ತ್ರಯೋದಶಃ ಪರಿಚ್ಛೇದಃ

ಶರಣಸ್ಯ ಚತುರ್ವಿಧ ಸ್ಥಲ ಪ್ರಸಂಗಃ -ಶರಣಸ್ಥಲಮ್

|| ಅಗಸ್ತ್ಯ ಉವಾಚ ||

ಮಾಹೇಶ್ವರಃ ಪ್ರಸಾದೀತಿ

ಪ್ರಾಣಲಿಂಗೀತಿ ಬೋಧಿತಃ |

ಕಥಮೇಷ ಸಮಾದಿಷ್ಟಃ

ಪುನಃ ಶರಣಸಂಜ್ಞಕಃ || 13-1

|| ಶ್ರೀ ರೇಣುಕ ಉವಾಚ ||

#ಅಂಗಲಿಂಗೀ ಜ್ಞಾನರೂಪಃ

ಸತೀ ಜ್ಞೇಯಃ ಶಿವಃ ಪತಿಃ |

ಯತ್ಸೌಖ್ಯಂ ತತ್ಸಮಾವೇಶೇ

ತದ್ವಾನ್ ಶರಣನಾಮವಾನ್ || 13-2

ಸ್ಥಲಮೇತತ್ಸಮಾಖ್ಯಾತಮ್

ಚತುರ್ಧಾ ಧರ್ಮಭೇದತಃ |

ಆದೌ ಶರಣಮಾಖ್ಯಾತಮ್

ತತಸ್ತಾಮ ಸವರ್ಜನಮ್ || 13-3

#ತತೋ ನಿರ್ದೆಶಮುದ್ದಿಷ್ಟಮ್

ಶೀಲಸಂಪಾದನಂ ತತಃ |

ಕ್ರಮಾಲ್ಲಕ್ಷಣಮೇತೇಷಾಮ್

ಕಥಯಾಮಿ ನಿಶಮ್ಯತಾಮ್ || 13-4

ಅಥ ಶರಣಸ್ಥಲಮ್

ಸತೀವ ರಮಣೇ ಯಸ್ತು

ಶಿವೇ ಶಕ್ತಿಂ ವಿಭಾವಯನ್ |

ತದನ್ಯ ವಿಮುಖಃ ಸೋಯಮ್

ಜ್ಞಾತಃ ಶರಣನಾಮವಾನ್ || 13-5

#ಪರಿಜ್ಞಾತೇ ಶಿವೇ ಸಾಕ್ಷಾತ್

ಕೋ ವಾನ್ಯಮಭಿಕಾಂಕ್ಷತಿ |

ನಿಧಾನೇ ಮಹತಿ ಪ್ರಾಪ್ತೇ

ಕಃ ಕಾಚಂ ಯಾಚತೇನ್ಯತಃ || 13-6

ಶಿವಾನಂದಂ ಸಮಾಸಾದ್ಯ

ಕೋ ವಾನ್ಯಮುಪತಿಷ್ಠತೇ |

ಗಂಗಾಮೃತಂ ಪರಿತ್ಯಜ್ಯ

ಕಃ ಕಾಂಕ್ಷೇನ್ಮೃಗತೃಷ್ಣಿಕಾಮ್ || 13-7

#ಸಂಸಾರತಿಮಿರಚ್ಛೇದೇ

ವಿನಾ ಶಂಕರಭಾಸ್ಕರಮ್ |

ಪ್ರಭವಂತಿ ಕಥಂ ದೇವಾಃ

ಖದ್ಯೋತಾ ಇವ ದೇಹಿನಾಮ್ || 13-8

ಸಂಸಾರಾರ್ತಃ ಶಿವಂ ಯಾಯಾದ್

ಬ್ರಹ್ಮಾದ್ಯೈಃ ಕಿಂ ಫಲಂ ಸುರೈಃ |

ಚಕೋರಸ್ತೃಷಿತಃ ಪಶ್ಯೇತ್

ಚಂದ್ರಂ ಕಿಂ ತಾರಕಾ ಅಪಿ || 13-9

#ಶಿವ ಏವ ಸಮಸ್ತಾನಾಮ್

ಶರಣ್ಯಃ ಶರಣಾರ್ಥಿನಾಮ್ |

ಸಂಸಾರೋಗ ದಷ್ಟಾನಾಮ್

ಸರ್ವಜ್ಞಃ ಸರ್ವದೋಷಹಾ || 13-10

ಶಿವಜ್ಞಾನೇ ಸಮುತ್ಪನ್ನೇ

ಪರಾನಂದಃ ಪ್ರಕಾಶತೇ |

ತದಾಸಕ್ತಮನಾ ಯೋಗೀ

ನಾನ್ಯತ್ರ ರಮತೇ ಸುಧೀಃ || 13-11

#ತಸ್ಮಾತ್ ಸರ್ವಪ್ರಯತ್ನೇನ

ಶಂಕರಂ ಶರಣಂ ಗತಃ |

ತದನಂತ ಸುಖಂ ಪ್ರಾಪ್ಯ

ಮೋದತೇ ನಾನ್ಯಚಿಂತಯಾ || 13-12

ಇತಿ ಶರಣಸ್ಥಲಂ

----------------------

ಅಥ ತಾಮಸನಿರಸನಸ್ಥಲಮ್

ಶಿವಾಸಕ್ತ ಪರಾನಂದ-

ಮೋದಿನಾ ಗುರುಣಾ ಯತಃ |

ನಿರಸ್ಯಂತೇ ತಮೋಭಾವಾಃ

ಸ ತಾಮಸ ನಿರಾಸಕಃ || 13-13

#ಯಸ್ಯ ಜ್ಞಾನಂ ತಮೋಮಿಶ್ರಮ್

ನ ತಸ್ಯ ಗತಿರಿಷ್ಯತೇ |

ಸತ್ತ್ವಂ ಹಿ ಜ್ಞಾನಯೋಗಸ್ಯ

ನೈರ್ಮಲ್ಯಂ ವಿದುರುತ್ತಮಾಃ || 13-14

ಶಮೋ ದಮೋ ವಿವೇಕಶ್ಚ

ವೈರಾಗ್ಯಂ ಪೂರ್ಣಭಾವನಾ |

ಕ್ಷಾಂತಿಃ ಕಾರುಣ್ಯಸಂಪತ್ತಿಃ

ಶ್ರದ್ಧಾ ಸತ್ಯಸಮುದ್ಭವಾ || 13-15

#ಶಿವಭಕ್ತಿಃ ಪರೋ ಧರ್ಮಃ

ಶಿವಜ್ಞಾನಸ್ಯ ಬಾಂಧವಾಃ |

ಏತೈರ್ಯುಕ್ತೋ ಮಹಾಯೋಗೀ

ಸಾತ್ತ್ವಿಕಃ ಪರಿಕೀರ್ತಿತಃ || 13-16

ಕಾಮಕ್ರೋಧ ಮಹಾಮೋಹ-

ಮದ ಮಾತ್ಸರ್ಯ ವಾರಣಾಃ |

ಶಿವಜ್ಞಾನ ಮೃಗೇಂದ್ರಸ್ಯ

ಕಥಂ ತಿಷ್ಠಂತಿ ಸನ್ನಿಧೌ || 13-17

#ಯತ್ರ ಕುತ್ರಾಪಿ ವಾ ದ್ವೇಷ್ಟಿ

ಪ್ರಪಂಚೇ ಶಿವರೂಪಿಣಿ |

ಶಿವದ್ವೇಷೀ ಸ ವಿಜ್ಞೇಯೋ

ರಜಸಾವಿಷ್ಟ ಮಾನಸಃ || 13-18

ಯೋ ದ್ವೇಷ್ಟಿ ಸಕಲಾನ್ ಲೋಕಾನ್

ಯೋ ವಾಹಂಕುರುತೇ ಸದಾ |

ಯೋ ಸತ್ಯಭಾವನಾ ಯುಕ್ತಃ

ಸ ತಾಮಸ ಇತಿ ಸ್ಮೃತಃ || 13-19

#ತಮೋ ಮೂಲಾ ಹಿ ಸಂಜಾತಾ

ರಾಗ ದ್ವೇಷಾದಿ ಪಾದಪಾಃ |

ಶಿವಜ್ಞಾನ ಕುಠಾರೇಣ

ಛೇದ್ಯಂತೇ ಹಿ ನಿರಂತರಮ್ || 13-20

ಶಿವಜ್ಞಾನೇ ಸಮುತ್ಪನ್ನೇ

ಸಹಸ್ರಾದಿತ್ಯ ಸನ್ನಿಭೇ |

ಕುತಸ್ತ ಮೋವಿಕಾರಾಸ್ಯುಃ

ಮಹತಾಂ ಶಿವಯೋಗಿನಾಮ್ || 13-21

ಇತಿ ತಾಮಸ ನಿರಸನ ಸ್ಥಲಂ

---------------------------

ಅಥ ನಿರ್ದೆಶಸ್ಥಲಮ್

ನಿರಾಕೃತ್ಯ ತಮೋಭಾಗಮ್

ಸಂಸಾರಸ್ಯ ಪ್ರವರ್ತಕಮ್ |

ನಿರ್ದಿಶ್ಯತೇ ತು ಯಜ್ಜ್ಞಾನಮ್

ಸ ನಿರ್ದೆಶ ಇತಿ ಸ್ಮೃತಃ | 13-22

#ಗುರುರೇವ ಪರಂ ತತ್ತ್ವಮ್

ಪ್ರಕಾಶಯತಿ ದೇಹಿನಾಮ್ |

ಕೋ ವಾ ಸೂರ್ಯಂ ವಿನಾ ಲೋಕೇ

ತಮಸೋ ವಿನಿವರ್ತಕಃ || 13-23

ಅಂತರೇಣ ಗುರುಂ ಸಿದ್ಧಮ್

ಕಥಂ ಸಂಸಾರ ನಿಷ್ಕೃತಿಃ |

ನಿದಾನಜ್ಞಂ ವಿನಾ ವೈದ್ಯಮ್

ಕಿಂ ವಾ ರೋಗೋ ನಿವರ್ತತೇ ||13-24

#ಅಜ್ಞಾನಮಲಿನಂ ಚಿತ್ತ-

ದರ್ಪಣಂ ಯೋ ವಿಶೋಧಯೇತ್ |

ಪ್ರಜ್ಞಾ ವಿಭೂತಿ ಯೋಗೇನ

ತಮಾಹುರ್ ಗುರುಸತ್ತಮಮ್ || 13-25

ಅಪರೋಕ್ಷಿತ ತತ್ತ್ವಸ್ಯ

ಜೀವನ್ಮುಕ್ತ ಸ್ವಭಾವಿನಃ |

ಗುರೋಃ ಕಟಾಕ್ಷೇ ಸಂಸಿದ್ಧೇ

ಕೋವಾಲೋಕೇಷು ದುರ್ಲಭಃ || 13-26

#ಕೈವಲ್ಯ ಕಲ್ಪತರವೋ

ಗುರವಃ ಕರುಣಾಲಯಾಃ |

ದುರ್ಲಭಾ ಹಿ ಜಗತ್ಯಸ್ಮಿನ್

ಶಿವಾದ್ವೈತ ಪರಾಯಣಾಃ || 13-27

ಕ್ಷೀರಾಬ್ಧಿರಿವ ಸಿಂಧೂನಾಮ್

ಸುಮೇರುರಿವ ಭೂಭೃತಾಮ್ |

ಗ್ರಹಾಣಾಮಿವ ತಿಗ್ಮಾಂಶುಃ

ಮಣೀನಾಮಿವ ಕೌಸ್ತುಭಃ || 13-28

#ದ್ರುಮಾಣಾಮಿವ ಭದ್ರಶ್ರೀಃ

ದೇವಾನಾಮಿವ ಶಂಕರಃ |

ಗುರುಃ ಶಿವಃ ಪರಃ ಶ್ಲಾಘ್ಯೋ

ಗುರೂಣಾಂ ಪ್ರಾಕೃತಾತ್ಮನಾಮ್ || 13-29

ಇತಿ ನಿರ್ದೆಶಸ್ಥಲಂ

------------------------

ಅಥ ಶೀಲ ಸಂಪಾದನಸ್ಥಲಮ್

ಜಿಜ್ಞಾಸಾ ಶಿವತತ್ತ್ವಸ್ಯ

ಶೀಲಮಿತ್ಯುಚ್ಯತೇ ಬುಧೈಃ |

ನಿರ್ದೆಶ್ಯಯೋಗಾ ದಾರ್ಯಾಣಾಮ್

ತದ್ವಾನ್ ಶೀಲೀತಿ ಕಥ್ಯತೇ || 13-30

#ಪ್ರಪನ್ನಾರ್ತಿಹರೇ ದೇವೇ

ಪರಮಾತ್ಮ ನಿ ಶಂಕರೇ |

ಭಾವಸ್ಯ ಸ್ಥಿರತಾಯೋಗಃ

ಶೀಲಮಿತ್ಯುಚ್ಯತೇ ಬುಧೈಃ || 13-31

ಶೀಲಂ ಶಿವೈಕವಿಜ್ಞಾನಮ್

ಶಿವಧ್ಯಾನೈಕ ತಾನತಾ |

ಶಿವಪ್ರಾಪ್ತಿ ಸಮುತ್ಕಂಠಾ

ತದ್ಯೋಗೀ ಶೀಲವಾನ್ ಸ್ಮೃತಃ || 13-32

#ಶಿವಾದನ್ಯತ್ರ ವಿಜ್ಞಾನೇ

ವೈಮುಖ್ಯಂ ಯಸ್ಯ ಸುಸ್ಥಿರಮ್ |

ತದಾಸಕ್ತ ಮನೋವೃತ್ತಿಃ

ತಮಾಹುಃ ಶೀಲಭಾಜನಮ್ || 13-33

ಪತಿವ್ರತಾಯಾ ಯಚ್ಛೀಲಮ್

ಪತಿರಾಗಾತ್ ಪ್ರಶಸ್ಯತೇ |

ತಥಾ ಶಿವಾನುರಾಗೇಣ

ಸುಶೀಲೋಭಕ್ತ ಉಚ್ಯತೇ || 13-34

#ಪತಿಂ ವಿನಾ ಯಥಾ ಸ್ತ್ರೀಣಾಮ್

ಸೇವಾನ್ಯಸ್ಯ ತು ಗರ್ಹಣಾ |

ಶಿವಂ ವಿನಾ ತಥಾನ್ಯೇಷಾಮ್

ಸೇವಾ ನಿಂದ್ಯಾ ಕೃತಾತ್ಮನಾಮ್ || 13-35

ಬಹುನಾತ್ರ ಕಿಮುಕ್ತೇನ

ಶಿವಜ್ಞಾನೈಕ ನಿಷ್ಠತಾ |

ಶೀಲಮಿತ್ಯುಚ್ಯತೇ ಸದ್ಭಿಃ

ಶೀಲವಾಂಸ್ತತ್ಪರೋ ಮತಃ || 13-36

#ಶಿವಾತ್ಮಬೋಧೈಕ ರತಃ ಸ್ಥಿರಾಶಯಃ

ಶಿವಂ ಪ್ರಪನ್ನೋ ಜಗತಾಮಧೀಶಮ್ |

ಶಿವೈಕ ನಿಷ್ಠಾಹಿತ ಶೀಲಭೂಷಣಃ

ಶಿವೈಕ್ಯವಾನೇಷ ಹಿ ಕಥ್ಯತೇ ಬುಧೈಃ-37

ಇತಿ ಶೀಲಸಂಪಾದನ ಸ್ಥಲಂ

ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು ಶಿವಾದ್ವೈತವಿದ್ಯಾಯಾಂ

ಶಿವಯೋಗಶಾಸ್ತ್ರೇ ಶ್ರೀರೇಣುಕಾಗಸ್ತ್ಯಸಂವಾದೇ ವೀರಶೈವಧರ್ಮನಿರ್ಣಯೇ

ಶ್ರೀಶಿವಯೋಗಿಶಿವಾಚಾರ್ಯವಿರಚಿತೇ ಶ್ರೀಸಿದ್ಧಾಂತಶಿಖಾಮಣೌ

ಶರಣಸ್ಥಲೇ ಶರಣಸ್ಥಲಾದಿಚತುರ್ವಿಧಸ್ಥಲ ಪ್ರಸಂಗೋ ನಾಮ

ತ್ರಯೋದಶಃ ಪರಿಚ್ಛೇದಃ ||