ಬ್ರಹ್ಮಾದ್ಯೈರ್ಮಲಿನಪ್ರಾಯೈಃ

ನಿರ್ಮಲೇ ಪರಮೇಶ್ವರೇ |

ಸಾಮ್ಯೋಕ್ತಿಂ ಯೋ ನ ಸಹತೇ

ಸ ವೈ ಮಾಹೇಶ್ವರಾಭಿಧಃ || 10-9

ಈಶ್ವರಃ ಸರ್ವಭೂತಾನಾಮ್

ಬ್ರಹ್ಮಾದೀನಾಂ ಮಹಾನಿತಿ |

ಬುದ್ಧಿಯೋಗಾತ್ ತದಾಸಕ್ತೋ

ಭಕ್ತೋ ಮಾಹೇಶ್ವರಃ ಸ್ಮೃತಃ || 10-10

ಬ್ರಹ್ಮಾದಿದೇವತಾಜಾಲಮ್

ಮೋಹಿತಂ ಮಾಯಯಾ ಸದಾ |

ಅಶಕ್ತಂ ಮುಕ್ತಿದಾನೇ ತು

ಕ್ಷಯಾತಿಶಯಸಂಯುತಮ್ || 10-11

ಅನಾದಿಮುಕ್ತೋ ಭಗವಾನ್

ಏಕ ಏವ ಮಹೇಶ್ವರಃ |

ಮುಕ್ತಿದಶ್ಚೇತಿ ಯೋ ವೇದ

ಸ ವೈ ಮಾಹೇಶ್ವರಃ ಸ್ಮೃತಃ || 10-12

ಕ್ಷಯಾತಿಶಯಸಂಯುಕ್ತಾ

ಬ್ರಹ್ಮವಿಷ್ಣ್ವಾದಿಸಂಪದಃ |

ತೃಣವನ್ಮನ್ಯತೇ ಯುಕ್ತ್ಯಾ

ವೀರಮಾಹೇಶ್ವರಃ ಸದಾ || 10-13

ಶಬ್ದಸ್ಪರ್ಶಾದಿಸಂಪನ್ನೇ

ಸುಖಲೇಶೇ ತು ನಿಃಸ್ಪೃಹಃ |

ಶಿವಾನಂದೇ ಸಮುತ್ಕಂಠೋ

ವೀರಮಾಹೇಶ್ವರೋ ಭವೇತ್ || 10-14

ಪರಸ್ತ್ರೀ ಸಂಗ ನಿರ್ಮುಕ್ತಃ

ಪರದ್ರವ್ಯ ಪರಾಙ್ಮುಖಃ |

ಶಿವಾರ್ಥಕಾರ್ಯಸಂಪನ್ನಃ

ಶಿವಾಗಮ ಪರಾಯಣಃ || 10-15

ಶಿವಸ್ತುತಿ ರಸಾಸ್ವಾದ-

ಮೋದಮಾನ ಮನಾಃ ಶುಚಿಃ |

ಶಿವೋತ್ಕರ್ಷ ಪ್ರಮಾಣಾನಾಮ್

ಸಂಪಾದನ ಸಮುದ್ಯತಃ || 10-16

ನಿರ್ಮಮೋ ನಿರಹಂಕಾರೋ

ನಿರಸ್ತ ಕ್ಲೇಶ ಪಂಜರಃ |

ಅಸ್ಪೃಷ್ಟ ಮದ ಸಂಬಂಧೋ

ಮಾತ್ಸರ್ಯಾವೇಶ ವರ್ಜಿತಃ || 10-17

ನಿರಸ್ತ ಮದನೋನ್ಮೇಷೋ

ನಿರ್ಧೂತ ಕ್ರೋಧವಿಪ್ಲವಃ |

ಸದಾ ಸಂತುಷ್ಟಹೃದಯಃ

ಸರ್ವಪ್ರಾಣಿಹಿತೇರತಃ || 10-18

ನಿವಾರಣ ಸಮುದ್ಯೋಗೀ

ಶಿವಕಾರ್ಯ ವಿರೋಧಿನಾಮ್ |

ಸಹಚಾರೀ ಸದಾಕಾಲಮ್

ಶಿವೋತ್ಕರ್ಷಾಭಿಧಾಯಿಭಿಃ || 10-19

ಶಿವಾಪಕರ್ಷ ಸಂಪ್ರಾಪ್ತೌ

ಪ್ರಾಣತ್ಯಾಗೇಪ್ಯ ಶಂಕಿತಃ |

ಶಿವೈಕ ನಿಷ್ಠಃ ಸರ್ವಾತ್ಮಾ

ವೀರಮಾಹೇಶ್ವರೋ ಭವೇತ್ || 10-20

ಇತಿ ಮಾಹೇಶ್ವರ ಪ್ರಶಂಸಾಸ್ಥಲಂ

ಅಥ ಲಿಂಗನಿಷ್ಠಾಸ್ಥಲಮ್

ಅಸ್ಯ ಮಾಹೇಶ್ವರ ಸ್ಯೋಕ್ತಮ್

ಲಿಂಗನಿಷ್ಠಾ ಮಹಾಸ್ಥಲಮ್ |

ಪ್ರಾಣಾತ್ಯ ಯೇಪಿ ಸಂಪನ್ನೇ

ಯದತ್ಯಾಜ್ಯಂ ವಿಧೀಯತೇ || 10-21

ಅಪಗಚ್ಛತು ಸರ್ವಸ್ವಮ್

ಶಿರಶ್ಛೇದನ ಮಸ್ತು ವಾ |

ಮಾಹೇಶ್ವರೋ ನ ಮುಂಚೇತ

ಲಿಂಗಪೂಜಾ ಮಹಾವ್ರತಮ್ || 10-22

ಲಿಂಗಪೂಜಾಮ ಕೃತ್ವಾ ತು

ಯೇ ನ ಭುಂಜಂತಿ ಮಾನವಾಃ |

ತೇಷಾಂ ಮಹಾತ್ಮನಾಂ ಹಸ್ತೇ

ಮೋಕ್ಷಲಕ್ಷಿರ್ ಉಪಸ್ಥಿತಾ || 10-23

ಕಿಮನ್ಯೈರ್ ಧರ್ಮ ಕಲಿಲೈಃ

ಕೀಕ-ಷಾರ್ಥ ಪ್ರದಾಯಿಭಿಃ |

ಸಾಕ್ಷಾನ್ಮೋಕ್ಷ ಪ್ರದಃ ಶಂಭೋಃ

ಧರ್ಮೊ ಲಿಂಗಾರ್ಚನಾತ್ಮಕಃ || 10-24

ಅರ್ಪಿತೇನಾನ್ನಪಾನೇನ

ಲಿಂಗೇ ನಿಯಮಪೂಜಿತೇ |

ಯೇ ದೇಹವೃತ್ತಿಂ ಕುರ್ವಂತಿ

ಮಹಾಮಾಹೇಶ್ವರಾ ಹಿ ತೇ || 10-25

ಚಿನ್ಮಯೇ ಶಾಂಕರೇ ಲಿಂಗೇ

ಸ್ಥಿರಂ ಯೇಷಾಂ ಮನಃ ಸದಾ |

ವಿಮುಕ್ತೇ-ತರ ಸರ್ವಾರ್ಥಮ್

ತೇ ಶಿವಾ ನಾತ್ರ ಸಂಶಯಃ || 10-26

ಲಿಂಗೇ ಯಸ್ಯ ಮನೋ ಲೀನಮ್

ಲಿಂಗಸ್ತುತಿಪರಾ ಚ ವಾಕ್ |

ಲಿಂಗಾರ್ಚನಪರೌ ಹಸ್ತೌ

ಸ ರುದ್ರೋ ನಾತ್ರ ಸಂಶಯಃ || 10-27

ಲಿಂಗನಿಷ್ಠಸ್ಯ ಕಿಂ ತಸ್ಯ

ಕರ್ಮಣಾ ಸ್ವರ್ಗಹೇತುನಾ |

ನಿತ್ಯಾನಂದ ಶಿವಪ್ರಾಪ್ತಿಃ

ಯಸ್ಯ ಶಾಸ್ತ್ರೇಷು ನಿಶ್ಚಿತಾ || 10-28

ಲಿಂಗನಿಷ್ಠಾಪರಂ ಶಾಂತಮ್

ಭೂತಿರುದ್ರಾಕ್ಷ ಸಂಯುತಮ್ |

ಪ್ರಶಂಸಂತಿ ಸದಾಕಾಲಮ್

ಬ್ರಹ್ಮಾದ್ಯಾ ದೇವತಾ ಮುದಾ || 10-29

ಲಿಂಗೈಕ ನಿಷ್ಠ ಹೃದಯಃ

ಸದಾ ಮಾಹೇಶ್ವರೋ ಜನಃ |

ಪೂರ್ವಾಶ್ರಯ ಗತಾನ್ ಧರ್ಮಾನ್

ತ್ಯಜೇತ್ ಸ್ವಾಚಾರ ರೋಧಕಾನ್||1030

ಸ್ವಜಾತಿಕುಲಜಾನ್ ಧರ್ಮಾನ್

ಲಿಂಗನಿಷ್ಠಾವಿರೋಧಿನಃ |

ತ್ಯಜನ್ ಮಾಹೇಶ್ವರೋ ಜ್ಞೇಯಃ

ಪೂರ್ವಾಶ್ರಯ ನಿರಾಸಕಃ || 10-31

ಶಿವಸಂಸ್ಕಾರಯೋಗೇನ

ವಿಶುದ್ಧಾನಾಂ ಮಹಾತ್ಮನಾಮ್ |

ಕಿಂ ಪೂರ್ವಕಾಲಿಕೈರ್ ಧರ್ಮೈ:

ಪ್ರಾಕೃತಾನಾಂ ಹಿ ತೇ ಮತಾಃ ||10-32

ಶಿವಸಂಸ್ಕಾರಯೋಗೇನ

ಶಿವಧರ್ಮಾನುಷಂಗಿಣಾಮ್ |

ಪ್ರಾಕೃತಾನಾಂ ನ ಧರ್ಮೆಷು

ಪ್ರವೃತ್ತಿರ್ ಉಪಪದ್ಯತೇ || 10-33

ವಿಶುದ್ಧಾಃ ಪ್ರಾಕೃತಾಶ್ಚೇತಿ

ದ್ವಿವಿಧಾ ಮಾನುಷಾಃ ಸ್ಮೃತಾಃ |

ಶಿವಸಂಸ್ಕಾರಿಣಃ ಶುದ್ಧಾಃ

ಪ್ರಾಕೃತಾ ಇತರೇ ಮತಾಃ || 10-34

ವರ್ಣಾಶ್ರಮಾದಿ ಧರ್ಮಾಣಾಮ್

ವ್ಯವಸ್ಥಾ ಹಿ ದ್ವಿಧಾ ಮತಾ |

ಏಕಾ ಶಿವೇನ ನಿರ್ದಿಷ್ಟಾ

ಬ್ರಹ್ಮಣಾ ಕಥಿತಾ ಪರಾ || 10-35

ಶಿವೋಕ್ತಧರ್ಮನಿಷ್ಠಾ ತು

ಶಿವಾಶ್ರಮ ನಿಷೇವಿಣಾಮ್ |

ಶಿವಸಂಸ್ಕಾರ ಹೀನಾನಾಮ್

ಧರ್ಮಃ ಪೈತಾಮಹಃ ಸ್ಮೃತಃ || 10-36

ಶಿವಸಂಸ್ಕಾರ ಯುಕ್ತೇಷು

ಜಾತಿಭೇದೋ ನ ವಿದ್ಯತೇ |

ಕಾಷ್ಠೇಷು ವಹ್ನಿ ದಗ್ಧೇಷು

ಯಥಾ ರೂಪಂ ನ ವಿದ್ಯತೇ || 10-37

ತಸ್ಮಾತ್ಸರ್ವ ಪ್ರಯತ್ನೇನ

ಶಿವ ಸಂಸ್ಕಾರ ಸಂಯುತಃ |

ಜಾತಿ ಭೇದಂ ನ ಕುರ್ವಿತ

ಶಿವಭಕ್ತೇ ಕದಾಚನ || 10-38

ಪೂಜ್ಯ ಪೂಜಕಯೋರ್ಲಿಂಗ-

ಜೀವಯೋರ್ಭೆದ ವರ್ಜನೇ |

ಪೂಜಾಕರ್ಮಾದ್ಯ ಸಂಪತ್ತೇಃ

ಲಿಂಗನಿಷ್ಠಾ ವಿರೋಧತಃ || 10-39

ಸರ್ವಾದ್ವೈತ ವಿಚಾರಸ್ಯ

ಜ್ಞಾನಾಭಾವೇ ವ್ಯವಸ್ಥಿತೇಃ |

ಭವೇನ್ಮಾಹೇಶ್ವರಃ ಕರ್ಮೀ

ಸರ್ವಾದ್ವೈತನಿರಾಸಕಃ || 10-40

ಪ್ರೇರಕಂ ಶಂಕರಂ ಬುದ್ಧ್ವಾ

ಪ್ರೇರ್ಯಮಾತ್ಮಾನಮೇವ ಚ |

ಭೇದಾತ್ ತಂ ಪೂಜಯೇನ್ನಿತ್ಯಮ್

ನ ಚಾದ್ವೈತಪರೋ ಭವೇತ್ || 10-41

ಪತಿಃ ಸಾಕ್ಷಾನ್ ಮಹಾದೇವಃ

ಪಶುರೇಷ ತದಾಶ್ರಯಃ |

ಅನಯೋಃ ಸ್ವಾಮಿಭೃತ್ಯತ್ವಮ್

ಅಭೇದೇ ಕಥಮಿಷ್ಯತೇ || 10-42

ಸಾಕ್ಷಾತ್ಕೃತಂ ಪರಂ ತತ್ತ್ವಮ್

ಯದಾ ಭವತಿ ಬೋಧತಃ |

ತದಾದ್ವೈತಸಮಾಪತ್ತಿಃ

ಜ್ಞಾನಹೀನಸ್ಯ ನ ಕ್ವಚಿತ್ || 10-43

ಭೇದಸ್ಯ ಕರ್ಮಹೇತುತ್ವಾದ್

ವ್ಯವಹಾರಃ ಪ್ರವರ್ತತೇ |

ಲಿಂಗಪೂಜಾದಿಕರ್ಮಸ್ಥೋ

ನ ಚಾದ್ವೈತಂ ಸಮಾಚರೇತ್ || 10-44

ಪೂಜಾದಿವ್ಯವಹಾರಃ ಸ್ಯಾತ್

ಭೇದಾಶ್ರಯತಯಾ ಸದಾ |

ಲಿಂಗಪೂಜಾ ಪರಸ್ ತಸ್ಮಾತ್

ನಾದ್ವೈತೇ ನಿರತೋ ಭವೇತ್ || 10-45

ಲಿಂಗಾರ್ಚನ ಪರಃ ಶುದ್ಧಃ

ಸರ್ವಾದ್ವೈತ ನಿರಾಸಕಃ |

ಸ್ವೇಷ್ಟಲಿಂಗೇ ಶಿವಾಕಾರೇ

ನ ತಮಾವಾಹ-ಯೇ-ಚ್ಛಿವಮ್ || 10-46

ಯದಾ ಶಿವಕಲಾ ಯುಕ್ತಮ್

ಲಿಂಗಂ ದದ್ಯಾ ನ್ ಮಹಾಗುರುಃ |

ತದಾರಭ್ಯ ಶಿವಸ್ತತ್ರ

ತಿಷ್ಠತ್ಯಾಹ್ವಾನ ಮತ್ರ ಕಿಮ್ || 10-47

ಸಸಂಸ್ಕಾರೇಷು ಲಿಂಗೇಷು

ಸದಾ ಸನ್ನಿಹಿತಃ ಶಿವಃ |

ತತ್ರಾಹ್ವಾನಂ ನ ಕರ್ತವ್ಯಮ್

ಪ್ರತಿಪತ್ತಿ ವಿರೋಧಕಮ್ || 10-48

ನಾಹ್ವಾನಂ ನ ವಿಸರ್ಗಂ ಚ

ಸ್ವೇಷ್ಟಲಿಂಗೇ ತು ಕಾರಯೇತ್ |

ಲಿಂಗನಿಷ್ಠಾಪರೋ ನಿತ್ಯಮ್

ಇತಿ ಶಾಸ್ತ್ರಸ್ಯ ನಿಶ್ಚಯಃ || 10-49

ಯಥಾತ್ಮಶಿವಯೋರೈಕ್ಯಮ್

ನ ಮತಂ ಕರ್ಮಸಂಗಿನಃ |

ತಥಾ ಶಿವಾತ್ ಪೃಥಿವ್ಯಾದೇಃ

ಅದ್ವೈತಮಪಿ ನೇಷ್ಯತೇ || 10-50

ಪೃಥಿವ್ಯಾದ್ಯಷ್ಟ ಮೂರ್ತಿತ್ವಮ್

ಈಶ್ವರಸ್ಯ ಪ್ರಕೀರ್ತಿತಮ್ |

ತದಧಿಷ್ಠಾತೃ ಭಾವೇನ

ನ ಸಾಕ್ಷಾದೇಕ ಭಾವತಃ || 10-51

ಪೃಥ್ವ್ಯಾದಿಕಮಿದಂ ಸರ್ವಮ್

ಕಾರ್ಯಂ ಕರ್ತಾ ಮಹೇಶ್ವರಃ |

ನೈತತ್ ಸಾಕ್ಷಾನ್ಮಹೇಶೋಯಮ್

ಕುಲಾಲೋ ಮೃತ್ತಿಕಾ ಯಥಾ || 10-52

ಪೃಥಿವ್ಯಾದ್ಯಾತ್ಮ ಪರ್ಯಂತ-

ಪ್ರಪಂಚೋ ಹ್ಯಷ್ಟಧಾ ಸ್ಥಿತಃ |

ತನುರೀಶಸ್ಯ ಚಾತ್ಮಾಯಮ್

ಸರ್ವತತ್ತ್ವನಿಯಾಮಕಃ || 10-53

ಶರೀರ ಭೂತಾದೇತಸ್ಮಾತ್

ಪ್ರಪಂಚಾತ್ ಪರಮೇಷ್ಠಿನಃ |

ಆತ್ಮಭೂತಸ್ಯ ದೇವಸ್ಯ

ನಾಭೇದೋ ನ ಪೃಥಕ್ ಸ್ಥಿತಿಃ || 10-54

ಅಚೇತನತ್ವಾತ್ ಪೃಥ್ವ್ಯಾದೇಃ

ಅಜ್ಞತ್ವಾದ್ ಆತ್ಮನ ಸ್ತಥಾ |

ಸರ್ವಜ್ಞಸ್ಯ ಮಹೇಶಸ್ಯ

ನೈಕ ರೂಪತ್ವ ಮಿಷ್ಯತೇ || 10-55

ಇತಿ ಯಶ್ಚಿಂತಯೇನ್ನಿತ್ಯಮ್

ಪೃಥ್ವ್ಯಾದೇರಷ್ಟ ಮೂರ್ತಿತಃ |

ವಿಲಕ್ಷಣಂ ಮಹಾದೇವಮ್

ಸೋಷ್ಟಮೂರ್ತಿ ನಿರಾಸಕಃ || 10-56

ಸರ್ವಗತ್ವೇ ಮಹೇಶಸ್ಯ

ಸರ್ವತ್ರಾರಾಧನಂ ಭವೇತ್ |

ನ ಲಿಂಗಮಾತ್ರೇ ತನ್ನಿಷ್ಠೋ

ನ ಶಿವಂ ಸರ್ವಗಂ ಸ್ಮರೇತ್ || 10-57

ಸರ್ವಗೋಪಿ ಸ್ಥಿತಃ ಶಂಭುಃ

ಸ್ವಾಧಾರೇ ಹಿ ವಿಶೇಷತಃ |

ತಸ್ಮಾದನ್ಯತ್ರ ವಿಮುಖಃ

ಸ್ವೇಷ್ಟಲಿಂಗೇ ಯಜೇಚ್ಛಿವಮ್ || 10-58

ಶಿವಃ ಸರ್ವಗತಶ್ಚಾಪಿ

ಸ್ವಾಧಾರೇ ವ್ಯಜ್ಯತೇ ಭೃಶಮ್ |

ಶಮೀಗರ್ಭೆ ಯಥಾ ವಹ್ನಿಃ

ವಿಶೇಷೇಣ ವಿಭಾವ್ಯತೇ || 10-59

ಸರ್ವಗತ್ವಂ ಮಹೇಶಸ್ಯ

ಸರ್ವಶಾಸ್ತ್ರವಿನಿಶ್ಚಿತಮ್ |

ತಥಾಪ್ಯಾಶ್ರಯಲಿಂಗಾದೌ

ಪೂಜಾರ್ಥಮಧಿಕಾ ಸ್ಥಿತಿಃ || 10-60

ನಿತ್ಯಂ ಭಾಸಿ ತದೀಯಸ್ತ್ವಮ್

ಯಾ ತೇ ರುದ್ರ ಶಿವಾ ತನೂಃ |

ಅಘೋರಾಪಾಪಕಾಶೀತಿ

ಶ್ರುತಿರಾಹ ಸನಾತನೀ || 10-61

ತಸ್ಮಾತ್ ಸರ್ವಪ್ರಯತ್ನೇನ

ಸರ್ವಸ್ಥಾನ ಪರಾಙ್ಮುಖಃ |

ಸ್ವೇಷ್ಟಲಿಂಗೇ ಮಹಾದೇವಮ್

ಪೂಜಯೇತ್ ಪೂಜಕೋತ್ತಮಃ || 10-62

ಶಿವಸ್ಯ ಸರ್ವಗತ್ವೇಪಿ

ಸರ್ವತ್ರ ರತಿವರ್ಜಿತಃ |

ಸ್ವೇಷ್ಟಲಿಂಗೇ ಯಜನ್ ದೇವಮ್

ಸರ್ವಗತ್ವನಿರಾಸಕಃ || 10-63

ಪೂಜಾವಿಧೌ ನಿಯಮ್ಯತ್ವಾತ್

ಲಿಂಗಮಾತ್ರೇ ಸ್ಥಿತಂ ಶಿವಮ್ |

ಪೂಜಯನ್ನಪಿ ದೇವಸ್ಯ

ಸರ್ವಗತ್ವಂ ವಿಭಾವಯೇತ್ || 10-64

ಯಸ್ಮಾದೇತತ್ ಸಮುತ್ಪನ್ನಮ್

ಮಹಾದೇವಾಚ್ಚರಾಚರಮ್ |

ತಸ್ಮಾದೇತನ್ನ ಭಿದ್ಯೇತ

ಯಥಾ ಕುಂಭಾದಿಕಂ ಮೃದಃ || 10-65

ಶಿವತತ್ತ್ವಾತ್ ಸಮುತ್ಪನ್ನಮ್

ಜಗದಸ್ಮಾನ್ನ ಭಿದ್ಯತೇ |

ಫೇನೋರ್ಮಿಬುದ್ಬುದಾಕಾರಮ್

ಯಥಾ ಸಿಂಧೋರ್ನ ಭಿದ್ಯತೇ || 10-66

ಯಥಾ ತಂತುಭಿರುತ್ಪನ್ನಃ

ಪಟಸ್ತಂತುಮಯಃ ಸ್ಮೃತಃ |

ತಥಾ ಶಿವಾತ್ ಸಮುತ್ಪನ್ನಮ್

ಶಿವ ಏವ ಚರಾಚರಮ್ || 10-67

ಆತ್ಮಶಕ್ತಿ ವಿಕಾಸೇನ

ಶಿವೋ ವಿಶ್ವಾತ್ಮನಾ ಸ್ಥಿತಃ |

ಕುಟೀಭಾವಾದ್ ಯಥಾ ಭಾತಿ

ಪಟಃ ಸ್ವಸ್ಯ ಪ್ರಸಾರಣಾತ್ || 10-68

ತಸ್ಮಾಚ್ಛಿವಮಯಂ ಸರ್ವಮ್

ಜಗದೇತಚ್ಚರಾಚರಮ್ |

ತದಭಿನ್ನತಯಾ ಭಾತಿ

ಸರ್ಪತ್ವಮಿವ ರಜ್ಜುತಃ || 10-69

ರಜ್ಜೌ ಸರ್ಪತ್ವವದ್ ಭಾತಿ

ಶುಕ್ತೌ ಚ ರಜತತ್ವವತ್ |

ಚೋರತ್ವವದಪಿ ಸ್ಥಾಣೌ

ಮರೀಚ್ಯಾಂ ಚ ಜಲತ್ವವತ್ || 10-70

ಗಂಧರ್ವಪುರವದ್ವ್ಯೋಮ್ನಿ

ಸಚ್ಚಿದಾನಂದಲಕ್ಷಣೇ |

ನಿರಸ್ತಭೇದಸದ್ಭಾವೇ

ಶಿವೇ ವಿಶ್ವಂ ವಿರಾಜತೇ || 10-71

ಪತ್ರಶಾಖಾದಿರೂಪೇಣ

ಯಥಾ ತಿಷ್ಠತಿ ಪಾದಪಃ |

ತಥಾ ಭೂಮ್ಯಾದಿರೂಪೇಣ

ಶಿವ ಏಕೋ ವಿರಾಜತೇ || 10-72

ಸಮಸ್ತಜಗದಾತ್ಮಾಪಿ

ಶಂಕರಃ ಪರಮೇಶ್ವರಃ |

ಭಕ್ತಾನಾಂ ಹೃದಯಾಂಭೋಜೇ

ವಿಶೇಷೇಣ ವಿರಾಜತೇ || 10-73

ಕೈಲಾಸೇ ಮಂದರೇ ಚೈವ

ಹಿಮಾದ್ರೌ ಕನಕಾಚಲೇ |

ಹೃದಯೇಷು ಚ ಭಕ್ತಾನಾಮ್

ವಿಶೇಷೇಣ ವ್ಯವಸ್ಥಿತಃ || 10-74

ಸರ್ವಾತ್ಮಾಪಿ ಪರಿಚ್ಛಿನ್ನೋ

ಯಥಾ ದೇಹೇಷು ವರ್ತತೇ |

ತಥಾ ಸ್ವಕೀಯಭಕ್ತೇಷು

ಶಂಕರೋ ಭಾಸತೇ ಸದಾ || 10-75

ನಿತ್ಯಂ ಭಾತಿ ತ್ವದೀಯೇಷು

ಯಾ ತೇ ರುದ್ರ ಶಿವಾ ತನೂಃ |

ಅಘೋರಾಪಾಪಕಾಶೀತಿ

ಶ್ರುತಿರಾಹ ಸನಾತನೀ || 10-76

ವಿಶುದ್ಧೇಷು ವಿರಕ್ತೇಷು

ವಿವೇಕಿಷು ಮಹಾತ್ಮಸು |

ಶಿವಸ್ತಿಷ್ಠತಿ ಸರ್ವಾತ್ಮಾ

ಶಿವಲಾಂಛನಧಾರಿಷು || 10-77

ನಿತ್ಯಂ ಸಂತೋಷಯುಕ್ತಾನಾಮ್

ಜ್ಞಾನ ನಿರ್ಧೂತಕರ್ಮಣಾಮ್ |

ಮಾಹೇಶ್ವರಾಣಾಮಂತಃಸ್ಥೋ

ವಿಭಾತಿ ಪರಮೇಶ್ವರಃ || 10-78

ಅನ್ಯತ್ರ ಶಂಭೋ ರತಿಮಾತ್ರಶೂನ್ಯೋ

ನಿಜೇಷ್ಟಲಿಂಗೇ ನಿಯತಾಂತರಾತ್ಮಾ |

ಶಿವಾತ್ಮಕಂ ವಿಶ್ವಮಿದಂ ವಿಬುಧ್ಯನ್

ಮಾಹೇಶ್ವರೋ ಸೌಭವತಿ ಪ್ರಸಾದೀ||10-79

ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು

ಶಿವಾದ್ವೈತವಿದ್ಯಾಯಾಂ ಶಿವಯೋಗಶಾಸ್ತ್ರೇ

ಶ್ರೀರೇಣುಕಾಗಸ್ತ್ಯಸಂವಾದೇ ವೀರಶೈವಧರ್ಮನಿರ್ಣಯೇ

ಶ್ರೀಶಿವಯೋಗಿಶಿವಾಚಾರ್ಯವಿರಚಿತೇ ಶ್ರೀಸಿದ್ಧಾಂತಶಿಖಾಮಣೌ

ಮಾಹೇಶ್ವರಸ್ಥಲೇ ಮಾಹೇಶ್ವರಪ್ರಶಂಸಾದಿ

ನವವಿಧಸ್ಥಲಪ್ರಸಂಗೋ ನಾಮ ದಶಮಃ ಪರಿಚ್ಛೇದಃ ||