ಉಕ್ತೋ ಮಾಹೇಶ್ವರಃ ಸಾಕ್ಷಾತ್

ಲಿಂಗನಿಷ್ಠಾದಿಧರ್ಮವಾನ್ |

ಕಥಮೇಷ ಪ್ರಸಾದೀತಿ

ಕಥ್ಯತೇ ಗಣನಾಯಕ || 11-1

|| ಶ್ರೀ ರೇಣುಕ ಉವಾಚ ||

ಲಿಂಗನಿಷ್ಠಾದಿ ಭಾವೇನ

ಧ್ವಸ್ತಪಾಪ ನಿಬಂಧನಃ |

ಮನಃ ಪ್ರಸಾದ ಯೋಗೇನ

ಪ್ರಸಾದೀತ್ಯೇಷ ಕಥ್ಯತೇ || 11-2

ಪ್ರಸಾದಿ ಸ್ಥಲ ಮಿತ್ಯೇತತ್

ಅಸ್ಯ ಮಾಹಾತ್ಮ್ಯಬೋಧಕಮ್ |

ಅಂತರ ಸ್ಥಲ ಭೇದೇನ

ಸಪ್ತಧಾ ಪರಿಕೀರ್ತಿತಮ್ || 11-3

ಪ್ರಸಾದಿ ಸ್ಥಲ ಮಾದೌ ತು

ಗುರು ಮಾಹಾತ್ಮ್ಯಕಂ ತತಃ |

ತತೋ ಲಿಂಗ ಪ್ರಶಂಸಾ ಚ

ತತೋ ಜಂಗಮ ಗೌರವಮ್ || 11-4

ತತೋ ಭಕ್ತಸ್ಯ ಮಾಹಾತ್ಮ್ಯಮ್

ತತಃ ಶರಣಕೀರ್ತನಮ್ |

ಶಿವಪ್ರಸಾದ ಮಾಹಾತ್ಮ್ಯಮ್

ಇತಿ ಸಪ್ತ ಪ್ರಕಾರಕಮ್ |

ಕ್ರಮಾಲ್ಲಕ್ಷಣ ಮೇತೇಷಾಮ್

ಕಥಯಾಮಿ ಮಹಾ ಮುನೇ || 11-5

ಅಥ ಪ್ರಸಾದಿ ಸ್ಥಲಮ್

ನೈರ್ಮಲ್ಯಂ ಮನಸೋ ಲಿಂಗಮ್

ಪ್ರಸಾದ ಇತಿ ಕಥ್ಯತೇ |

ಶಿವಸ್ಯ ಲಿಂಗರೂಪಸ್ಯ

ಪ್ರಸಾದಾದೇವ ಸಿದ್ಧ್ಯತಿ || 11-6

ಶಿವ ಪ್ರಸಾದಂ ಯದ್ದ್ರವ್ಯಮ್

ಶಿವಾಯ ವಿನಿವೇದಿತಮ್ |

ನಿರ್ಮಾಲ್ಯಂ ತತ್ತು ಶೈವಾನಾಮ್

ಮನೋ ನೈರ್ಮಲ್ಯ ಕಾರಣಮ್ || 11-7

ಮನಃ ಪ್ರಸಾದ ಸಿದ್ಧ್ಯರ್ಥಮ್

ನಿರ್ಮಲ ಜ್ಞಾನ ಕಾರಣಮ್ |

ಶಿವ ಪ್ರಸಾದಂ ಸ್ವೀಕುರ್ವನ್

ಪ್ರಸಾದೀತ್ಯೇಷ ಕಥ್ಯತೇ || 11-8

ಅನ್ನಶುದ್ಧ್ಯಾ ಹಿ ಸರ್ವೆಷಾಮ್

ತತ್ತ್ವಶುದ್ಧಿ ರುದಾಹೃತಾ |

ವಿಶುದ್ಧ ಮನ್ನಜಾತಂ ಹಿ

ಯಚ್ಛಿವಾಯ ಸಮರ್ಪಿತಮ್ || 11-9

ತದೇವ ಸರ್ವಕಾಲಂ ತು

ಭುಂಜಾನೋ ಲಿಂಗತತ್ಪರಃ |

ಮನಃಪ್ರಸಾದಮತುಲಮ್

ಲಭತೇ ಜ್ಞಾನಕಾರಣಮ್ || 11-10

ಆತ್ಮಭೋಗಾಯ ನಿಯತಮ್

ಯದ್ಯದ್ ದ್ರವ್ಯಂ ಸಮಾಹಿತಮ್ |

ತತ್ತತ್ ಸಮಪ್ರ್ಯ ದೇವಾಯ

ಭುಂಜೀತಾತ್ಮ ವಿಶುದ್ಧಯೇ || 11-11

ನಿತ್ಯ ಸಿದ್ಧೇನ ದೇವೇನ

ಭಿಷಜಾ ಜನ್ಮರೋಗಿಣಾಮ್ |

ಯದ್ಯತ್ ಪ್ರಸಾದಿತಂ ಭುಕ್ತ್ವಾ

ತತ್ತಜ್ಜನ್ಮ ರಸಾಯನಮ್ || 11-12

ಆರೋಗ್ಯಕಾರಣಂ ಪುಂಸಾಮ್

ಅಂತಃಕರಣಶುದ್ಧಿದಮ್ |

ತಾಪತ್ರಯಮಹಾರೋಗ-

ಸಮುದ್ಧರಣಭೇಷಜಮ್ || 11-13

ವಿದ್ಯಾವೈಶದ್ಯಕರಣಮ್

ವಿನಿಪಾತ ವಿಘಾತನಮ್ |

ದ್ವಾರಂ ಜ್ಞಾನಾವತಾರಸ್ಯ

ಮೋಹಚ್ಛೇದಸ್ಯ ಕಾರಣಮ್ || 11-14

ವೈರಾಗ್ಯ ಸಂಪದೋ ಮೂಲಮ್

ಮಹಾನಂದಪ್ರವರ್ಧನಮ್ |

ದುರ್ಲಭಂ ಪಾಪಚಿತ್ತಾನಾಮ್

ಸುಲಭಂ ಶುದ್ಧಕರ್ಮಣಾಮ್ || 11-15

ಆದೃತಂ ಬ್ರಹ್ಮವಿಷ್ಣ್ವಾದ್ಯೈಃ

ವಸಿಷ್ಠಾದ್ಯೈಶ್ಚ ತಾಪಸೈಃ |

ಶಿವಸ್ವೀಕೃತಮನ್ನಾದ್ಯಮ್

ಸ್ವೀಕಾರ್ಯಂ ಸಿದ್ಧಿಕಾಂಕ್ಷಿಭಿಃ || 11-16

ಪತ್ರಂ ಪುಷ್ಪಂ ಫಲಂ ತೋಯಮ್

ಯಚ್ಛಿವಾಯ ನಿವೇದಿತಮ್ |

ತತ್ತತ್ ಸ್ವೀಕಾರಯೋಗೇನ

ಸರ್ವಪಾಪ ಕ್ಷಯೋ ಭವೇತ್ || 11-17

ಯಥಾ ಶಿವಪ್ರಸಾದಾನ್ನಮ್

ಸ್ವೀಕಾರ್ಯಂ ಲಿಂಗ ತತ್ಪರೈಃ |

ತಥಾ ಗುರೋಃ ಪ್ರಸಾದಾನ್ನಮ್

ತಥೈವ ಶಿವಯೋಗಿನಾಮ್ || 11-18

ಇತಿ ಪ್ರಸಾದಿಸ್ಥಲಂ

ಅಥ ಗುರುಮಾಹಾತ್ಮ್ಯಸ್ಥಲಮ್

ಗುರುರೇವಾತ್ರ ಸರ್ವೆಷಾಮ್

ಕಾರಣಂ ಸಿದ್ಧಿಕರ್ಮಣಾಮ್ |

ಗುರುರೂಪೋ ಮಹಾದೇವೋ

ಯತಃ ಸಾಕ್ಷಾದುಪಸ್ಥಿತಃ || 11-19

ನಿಷ್ಕಲೋ ಹಿ ಮಹಾದೇವೋ

ನಿತ್ಯಜ್ಞಾನಮಹೋದಧಿಃ |

ಸಕಲೋ ಗುರುರೂಪೇಣ

ಸರ್ವಾನುಗ್ರಾಹಕೋ ಭವೇತ್ || 11-20

ಯಃ ಶಿವಃ ಸ ಗುರುರ್ಜ್ಞೆಯೋ

ಯೋ ಗುರುಃ ಸ ಶಿವಃ ಸ್ಮೃತಃ |

ನ ತಯೋರಂತರಂ ಕುರ್ಯಾದ್

ಜ್ಞಾನಾವಾಪ್ತೌ ಮಹಾಮತಿಃ || 11-21

ಹಸ್ತಪಾದಾದಿಸಾಮ್ಯೇನ

ನೇತರೈಃ ಸದೃಶಂ ವದೇತ್ |

ಆಚಾರ್ಯಂ ಜ್ಞಾನದಂ ಶುದ್ಧಮ್

ಶಿವರೂಪತಯಾ ಸ್ಥಿತಮ್ || 11-22

ಆಚಾರ್ಯಸ್ಯಾವಮಾನೇನ

ಶ್ರೇಯಃ ಪ್ರಾಪ್ತಿರ್ವಿಹನ್ಯತೇ |

ತಸ್ಮಾನ್ನಿಃಶ್ರೇಯಸಪ್ರಾಪ್ತ್ಯೈ

ಪೂಜಯೇತ್ ತಂ ಸಮಾಹಿತಃ || 11-23

ಗುರುಭಕ್ತಿವಿಹೀನಸ್ಯ

ಶಿವಭಕ್ತಿರ್ನ ಜಾಯತೇ |

ತತಃ ಶಿವೇ ಯಥಾ ಭಕ್ತಿಃ

ತಥಾ ಭಕ್ತಿರ್ಗುರಾವಪಿ || 11-24

ಇತಿ ಗುರುಮಾಹಾತ್ಮ್ಯಸ್ಥಲಂ

ಅಥ ಲಿಂಗಮಾಹಾತ್ಮ್ಯಸ್ಥಲಮ್

ಗುರು ಮಾಹಾತ್ಮ್ಯ ಯೋಗೇನ

ನಿಜ ಜ್ಞಾನಾತಿರೇಕತಃ |

ಲಿಂಗಸ್ಯಾಪಿ ಚ ಮಾಹಾತ್ಮ್ಯಮ್

ಸರ್ವೊತ್ಕೃಷ್ಟಂ ವಿಭಾವ್ಯತೇ || 11-25

ಶಿವಸ್ಯ ಬೋಧಲಿಂಗಂ ಯದ್

ಗುರು ಬೋಧಿತಚೇತಸಾ |

ತದೇವ ಲಿಂಗಂ ವಿಜ್ಞೇಯಮ್

ಶಾಂಕರಂ ಸರ್ವಕಾರಣಮ್ || 11-26

ಪರಂ ಪವಿತ್ರಮಮಲಮ್

ಲಿಂಗಂ ಬ್ರಹ್ಮ ಸನಾತನಮ್ |

ಶಿವಾಭಿಧಾನಂ ಚಿನ್ಮಾತ್ರಮ್

ಸದಾನಂದಂ ನಿರಂಕುಶಮ್ || 11-27

ಕಾರಣಂ ಸರ್ವ ಲೋಕಾನಾಮ್

ವೇದಾನಾಮಪಿ ಕಾರಣಮ್ |

ಪೂರಣಂ ಸರ್ವತತ್ತ್ವಸ್ಯ

ತಾರಣಂ ಜನ್ಮವಾರಿಧೇಃ || 11-28

ಜ್ಯೋತಿರ್ಮಯಮ ನಿರ್ದೆಶ್ಯಮ್

ಯೋಗಿನಾಮಾತ್ಮ ನಿ ಸ್ಥಿತಮ್ |

ಕಥಂ ವಿಜ್ಞಾಯತೇ ಲೋಕೇ

ಮಹಾಗುರುದಯಾಂ ವಿನಾ || 11-29

ಬ್ರಹ್ಮಣಾ ವಿಷ್ಣುನಾ ಪೂರ್ವಮ್

ಯಲ್ಲಿಂಗಂ ಜ್ಯೋತಿ ರಾತ್ಮಕಮ್ |

ಅಪರಿಚ್ಛೇದ್ಯಮಭವತ್

ಕೇನ ವಾ ಪರಿಚೋದ್ಯತೇ || 11-30

ಬಹುನಾತ್ರ ಕಿಮುಕ್ತೇನ

ಲಿಂಗಂ ಬ್ರಹ್ಮ ಸನಾತನಮ್ |

ಯೋಗಿನೋ ಯತ್ರ ಲೀಯಂತೇ

ಮುಕ್ತಪಾಶ ನಿಬಂಧನಾಃ || 11-31

ಪೀಠಿಕಾ ಪರಮಾ ಶಕ್ತಿಃ

ಲಿಂಗಂ ಸಾಕ್ಷಾತ್ ಪರಃ ಶಿವಃ |

ಶಿವಶಕ್ತಿ ಸಮಾಯೋಗಮ್

ವಿಶ್ವಂ ಲಿಂಗಂ ತದುಚ್ಯತೇ || 11-32

ಬ್ರಹ್ಮಾದಯಃ ಸುರಾಃ ಸರ್ವೆ

ಮುನಯಃ ಶೌನಕಾದಯಃ |

ಶಿವಲಿಂಗಾರ್ಚನಾ ದೇವ

ಸ್ವಂ ಸ್ವಂ ಪದಮವಾಪ್ನುಯುಃ || 11-33

ವಿಶ್ವಾಧಿಪತ್ವಮ್ ಈಶಸ್ಯ

ಲಿಂಗಮೂರ್ತೆಃ ಸ್ವಭಾವಜಮ್ |

ಅನನ್ಯದೇವ-ಸಾ-ದೃಶ್ಯಮ್

ಶ್ರುತಿರಾಹ ಸನಾತನೀ || 11-34

ಇತಿ ಲಿಂಗಮಾಹಾತ್ಮ್ಯ ಸ್ಥಲಂ

ಅಥ ಜಂಗಮ ಮಾಹಾತ್ಮ್ಯ ಸ್ಥಲಮ್

ಗುರುಶಿಷ್ಯ ಸಮಾರೂಢ-

ಲಿಂಗಮಾಹಾತ್ಮ್ಯ ಸಂಪದಃ |

ಸರ್ವಂ ಚಿದ್ರೂಪ ವಿಜ್ಞಾನಾತ್

ಜಂಗಮಾಧಿಕ್ಯ ಮುಚ್ಯತೇ || 11-35

ಜಾನಂತ್ಯತಿಶಯಾದ್ ಯೇ ತು

ಶಿವಂ ವಿಶ್ವಪ್ರಕಾಶಕಮ್ |

ಸ್ವಸ್ವರೂಪತಯಾ ತೇ ತು

ಜಂಗಮಾ ಇತಿ ಕೀರ್ತಿತಾಃ || 11-36

ಯೇ ಪಶ್ಯಂತಿ ಜಗಜ್ಜಾಲಮ್

ಚಿದ್ರೂಪಂ ಶಿವಯೋಗತಃ |

ನಿರ್ದೂತ ಮಲ ಸಂಸ್ಪರ್ಶಾಃ

ತೇ ಸ್ಮೃತಾಃ ಶಿವಯೋಗಿನಃ || 11-37

ಘೋರ ಸಂಸಾರ ತಿಮಿರ-

ಪರಿ ಧ್ವಂಸ ನ ಕಾರಣಮ್ |

ಯೇಷಾಮಸ್ತಿ ಶಿವಜ್ಞಾನಮ್

ತೇ ಮತಾಃ ಶಿವಯೋಗಿನಃ || 11-38

ಜಿತಕಾಮಾ ಜಿತಕ್ರೋಧಾ

ಮೋಹಗ್ರಂಥಿ ವಿಭೇದಿನಃ |

ಸಮಲೋಷ್ಟಾಶ್ಮ ಕನಕಾಃ

ಸಾಧವಃ ಶಿವಯೋಗಿನಃ || 11-39

ಸಮೌ ಶತ್ರೌ ಚ ಮಿತ್ರೇ ಚ

ಸಾಕ್ಷಾತ್ಕೃತಶಿವಾತ್ಮಕಾಃ |

ನಿಃಸ್ಪೃಹಾ ನಿರಹಂಕಾರಾ

ವರ್ತಂತೇ ಶಿವಯೋಗಿನಃ || 11-40

ದುರ್ಲಭಂ ಹಿ ಶಿವಜ್ಞಾನಮ್

ದುರ್ಲಭಂ ಶಿವಚಿಂತನಮ್ |

ಯೇಷಾಮೇತದ್ ದ್ವಯಂ ಚಾಸ್ತಿ

ತೇ ಹಿ ಸಾಕ್ಷಾಚ್ಛಿವಾತ್ಮಕಾಃ || 11-41

ಪಾದಾಗ್ರರೇಣವೋ ಯತ್ರ

ಪತಂತಿ ಶಿವಯೋಗಿನಾಮ್ |

ತದೇವ ಸದನಂ ಪುಣ್ಯಮ್

ಪಾವನಂ ಗೃಹ ಮೇಧಿನಾಮ್ || 11-42

ಸರ್ವಸಿದ್ಧಿಕರಂ ಪುಂಸಾಮ್

ದರ್ಶನಂ ಶಿವಯೋಗಿನಾಮ್ |

ಸ್ಪರ್ಶನಂ ಪಾಪ ಶಮನಮ್

ಪೂಜನಂ ಮುಕ್ತಿಸಾಧನಮ್ || 11-43

ಮಹತಾಂ ಶಿವತಾತ್ಪರ್ಯ-

ವೇದಿನಾಮ್ ಅನುಮೋದಿನಾಮ್ |

ಕಿಂ ವಾ ಫಲಂ ನ ಸಿದ್ಧ್ಯೇತ

ಸಂಪರ್ಕಾಚ್ಛಿವ ಯೋಗಿನಾಮ್ || 11-44

ಇತಿ ಜಂಗಮ ಮಾಹಾತ್ಮ್ಯ ಸ್ಥಲಂ

ಅಥ ಭಕ್ತ ಮಾಹಾತ್ಮ್ಯ ಸ್ಥಲಮ್

ಗುರೋರ್ಲಿಂಗಸ್ಯ ಮಾಹಾತ್ಮ್ಯ-

ಕಥನಾಚ್ಛಿವ ಯೋಗಿನಾಮ್ |

ಸಿದ್ಧಂ ಭಕ್ತಸ್ಯ ಮಾಹಾತ್ಮ್ಯಮ್

ತಥಾಪ್ಯೇಷ ಪ್ರಶಸ್ಯತೇ || 11-45

ಯೇ ಭಜಂತಿ ಮಹಾದೇವಮ್

ಪರಮಾತ್ಮಾ ನಮವ್ಯಯಮ್ |

ಕರ್ಮಣಾ ಮನಸಾ ವಾಚಾ

ತೇ ಭಕ್ತಾ ಇತಿ ಕೀರ್ತಿತಾಃ || 11-46

ದುರ್ಲಭಾ ಹಿ ಶಿವೇ ಭಕ್ತಿಃ

ಸಂಸಾರ ಭಯತಾರಿಣೀ |

ಸಾ ಯತ್ರ ವರ್ತತೇ ಸಾಕ್ಷಾತ್

ಸ ಭಕ್ತಃ ಪರಿಗೀಯತೇ || 11-47

ಕಿಂ ವೇದೈಃ ಕಿಂ ತತಃ ಶಾಸ್ತ್ರೈಃ

ಕಿಂ ಯಜ್ಞೈಃ ಕಿಂ ತಪೋವ್ರತೈಃ |

ನಾಸ್ತಿ ಚೇಚ್ಛಾಂಕರೀ ಭಕ್ತಿಃ

ದೇಹಿನಾಂ ಜನ್ಮ ರೋಗಿಣಾಮ್ || 11-48

ಶಿವಭಕ್ತಿ ವಿಹೀನಸ್ಯ

ಸುಕೃತಂ ಚಾಪಿ ನಿಷ್ಫಲಮ್ |

ವಿಪರೀತಫಲಂ ಚ ಸ್ಯಾದ್

ದಕ್ಷಸ್ಯಾಪಿ ಮಹಾಧ್ವರೇ || 11-49

ಅತ್ಯಂತ ಪಾಪ ಕರ್ಮಾಪಿ

ಶಿವಭಕ್ತ್ಯಾ ವಿಶುದ್ಧ್ಯತಿ |

ಚಂಡೋ ಯಥಾ ಪುರಾ ಭಕ್ತ್ಯಾ

ಪಿತೃಹಾಪಿ ಶಿವೋ ಭವತ್ || 11-50

ಸುಕೃತಂ ದುಷ್ಕೃತಂ ಚಾಪಿ

ಶಿವಭಕ್ತಸ್ಯ ನಾಸ್ತಿ ಹಿ |

ಶಿವಭಕ್ತಿ ವಿಹೀನಾನಾಮ್

ಕರ್ಮಪಾಶ ನಿಬಂಧನಮ್ || 11-51

ಶಿವಾಶ್ರಿತಾ ನಾಂ ಜಂತೂನಾಮ್

ಕರ್ಮಣಾ ನಾಸ್ತಿ ಸಂಗಮಃ |

ವಾಜಿನಾಂ ದಿನ ನಾಥಸ್ಯ

ಕಥಂ ತಿಮಿರಜಂ ಭಯಮ್ || 11-52

ನಿರೋದ್ಧುಂ ನ ಕ್ಷಮಂ ಕರ್ಮ

ಶಿವಭಕ್ತಾನ್ ವಿಶೃಂಖಲಾನ್ |

ಕಥಂ ಮತ್ತಗಜಾನ್ ರುಂಧೇತ್

ಶೃಂಖಲಾ ಬಿಸ ತಂತುಜಾ || 11-53

ಬ್ರಾಹ್ಮಣಃ ಕ್ಷತ್ರಿಯೋ ವಾಪಿ

ವೈಶ್ಯೋ ವಾ ಶೂದ್ರ ಏವ ವಾ |

ಅಂತ್ಯ ಜೋ ವಾ ಶಿವೇ ಭಕ್ತಃ

ಶಿವವನ್ಮಾನ್ಯ ಏವ ಸಃ || 11-54

ಶಿವಭಕ್ತಿ ಸಮಾವೇಶೇ

ಕ್ವ ಜಾತಿ ಪರಿಕಲ್ಪನಾ |

ಇಂಧನೇಷ್ವಗ್ನಿ ದಗ್ಧೇಷು

ಕೋ ವಾ ಭೇದಃ ಪ್ರಕೀತ್ರ್ಯತೇ || 11-55

ಶುದ್ಧಾ ನಿಯಮ ಸಂಯುಕ್ತಾಃ

ಶಿವಾರ್ಪಿತ ಫಲಾಗಮಾಃ |

ಅರ್ಚಯಂತಿ ಶಿವಂ ಲೋಕೇ

ವಿಜ್ಞೇಯಾಸ್ತೇ ಗಣೇಶ್ವರಾಃ || 11-56

ಇತಿ ಭಕ್ತಮಾಹಾತ್ಮ್ಯಸ್ಥಲಂ

ಅಥ ಶರಣ ಮಾಹಾತ್ಮ್ಯ ಸ್ಥಲಮ್

ಗುರುಲಿಂಗಾದಿ ಮಾಹಾತ್ಮ್ಯ-

ಬೋಧಾನ್ವೇಷಣ ಸಂಗತಃ |

ಸರ್ವಾತ್ಮನಾ ಶಿವಾ ಪತ್ತಿಃ

ಶರಣ ಸ್ಥಾನ ಮುಚ್ಯತೇ || 11-57

ಬ್ರಹ್ಮಾದಿ ವಿಬುಧಾನ್ ಸರ್ವಾನ್

ಮುಕ್ತ್ವಾ ಪ್ರಾಕೃತ ವೈಭವಾನ್ |

ಪ್ರಪದ್ಯತೇ ಶಿವಂ ಯತ್ತು

ಶರಣಂ ತಮುದಾಹೃತಮ್ || 11-58

ಶರಣ್ಯಃ ಸರ್ವ ಭೂತಾನಾಮ್

ಶಂಕರಃ ಶಶಿಶೇಖರಃ |

ಸರ್ವಾತ್ಮನಾ ಪ್ರಪನ್ನಸ್ತಮ್

ಶರಣಾಗತ ಉಚ್ಯತೇ || 11-59

ವಿಮುಕ್ತ ಭೋಗ ಲಾಲಸ್ಯೋ

ದೇವತಾಂತರ ನಿಸ್ಪೃಹಃ |

ಶಿವಮಭ್ಯರ್ಥಯನ್ ಮೋಕ್ಷಮ್

ಶರಣಾರ್ಥಿತಿ ಗೀಯತೇ || 11-60

ಯೇ ಪ್ರಪನ್ನಾ ಮಹಾದೇವಮ್

ಮನೋವಾಕ್ಕಾಯ ಕರ್ಮಭಿಃ |

ತೇಷಾಂ ತು ಕರ್ಮ ಜಾತೇನ

ಕಿಂ ವಾ ದೇವಾದಿ ತರ್ಪಣೈಃ || 11-61

ಸರ್ವೆಷಾಮಪಿ ಯಜ್ಞಾನಾಮ್

ಕ್ಷಯಃ ಸ್ವರ್ಗಃ ಫಲಾಯತೇ |

ಅಕ್ಷಯಂ ಫಲ ಮಾಪ್ನೋತಿ

ಪ್ರಪನ್ನಃ ಪರಮೇಶ್ವರಮ್ || 11-62

ಪ್ರಪನ್ನ ಪಾರಿಜಾತಸ್ಯ

ಭವಸ್ಯ ಪರಮಾತ್ಮನಃ |

ಪ್ರಪತ್ತ್ಯಾ ಕಿಂ ನ ಜಾಯೇತ

ಪಾಪಿನಾಮಪಿ ದೇಹಿನಾಮ್ || 11-63

ಪ್ರಪನ್ನಾನಾಂ ಮಹಾದೇವಮ್

ಪರಿಪಕ್ವಾಂತ ರಾತ್ಮನಾಮ್ |

ಜನ್ಮೈವ ಜನ್ಮ ನಾನ್ಯೇಷಾಮ್

ವೃಥಾ ಜನನ ಸಂಗಿನಾಮ್ || 11-64

ದುರ್ಲಭಂ ಮಾನುಷಂ ಪ್ರಾಪ್ಯ

ಜನನಂ ಜ್ಞಾನ ಸಾಧನಮ್ |

ಯೇ ನ ಜಾನಂತಿ ದೇವೇಶಮ್

ತೇಷಾಮಾತ್ಮಾ ನಿರರ್ಥಕಃ || 11-65

ತತ್ಕುಲಂ ಹಿ ಸದಾ ಶುದ್ಧಮ್

ಸಫಲಂ ತಸ್ಯ ಜೀವಿತಮ್ |

ಯಸ್ಯ ಚಿತ್ತಂ ಶಿವೇ ಸಾಕ್ಷಾದ್

ವಿಲೀನಮ ಬಹಿರ್ಮುಖಮ್ || 11-66

ಇತಿ ಶರಣ ಮಾಹಾತ್ಮ್ಯಸ್ಥಲಂ

ಅಥ ಪ್ರಸಾದ ಮಾಹಾತ್ಮ್ಯ ಸ್ಥಲಮ್

ಗುರುಲಿಂಗಾದಿ ಮಾಹಾತ್ಮ್ಯ-

ವಿಶೇಷಾನುಭವ ಸ್ಥಿತಿಃ |

ಯಸ್ಮಾಚ್ಛಿವ ಪ್ರಸಾದಾತ್ ಸ್ಯಾತ್

ತದಸ್ಯ ಮಹಿಮೋಚ್ಯತೇ || 11-67

ಸದಾ ಲಿಂಗೈಕ ನಿಷ್ಠಾನಾಮ್

ಗುರು ಪೂಜಾನು ಷಂಗಿಣಾಮ್ |

ಪ್ರಪನ್ನಾನಾಂ ವಿಶುದ್ಧಾನಾಮ್

ಪ್ರಸೀದತಿ ಮಹೇಶ್ವರಃ || 11-68

ಪ್ರಸಾದೋಪಿ ಮಹೇಶಸ್ಯ

ದುರ್ಲಭಃ ಪರಿಕೀತ್ರ್ಯತೇ |

ಘೊರ ಸಂಸಾರ ಸಂತಾಪ-

ನಿವೃತ್ತಿರ್ಯೆನ ಜಾಯತೇ || 11-69

ಯಜ್ಞಾಸ್ತ ಪಾಂಸಿ ಮಂತ್ರಾಣಾಮ್

ಜಪಶ್ಚಿಂತಾ ಪ್ರಬೋಧನಮ್ |

ಪ್ರಸಾದಾರ್ಥಂ ಮಹೇಶಸ್ಯ

ಕೀರ್ತಿತಾನಿ ನ ಸಂಶಯಃ || 11-70

ಪ್ರಸಾದಮೂಲಾ ಸರ್ವೆಷಾಮ್

ಭಕ್ತಿರವ್ಯ ಭಿಚಾರಿಣೀ |

ಶಿವ ಪ್ರಸಾದ ಹೀನಸ್ಯ

ಭಕ್ತಿಶ್ಚಾಪಿ ನ ಸಿದ್ಧ್ಯತಿ || 11-71

ಗರ್ಭಸ್ಥೋ ಜಾಯಮಾನೋ ವಾ

ಜಾತೋ ವಾ ಬ್ರಾಹ್ಮಣೋಥವಾ |

ಅಂತ್ಯಜೋ ವಾಪಿ ಮುಚ್ಯೇತ

ಪ್ರಸಾದೇ ಸತಿ ಶಾಂಕರೇ || 11-72

ಬ್ರಹ್ಮಾದ್ಯಾ ವಿಬುಧಾಃ ಸರ್ವೆ

ಸ್ವಸ್ವಸ್ಥಾನ ನಿವಾಸಿನಃ |

ನಿತ್ಯಸಿದ್ಧಾ ಭವಂತ್ಯೇವ

ಪ್ರಸಾದಾತ್ ಪಾರಮೇಶ್ವರಾತ್ |11-73

ಪ್ರಸಾದೇ ಶಾಂಭವೇ ಸಿದ್ಧೇ

ಪರಮಾನಂದ ಕಾರಣೇ |

ಸರ್ವಂ ಶಿವ ಮಯಂ ವಿಶ್ವಮ್

ದೃಶ್ಯತೇ ನಾತ್ರ ಸಂಶಯಃ || 11-74

ಸಂಸಾರ ಚಕ್ರ ನಿರ್ವಾಹ-

ನಿಮಿತ್ತಂ ಕರ್ಮ ಕೇವಲಮ್ |

ಪ್ರಸಾದೇನ ವಿನಾ ಶಂಭೋಃ

ನ ಕಸ್ಯಾಪಿ ನಿವರ್ತತೇ || 11-75

ಬಹುನಾತ್ರ ಕಿಮುಕ್ತೇನ

ನಾಸ್ತಿ ನಾಸ್ತಿ ಜಗತ್ ತ್ರಯೇ |

ಸಮಾನ ಮಧಿಕಂ ಚಾಪಿ

ಪ್ರಸಾದಸ್ಯ ಮಹೇಶಿತುಃ || 11-76

ಶಿವಪ್ರಸಾದೇ ಸತಿಯೋಗ ಭಾಜಿ

ಸರ್ವಂ ಶಿವೈಕಾತ್ಮ ತಯಾವಿಭಾತಿ |

ಸ್ವಕರ್ಮಮುಕ್ತಃ ಶಿವಭಾವಿತಾತ್ಮಾ

ಸ ಪ್ರಾಣಲಿಂಗೀತಿ ನಿಗದ್ಯತೇಸೌ || 11-77

ಇತಿ ಪ್ರಸಾದಮಾಹಾತ್ಮ್ಯಸ್ಥಲಮ್ ಪರಿಸಮಾಪ್ತಂ

ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು

ಶಿವಾದ್ವೈತ ವಿದ್ಯಾಯಾಂ ಶಿವಯೋಗಶಾಸ್ತ್ರೇ –

ಶ್ರೀರೇಣುಕಾಗಸ್ತ್ಯ ಸಂವಾದೇ ವೀರಶೈವ ಧರ್ಮನಿರ್ಣಯೇ

ಶ್ರೀಶಿವಯೋಗಿಶಿವಾಚಾರ್ಯವಿರಚಿತೇ

ಶ್ರೀಸಿದ್ಧಾಂತಶಿಖಾಮಣೌ

ಪ್ರಸಾದಿಸ್ಥಲೇ ಪ್ರಸಾದಿಸ್ಥಲಾದಿ ಸಪ್ತವಿಧ ಸ್ಥಲ

ಪ್ರಸಂಗೋ ನಾಮ ಏಕಾದಶಃ ಪರಿಚ್ಛೇದಃ ||