49

ಇತಿ ಕರಣಾರ್ಪಿತಸ್ಥಲಂ

-----------------------------

ಅಥ ಭಾವಾರ್ಪಿತಸ್ಥಲಮ್

ಶಿವೇ ನಿಶ್ಚಲ ಭಾವೇನ

ಭಾವಾನಾಂ ಯತ್ಸಮರ್ಪಣಮ್ |

ಭಾವಾರ್ಪಿತಮಿದಂ ಪ್ರೋಕ್ತಮ್

ಶಿವಸದ್ಭಾವ ವೇದಿಭಿಃ || 17-50

#ಚಿತ್ತಸ್ಥ ಸಕಲಾರ್ಥಾನಾಮ್

ಮನನಂ ಯತ್ತು ಮಾನಸೇ |

ತದರ್ಪಣಂ ಶಿವೇ ಸಾಕ್ಷಾತ್

ಮಾನಸೋ ಭಾವ ಉಚ್ಯತೇ || 17-51

ಭಾವ ಏವ ಹಿ ಜಂತೂನಾಮ್

ಕಾರಣಂ ಬಂಧಮೋಕ್ಷಯೋಃ |

ಭಾವಶುದ್ಧೌ ಭವೇನ್ಮುಕ್ತಿಃ

ವಿಪರೀತೇ ತು ಸಂಸೃತಿಃ || 17-52

#ಭಾವಸ್ಯ ಶುದ್ಧಿರಾಖ್ಯಾತಾ

ಶಿವೋಹಮಿತಿ ಯೋಜನಾ |

ವಿಪರೀತ ಸಮಾಯೋಗೇ

ಕುತೋ ದುಃಖ ನಿ ವರ್ತನಮ್ || 17-53

ಭೋಕ್ತಾ ಭೋಗ್ಯಂ ಭೋಜಯಿತಾ

ಸರ್ವಮೇತ ಚ್ಚರಾ ಚರಮ್ |

ಭಾವಯನ್ ಶಿವರೂಪೇಣ

ಶಿವೋ ಭವತಿ ವಸ್ತುತಃ || 17-54

#ಮಿಥ್ಯೇತಿ ಭಾವಯನ್ ವಿಶ್ವಮ್

ವಿಶ್ವಾತೀತಂ ಶಿವಂ ಸ್ಮರನ್ |

ಸತ್ತಾನಂದ ಚಿದಾಕಾರಮ್

ಕಥಂ ಬದ್ಧುಮಿಹಾರ್ಹತಿ || 17-55

ಸರ್ವಂ ಕರ್ಮಾರ್ಚನಂ ಶಂಭೋಃ

ವಚನಂ ತಸ್ಯ ಕೀರ್ತನಮ್ |

ಇತಿ ಭಾವಯತೋ ನಿತ್ಯಮ್

ಕಥಂ ಸ್ಯಾತ್ ಕರ್ಮಬಂಧನಮ್ |17-56

#ಸರ್ವೆಂದ್ರಿಯಗತಂ ಸೌಖ್ಯಮ್

ದುಃಖಂ ವಾ ಕರ್ಮಸಂಭವಮ್ |

ಶಿವಾರ್ಥಂ ಭಾವಯನ್ ಯೋಗೀ

ಜೀವನ್ಮುಕ್ತೋ ಭವಿಷ್ಯತಿ || 17-57

ಇತಿ ಭಾವಾರ್ಪಿತಸ್ಥಲಂ

--------------------------------------------------

ಅಥ ಶಿಷ್ಯಸ್ಥಲಮ್

ಶಾಸನೀಯೋ ಭವೇದ್ಯಸ್ತು

ಪರಕಾಯೇನ ಸರ್ವದಾ |

ತತ್ಪ್ರಸಾದಾತ್ತು ಮೋಕ್ಷಾರ್ಥಿ

ಸ ಶಿಷ್ಯ ಇತಿ ಕೀರ್ತಿತಃ || 17-58

#ಭಾವೋ ಯಸ್ಯ ಸ್ಥಿರೋ ನಿತ್ಯಮ್

ಮನೋವಾಕ್ಕಾಯಕರ್ಮಭಿಃ |

ಗುರೌ ನಿಜೇ ಗುಣೋದಾರೇ

ಸ ಶಿಷ್ಯ ಇತಿ ಗೀಯತೇ || 17-59

ಶಾಂತೋ ದಾಂತಸ್ತಪಶ್ಶೀಲಃ

ಸತ್ಯವಾಕ್ಸಮದರ್ಶನಃ |

ಗುರೌ ಶಿವೇ ಸಮಾನಸ್ಥಃ

ಸ ಶಿಷ್ಯಾಣಾಮಿಹೋತ್ತಮಃ || 17-60

#ಗುರುಮೇವ ಶಿವಂ ಪಶ್ಯೇತ್

ಶಿವಮೇವ ಗುರುಂ ತಥಾ |

ನೈತಯೋರಂತರಂ ಕಿಂಚಿತ್

ವಿಜಾನೀಯಾದ್ವಿಚಕ್ಷಣಃ || 17-61

ಶಿವಾಚಾರೇ ಶಿವಧ್ಯಾನೇ

ಶಿವಜ್ಞಾನೇ ಚ ನಿರ್ಮಲೇ |

ಗುರೋರಾದೇಶಮಾತ್ರೇಣ

ಪರಾಂ ನಿಷ್ಠಾಮವಾಪ್ನುಯಾತ್ || 17-62

#ಬ್ರಹ್ಮಾಂಡಬುದ್ಬುದೋದ್ಭೂತಮ್

ಮಾಯಾಸಿಂಧುಂ ಮಹತ್ತರಮ್ |

ಗುರೋಃ ಕವಲಯತ್ಯಾಶು

ಕಟಾಕ್ಷವಡವಾನಲಃ || 17-63

ಗುರೋಃ ಕಟಾಕ್ಷವೇಧೇನ

ಶಿವೋ ಭವತಿ ಮಾನವಃ |

ರಸವೇಧಾದ್ ಯಥಾ ಲೋಹೋ

ಹೇಮತಾಂ ಪ್ರತಿಪದ್ಯತೇ || 17-64

#ನ ಲಂಘಯೇದ್ ಗುರೋರಾಜ್ಞಾಮ್

ಜ್ಞಾನಮೇವ ಪ್ರಕಾಶಯನ್ |

ಶಿವಾಸಕ್ತೇನ ಮನಸಾ

ಸರ್ವಸಿದ್ಧಿಮವಾಪ್ನುಯಾತ್ || 17-65

ಶಿವಾದನ್ಯಜ್ಜಗನ್ಮಿಥ್ಯಾ

ಶಿವಃ ಸಂವಿತ್ಸ್ವರೂಪಕಃ |

ಶಿವಸ್ತ್ವಮಿತಿ ನಿರ್ದಿಷ್ಟೋ

ಗುರುಣಾ ಮುಕ್ತ ಏವ ಸಃ || 17-66

#ಗುರೋರ್ಲದ್ಭಾವ ಮಹಾಜ್ಞಾನಮ್

ಸಂಸಾರಾಮಯಭೇಷಜಮ್ |

ಮೋದತೇ ಯಃ ಸುಖೀ ಶಾಂತಃ

ಸ ಜೀವನ್ಮುಕ್ತ ಏವ ಹಿ || 17-67

ಇತಿ ಶಿಷ್ಯಸ್ಥಲಂ

-----------------------------

ಅಥ ಶುಶ್ರೂಷುಸ್ಥಲಮ್

ಬೋಧ್ಯಮಾನಃ ಸ ಗುರುಣಾ

ಪರಕಾಯೇನ ಸರ್ವದಾ |

ತಚ್ಛುಶ್ರೂಷಾರತಃ ಶಿಷ್ಯಃ

ಶುಶ್ರೂಷುರಿತಿ ಕೀತ್ರ್ಯತೇ || 17-68

#ಕಿಂ ಸತ್ಯಂ ಕಿಂ ನು ವಾಸತ್ಯಮ್

ಕ ಆತ್ಮಾ ಕಃ ಪರಃ ಶಿವಃ |

ಇತಿ ಶ್ರವಣಸಂಸಕ್ತೋ

ಗುರೋಃ ಶಿಷ್ಯೋ ವಿಶಿಷ್ಯತೇ || 17-69

ಶ್ರುತ್ವಾ ಶ್ರುತ್ವಾ ಗುರೋರ್ವಾಕ್ಯಮ್

ಶಿವಸಾಕ್ಷಾತ್ಕ್ರಿಯಾವಹಮ್ |

ಉಪಶಾಮ್ಯತಿ ಯಃ ಸ್ವಾಂತೇ

ಸ ಮುಕ್ತಿಪದಮಾಪ್ನುಯಾತ್ || 17-70

#ನ ಬುದ್ಧ್ಯತಿ ಗುರೋರ್ವಾಕ್ಯಮ್

ವಿನಾ ಶಿಷ್ಯಸ್ಯ ಮಾನಸಮ್ |

ತೇಜೋ ವಿನಾ ಸಹಸ್ರಾಂಶೋಃ

ಕಥಂ ಸ್ಫುರತಿ ಪಂಕಜಮ್ || 17-71

ಸೂರ್ಯಸ್ಯೋದಯಮಾತ್ರೇಣ

ಸೂರ್ಯಕಾಂತಃ ಪ್ರಕಾಶತೇ |

ಗುರೋರಾಲೋಕಮಾತ್ರೇಣ

ಶಿಷ್ಯೋ ಬೋಧೇನ ಭಾಸತೇ || 17-72

#ಅದ್ವೈತ ಪರಮಾನಂದ-

ಪ್ರಬೋಧೈಕ ಪ್ರಕಾಶಕಮ್ |

ಉಪಾಯಂ ಶ್ರುಣುಯಾಚ್ಛಿಷ್ಯಃ

ಸದ್ಗುರುಂ ಪ್ರಾಪ್ಯ ಸಾಂಜಲಿಃ || 17-73

ಕಿಂ ತತ್ತ್ವಂ ಪರಮಂ ಜ್ಞೇಯಮ್

ಕೇನ ಸರ್ವೆ ಪ್ರತಿಷ್ಠಿತಾಃ |

ಕಸ್ಯ ಸಾಕ್ಷಾತ್ಕ್ರಿಯಾ ಮುಕ್ತಿಃ

ಕಥಯೇತಿ ಸಮಾಸತಃ || 17-74

#ಇತಿ ಪ್ರಶ್ನೇ ಕೃತೇ ಪೂರ್ವಮ್

ಶಿಷ್ಯೇಣ ನಿಯತಾತ್ಮನಾ |

ಬ್ರೂಯಾತ್ ತತ್ತ್ವಂ ಗುರುಸ್ತಸ್ಮೈ

ಯೇನ ಸ್ಯಾತ್ ಸಂಸೃತೇರ್ಲಯಃ || 17-75

ಶಿವ ಏವ ಪರಂ ತತ್ತ್ವಮ್

ಚಿದಾನಂದಸದಾಕೃತಿಃ |

ಸ ಯಥಾರ್ಥಸ್ತದನ್ಯಸ್ಯ

ಜಗತೋ ನಾಸ್ತಿ ನಿತ್ಯತಾ || 17-76

#ಅಯಥಾರ್ಥಪ್ರಪಂಚೋಯಮ್

ಪ್ರತಿತಿಷ್ಠತಿ ಶಂಕರೇ |

ಸದಾತ್ಮನಿ ಯಥಾ ಶುಕ್ತೌ

ರಜತತ್ವಂ ವ್ಯವಸ್ಥಿತಮ್ || 17-77

ಶಿವೋಹಮಿತಿ ಭಾವೇನ

ಶಿವೇ ಸಾಕ್ಷಾತ್ಕೃತೇ ಸ್ಥಿರಮ್ |

ಮುಕ್ತೋ ಭವತಿ ಸಂಸಾರಾತ್

ಮೋಹಗ್ರಂಥೇರ್ವಿಭೇದತಃ ||17-78

#ಶಿವಂ ಭಾವಯ ಚಾತ್ಮಾನಮ್

ಶಿವಾದನ್ಯಂ ನ ಚಿಂತಯ |

ಏವಂ ಸ್ಥಿರೇ ಶಿವಾದ್ವೈತೇ

ಜೀವನ್ಮುಕ್ತೋ ಭವಿಷ್ಯಸಿ || 17-79

ಏವಂ ಪ್ರಚೋದಿತಃ ಶಿಷ್ಯೋ

ಗುರುಣಾ ಗುಣಶಾಲಿನಾ |

ಶಿವಮೇವ ಜಗತ್ ಪಶ್ಯನ್

ಜೀವನ್ಮುಕ್ತೋಭಿಜಾಯತೇ || 17-80

ಇತಿ ಶುಶ್ರೂಷುಸ್ಥಲಂ

--------------------------------

ಅಥ ಸೇವ್ಯಸ್ಥಲಮ್

ಗುರುವಾಕ್ಯಾಮೃತಾಸ್ವಾದಾತ್

ಪ್ರಾಪ್ತಬೋಧಮಹಾಫಲಃ |

ಶುಶ್ರೂಷುರೇವ ಸರ್ವೆಷಾಮ್

ಸೇವ್ಯತ್ವಾತ್ ಸೇವ್ಯ ಉಚ್ಯತೇ || 17-81

#ಗುರೂಪದಿಷ್ಟೇ ವಿಜ್ಞಾನೇ

ಚೇತಸಿ ಸ್ಥಿರತಾಂ ಗತೇ |

ಸಾಕ್ಷಾತ್ಕೃತಶಿವಃ ಶಿಷ್ಯೋ

ಗುರುವತ್ ಪೂಜ್ಯತೇ ಸದಾ || 17-82

ಜ್ಞಾನಾದಾಧಿಕ್ಯಸಂಪತ್ತಿಃ

ಗುರೋರ್ಯಸ್ಮಾದುಪಸ್ಥಿತಾ |

ತಸ್ಮಾಜ್ಜ್ಞಾನಾಗಮಾಚ್ಛಿಷ್ಯೋ

ಗುರುವತ್ ಪೂಜ್ಯತಾಂ ವ್ರಜೇತ್|17-83

#ಶಿವೋಹಮಿತಿ ಭಾವಸ್ಯ

ನೈರಂತರ್ಯಾದ್ ವಿಶೇಷತಃ |

ಶಿವಭಾವೇ ಸಮುತ್ಪ್ಪನ್ನೇ

ಶಿವವತ್ ಪೂಜ್ಯ ಏವ ಸಃ || 17-84

ವಿಷಯಾಸಕ್ತಚಿತ್ತೋಪಿ

ವಿಷಯಾಸಂಗವಜರ್ಿತಃ |

ಶಿವಭಾವಯುತೋ ಯೋಗೀ

ಸೇವ್ಯಃ ಶಿವ ಇವಾಪರಃ || 17-85

#ಮುಕ್ತಃ ಸಂಶಯಪಾಶತಃ

ಸ್ಥಿರಮನಾ ಬೋಧೇ ಚ ಮುಕ್ತಿಪ್ರದೇ

ಮೋಹಂ ದೇಹಭೃತಾಂ ದೃಶಾ

ವಿಘಟಯನ್ ಮೂಲಂ ಮಹಾಸಂಸೃತೇಃ|

ಸತ್ತಾನಂದಚಿದಾತ್ಮಕೇ ನಿರುಪಮೇ

ಶೈವೇ ಪರಸ್ಮಿನ್ ಪದೇ

ಲೀನಾತ್ಮಾ ಕ್ಷಯಿತಪ್ರಪಂಚವಿಭವೋ

ಯೋಗೀ ಜನೈಃ ಸೇವ್ಯತೇ||17-86

ಇತಿ ಸೇವ್ಯಸ್ಥಲಂ ಪರಿಸಮಾಪ್ತಂ

ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು

ಶಿವಾದ್ವೈತವಿದ್ಯಾಯಾಂ ಶಿವಯೋಗಶಾಸ್ತ್ರೇ

ಶ್ರೀರೇಣುಕಾಗಸ್ತ್ಯಸಂವಾದೇ ವೀರಶೈವಧರ್ಮನಿರ್ಣಯೇ

ಶ್ರೀ ಶಿವಯೋಗಿಶಿವಾಚಾರ್ಯವಿರಚಿತೇ

ಶ್ರೀ ಸಿದ್ಧಾಂತಶಿಖಾಮಣೌ

ಲಿಂಗಸ್ಥಲಾಂತರ್ಗತ ಪ್ರಸಾದಿಸ್ಥಲೇ

ಕಾಯಾನುಗ್ರಹಾದಿನವವಿಧಸ್ಥಲಪ್ರಸಂಗೋ ನಾಮ

ಸಪ್ತದಶಃ ಪರಿಚ್ಛೇದಃ ||