ಷಷ್ಠಃ ಪರಿಚ್ಛೇದಃ -

ಗುರುಕಾರುಣ್ಯಲಿಂಗಧಾರಣಪ್ರಸಂಗಃ

ಅಥ ಗುರುಕಾರುಣ್ಯಸ್ಥಲಮ್

ತತೋ ವಿವೇಕಸಂಪನ್ನೋ

ವಿರಾಗೀ ಶುದ್ಧ ಮಾನಸಃ |

ಜಿಜ್ಞಾಸುಃ ಸರ್ವ ಸಂಸಾರ-

ದೋಷ ಧ್ವಂಸ ಕರಂ ಶಿವಮ್ || 6-1

ಉಪೈತಿ ಲೋಕ ವಿಖ್ಯಾತಮ್

ಲೋಭ ಮೋಹ ವಿವರ್ಜಿತಮ್ |

ಆತ್ಮ ತತ್ತ್ವ ವಿಚಾರಜ್ಞಮ್

ವಿಮುಕ್ತ ವಿಷಯ-ಭ್ರಮಮ್ || 6-2

ಶಿವಸಿದ್ಧಾಂತ ತತ್ತ್ವಜ್ಞಮ್

ಛಿನ್ನಸಂದೇಹ ವಿಭ್ರಮಮ್ |

ಸರ್ವತಂತ್ರ ಪ್ರಯೋಗಜ್ಞಮ್

ಧಾರ್ಮಿಕಂ ಸತ್ಯವಾದಿನಮ್ || 6-3

ಕುಲ ಕ್ರಮಾ ಗತಾಚಾರಮ್

ಕುಮಾರ್ಗಾಚಾರ ವರ್ಜಿತಮ್ |

ಶಿವಧ್ಯಾನ ಪರಂ ಶಾಂತಮ್

ಶಿವತತ್ತ್ವವಿವೇಕಿನಮ್ || 6-4

ಭಸ್ಮೋದ್ಧೂಲನ ನಿಷ್ಣಾತಮ್

ಭಸ್ಮತತ್ತ್ವ ವಿವೇಕಿನಮ್ |

ತ್ರಿಪುಂಡ್ರ ಧಾರಣೋತ್ಕಂಠಮ್

ಧೃತ ರುದ್ರಾಕ್ಷ ಮಾಲಿಕಮ್ || 6-5

ಲಿಂಗಧಾರಣ ಸಂಯುಕ್ತಮ್

ಲಿಂಗಪೂಜಾ ಪರಾಯಣಮ್ |

ಲಿಂಗಾಂಗ ಯೋಗ ತತ್ತ್ವಜ್ಞಮ್

ನಿರೂಢಾದ್ವೈತ ವಾಸನಮ್ |

ಲಿಂಗಾಂಗ ಸ್ಥಲ ಭೇದಜ್ಞಮ್|

ಶ್ರೀಗುರುಂ ಶಿವವಾದಿನಮ್ |6-6

ಸೇವೇತ ಪರಮಾಚಾರ್ಯಮ್

ಶಿಷ್ಯೋ ಭಕ್ತಿ ಭಯಾನ್ವಿತಃ |

ಷಣ್ಮಾಸಾನ್ ವತ್ಸರಂ ವಾಪಿ

ಯಾವದೇಷ ಪ್ರಸೀದತಿ || 6-7

ಪ್ರಸನ್ನಂ ಪರಮಾಚಾರ್ಯಮ್

ಭಕ್ತ್ಯಾ ಮುಕ್ತಿ ಪ್ರದರ್ಶಕಮ್ |

ಪ್ರಾರ್ಥಯೇದಗ್ರತಃ ಶಿಷ್ಯಃ

ಪ್ರಾಂಜಲಿರ್ ವಿನಯಾನ್ವಿತಃ || 6-8

ಭೋ ಕಲ್ಯಾಣ ಮಹಾಭಾಗ

ಶಿವಜ್ಞಾನ ಮಹೋದಧೇ |

ಆಚಾರ್ಯವರ್ಯ ಸಂಪ್ರಾಪ್ತಮ್

ರಕ್ಷ ಮಾಂ ಭವ ರೋಗಿಣಮ್ || 6-9

ಇತಿ ಶುದ್ಧೇನ ಶಿಷ್ಯೇಣ

ಪ್ರಾರ್ಥಿತಃ ಪರಮೋ ಗುರುಃ |

ಶಕ್ತಿಪಾತಂ ಸಮಾಲೋಕ್ಯ

ದೀಕ್ಷಯಾ ಯೋಜಯೇದಮುಮ್ || 6-10

ದೀಯತೇ ಚ ಶಿವಜ್ಞಾನಮ್

ಕ್ಷೀಯತೇ ಪಾಶಬಂಧನಮ್ |

ಯಸ್ಮಾದ ಸಮಾಖ್ಯಾತಾ

ದೀಕ್ಷೇತೀಯಂ ವಿಚಕ್ಷಣೈಃ || 6-11

ಸಾ ದೀಕ್ಷಾ ತ್ರಿವಿಧಾ ಪ್ರೋಕ್ತಾ

ಶಿವಾಗಮ ವಿಶಾರದೈಃ |

ವೇಧಾರೂಪಾ ಕ್ರಿಯಾರೂಪಾ

ಮಂತ್ರರೂಪಾ ಚ ತಾಪಸ || 6-12

ಗುರೋ-ರಾ ಲೋಕ ಮಾತ್ರೇಣ

ಹಸ್ತ ಮಸ್ತಕ ಯೋಗತಃ |

ಯಃ ಶಿವತ್ತ್ವ ಸಮಾವೇಶೋ

ವೇಧಾ ದೀಕ್ಷೇತಿ ಸಾ ಮತಾ || 6-13

ಮಾಂತ್ರೀ ದೀಕ್ಷೇತಿ ಸಾ ಪ್ರೋಕ್ತಾ

ಮಂತ್ರ ಮಾತ್ರೋಪದೇಶಿನೀ |

ಕುಂಡಮಂಡಲಿ ಕೋ ಪೇತಾ

ಕ್ರಿಯಾದೀಕ್ಷಾ ಕ್ರಿಯೋತ್ತರಾ || 6-14

ಶುಭಮಾಸೇ ಶುಭತಿಥೌ

ಶುಭಕಾಲೇ ಶುಭೇಹನಿ |

ವಿಭೂತಿಂ ಶಿವಭಕ್ತೇಭ್ಯೋ

ದತ್ತ್ವಾ ತಾಂಬೂಲ ಪೂರ್ವಕಮ್ || 6-15

ಯಥಾವಿಧಿ ಯಥಾಯೋಗಮ್

ಶಿಷ್ಯಮಾನೀಯ ದೇಶಿಕಃ |

ಸ್ನಾತಂ ಶುಕ್ಲಾಂಬರಧರಮ್

ದಂತಧಾವನ ಪೂರ್ವಕಮ್ || 6-16

ಮಂಡಲೇ ಸ್ಥಾಪಯೇಚ್ಛಿಷ್ಯಮ್

ಪ್ರಾಮ್ ಮುಖಂ ತಮ್ ದಮುಖಃ |

ಶಿವಸ್ಯ ನಾಮ ಕೀರ್ತಿಂ ಚ

ಚಿಂತಾಮಪಿ ಚ ಕಾರಯೇತ್ || 6-17

ವಿಭೂತಿ ಪಟ್ಟಂ ದತ್ತ್ವಾಗ್ರೇ

ಯಥಾಸ್ಥಾನಂ ಯಥಾವಿಧಿ |

ಪಂಚಬ್ರಹ್ಮ ಮಯೈಸ್ತತ್ರ

ಸ್ಥಾಪಿತೈಃ ಕಲಶೋದಕೈಃ || 6-18

ಆಚಾರ್ಯಃ ಸಮಮೃತ್ವಿಗ್ಭಿಃ

ತ್ರಿಃ ಶಿಷ್ಯ ಮಭಿಷಿಂಚಯೇತ್ |

ಅಭಿಷಿಚ್ಯ ಗುರುಃ ಶಿಷ್ಯಮ್

ಆಸೀನಂ ಪರಿತಃ ಶುಚಿಮ್ || 6-19

ತತಃ ಪಂಚಾಕ್ಷರೀಂ ಶೈವೀಮ್

ಸಂಸಾರ ಭಯ ತಾರಿಣೀಮ್ || 6-20

ತಸ್ಯ ದಕ್ಷಿಣ ಕರ್ಣೆ ತು

ನಿಗೂಢಮಪಿ ಕೀರ್ತಯೇತ್ |

ಛಂದೋ ರೂಪಮ್ ಋಷಿಂ ಚಾಸ್ಯ

ದೇವತಾ ನ್ಯಾಸ ಪದ್ಧತಿಮ್ || 6-21

ಇತಿ ಗುರುಕಾರುಣ್ಯಸ್ಥಲಮ್

ಅಥ ಲಿಂಗಧಾರಣ ಸ್ಥಲಮ್

ಸ್ಫಾಟಿಕಂ ಶೈಲಜಂ ವಾಪಿ

ಚಂದ್ರಕಾಂತ ಮಯಂ-ತು ವಾ |

ಬಾಣಂ-ವಾ ಸೂರ್ಯಕಾಂತಂ ವಾ

ಲಿಂಗಮೇಕಂ ಸಮಾ-ಹರೇತ್ || 6-22

ಸರ್ವ ಲಕ್ಷಣ ಸಂಪನ್ನೇ

ತಸ್ಮಿನ್ ಲಿಂಗೇ ವಿಶೋಧಿತೇ |

ಪೀಠಸ್ಥಿತೇ ಅಭಿಷಿಕ್ತೇ ಚ

ಗಂಧ ಪುಷ್ಪಾ ದಿ ಪೂಜಿತೇ |

ಮಂತ್ರಪೂತೇ ಕಲಾಂ ಶೈವೀಮ್

ಯೋಜಯೇದ್ವಿಧಿನಾ ಗುರುಃ || 6-23

ಶಿಷ್ಯಸ್ಯ ಪ್ರಾಣಮಾದಾಯ

ಲಿಂಗೇ ತತ್ರ ನಿಧಾಪಯೇತ್ | 6-24

ತಲ್ಲಿಂಗಂ ತಸ್ಯ ತು ಪ್ರಾಣೇ

ಸ್ಥಾಪಯೇ ದೇಕ ಭಾವತಃ |

ಏವಂ ಕೃತ್ವಾ ಗುರುರ್ ಲಿಂಗಮ್

ಶಿಷ್ಯಹಸ್ತೇ ನಿಧಾಪಯೇತ್ || 6-25

ಪ್ರಾಣವದ್ಧಾರಣೀಯಂ ತತ್

ಪ್ರಾಣಲಿಂಗಮಿದಂ ತವ |

ಕದಾಚಿತ್ ಕೃತ್ರಚಿದ್ವಾಪಿ

ನ ವಿಯೋಜಯ ದೇಹತಃ || 6-26

ಯದಿ ಪ್ರಮಾದಾತ್ ಪತಿತೇ

ಲಿಂಗೇ ದೇಹಾನ್ ಮಹೀತಲೇ |

ಪ್ರಾಣಾನ್ ವಿಮುಂಚ ಸಹಸಾ

ಪ್ರಾಪ್ತಯೇ ಮೋಕ್ಷಸಂಪದಃ || 6-27

ಇತಿ ಸಂಬೋಧಿತಃ ಶಿಷ್ಯೋ

ಗುರುಣಾ ಶಾಸ್ತ್ರವೇದಿನಾ |

ಧಾರಯೇಚ್ಛಾಂಕರಂ ಲಿಂಗಮ್

ಶರೀರೇ ಪ್ರಾಣಯೋಗತಃ || 6-28

ಲಿಂಗಸ್ಯ ಧಾರಣಂ ಪುಣ್ಯಮ್

ಸರ್ವ ಪಾಪ ಪ್ರಣಾಶನಮ್ |

ಆದೃತಂ ಮುನಿಭಿಃ ಸರ್ವೆಃ

ಆಗಮಾರ್ಥ ವಿಶಾರದೈಃ || 6-29

ಲಿಂಗಧಾರಣ ಮಾಖ್ಯಾತಮ್

ದ್ವಿಧಾ ಸರ್ವಾರ್ಥ ಸಾಧಕೈಃ |

ಬಾಹ್ಯಮಾಭ್ಯಂತರಂ ಚೇತಿ

ಮುನಿಭಿರ್ ಮೋಕ್ಷ ಕಾಂಕ್ಷಿಭಿಃ || 6-30

ಚಿದ್ರೂಪಂ ಪರಮಂ ಲಿಂಗಮ್

ಶಾಂಕರಂ ಸರ್ವಕಾರಣಮ್ |

ಯತ್ ತಸ್ಯ ಧಾರಣಂ ಚಿತ್ತೇ

ತದಾಂತರ ಮುದಾಹೃತಮ್ || 6-31

ಚಿದ್ರೂಪಂ ಹಿ ಪರಂ ತತ್ತ್ವಮ್

ಶಿವಾಖ್ಯಂ ವಿಶ್ವಕಾರಣಮ್ |

ನಿರಸ್ತವಿಶ್ವ ಕಾಲುಷ್ಯಮ್

ನಿಷ್ಕಲಂ ನಿರ್ವಿಕಲ್ಪಕಮ್ || 6-32

ಸತ್ತಾನಂದ ಪರಿಸ್ಫೂರ್ತಿ-

ಸಮುಲ್ಲಾಸ ಕಲಾಮಯಮ್ |

ಅಪ್ರಮೇಯಮ ನಿರ್ದೆಶ್ಯಮ್

ಮುಮುಕ್ಷುಭಿರು ಪಾಸಿತಮ್ || 6-33

ಪರಂ ಬ್ರಹ್ಮ ಮಹಾಲಿಂಗಮ್

ಪ್ರಪಂಚಾತೀತಮವ್ಯಯಮ್ |

ತದೇವ ಸರ್ವಭೂತಾನಾಮ್

ಅಂತಸ್ತ್ರಿಸ್ಥಾನಗೋಚರಮ್ || 6-34

ಮೂಲಾಧಾರೇ ಚ ಹೃದಯೇ

ಭ್ರೂಮಧ್ಯೇ ಸರ್ವದೇಹಿನಾಮ್ |

ಜ್ಯೋತಿರ್ಲಿಂಗಂ ಸದಾ ಭಾತಿ

ಯದ್ ಬ್ರಹ್ಮೇತ್ಯಾ ಹುರಾಗಮಾಃ || 6-35

ಅಪರಿಚ್ಛಿನ್ನಮವ್ಯಕ್ತಮ್

ಲಿಂಗಂ ಬ್ರಹ್ಮ ಸನಾತನಮ್ |

ಉಪಾಸನಾರ್ಥ ಮಂತಃಸ್ಥಮ್

ಪರಿಚ್ಛಿನ್ನಂ ಸ್ವಮಾಯ ಯಾ || 6-36

ಲಯಂ ಗಚ್ಛತಿ ಯತ್ರೈವ

ಜಗದೇ ತಚ್ ಚರಾಚರಮ್ |

ಪುನಃ ಪುನಃ ಸಮುತ್ಪತ್ತಿಮ್

ತಲ್ಲಿಂಗಂ ಬ್ರಹ್ಮ ಶಾಶ್ವತಮ್ || 6-37

ತಸ್ಮಾಲ್ಲಿಂಗಮ್ ಇತಿ ಖ್ಯಾತಮ್

ಸತ್ತಾನಂದಚಿದಾತ್ಮಕಮ್ |

ಬೃಹತ್ತ್ವಾದ್ ಬೃಂಹಣತ್ವಾಚ್ಚ

ಬ್ರಹ್ಮ ಶಬ್ದಾ ಭಿಧೇಯಕಮ್ || 6-38

ಆಧಾರೇ ಹೃದಯೇ ವಾಪಿ

ಭ್ರೂಮಧ್ಯೇ ವಾ ನಿರಂತರಮ್ |

ಜ್ಯೋತಿರ್ಲಿಂಗಾನುಸಂಧಾನಮ್

ಆಂತರಂ ಲಿಂಗಧಾರಣಮ್ || 6-39

ಆಧಾರೇ ಕನಕಪ್ರಖ್ಯಮ್

ಹೃದಯೇ ವಿದ್ರುಮಪ್ರಭಮ್ |

ಭ್ರೂಮಧ್ಯೇ ಸ್ಫಟಿಕಚ್ಛಾಯಮ್

ಲಿಂಗಂ ಯೋಗೀ ವಿಭಾವಯೇತ್ || 6-40

ನಿರುಪಾಧಿಕಮಾಖ್ಯಾತಮ್

ಲಿಂಗಸ್ಯಾಂತರಧಾರಣಮ್ |

ವಿಶಿಷ್ಟಂ ಕೋಟಿಗುಣಿತಮ್

ಬಾಹ್ಯಲಿಂಗಸ್ಯ ಧಾರಣಾತ್ || 6-41

ಯೇ ಧಾರಯಂತಿ ಹೃದಯೇ

ಲಿಂಗಂ ಚಿದ್ರೂಪಮೈಶ್ವರಮ್ |

ನ ತೇಷಾಂ ಪುನರಾವೃತ್ತಿಃ

ಘೋರ ಸಂಸಾರ ಮಂಡಲೇ || 6-42

ಅಂತರ್ಲಿಂಗಾನುಸಂಧಾನಮ್

ಆತ್ಮವಿದ್ಯಾಪರಿಶ್ರಮಃ |

ಗುರೂಪಾಸನಶಕ್ತಿಶ್ಚ

ಕಾರಣಂ ಮೋಕ್ಷಸಂಪದಾಮ್ || 6-43

ವೈರಾಗ್ಯಜ್ಞಾನಯುಕ್ತಾನಾಮ್

ಯೋಗಿನಾಂ ಸ್ಥಿರಚೇತಸಾಮ್ |

ಅಂತರ್ಲಿಂಗಾನು ಸಂಧಾನೇ

ರುಚಿರ್ಬಾಹ್ಯೇ ನ ಜಾಯತೇ || 6-44

ಬ್ರಹ್ಮಾ ವಿಷ್ಣುಶ್ಚ ರುದ್ರಶ್ಚ

ವಾಸವಾದ್ಯಾಶ್ಚ ಲೋಕಪಾಃ |

ಮುನಯಃ ಸಿದ್ಧಗಂಧರ್ವಾಃ

ದಾನವಾ ಮಾನವಾಸ್ತಥಾ || 6-45

ಸರ್ವೆ ಚ ಜ್ಞಾನಯೋಗೇನ

ಸರ್ವಕಾರಣಕಾರಣಮ್ |

ಪಶ್ಯಂತಿ ಹೃದಯೇ ಲಿಂಗಮ್

ಪರಮಾನಂದಲಕ್ಷಣಮ್ || 6-46

ತಸ್ಮಾತ್ಸರ್ವಪ್ರಯತ್ನೇನ

ಶಾಂಕರಂ ಲಿಂಗಮುತ್ತಮಮ್ |

ಅಂತರ್ ವಿಭಾವಯೇದ್ ವಿದ್ವಾನ್

ಅಶೇಷಕ್ಲೇಶ ಮುಕ್ತಯೇ || 6-47

ಅಂತರ್ ಧಾರಯಿತುಂ ಲಿಂಗಮ್

ಅಶಕ್ತಃ ಶಕ್ತ ಏವ ವಾ |

ಬಾಹ್ಯಂ ಚ ಧಾರಯೇಲ್ಲಿಂಗಮ್

ತದ್ರೂಪಮಿತಿ ನಿಶ್ಚಯಾತ್ || 6-48

ಲಿಂಗಂ ತು ತ್ರಿವಿಧಂ ಪ್ರೋಕ್ತಮ್

ಸ್ಥೂಲಂ ಸೂಕ್ಷ್ಮಂ ಪರಾತ್ಪರಮ್ |

ಇಷ್ಟಲಿಂಗಮಿದಂ ಸ್ಥೂಲಮ್

ಯದ್ ಬಾಹ್ಯೇ ಧಾರ್ಯತೇತನೌ 6-49

ಪ್ರಾಣಲಿಂಗಮಿದಂ ಸೂಕ್ಷ್ಮಮ್

ಯದಂತರ್ಭಾವನಾಮಯಮ್ |

ಪರಾತ್ಪರಂ ತು ಯತ್ಪ್ರೋಕ್ತಮ್

ತೃಪ್ತಿಲಿಂಗಂ ತದುಚ್ಯತೇ || 6-50

ಭಾವನಾತೀತಮವ್ಯಕ್ತಮ್

ಪರಬ್ರಹ್ಮ ಶಿವಾಭಿಧಮ್ |

ಇಷ್ಟಲಿಂಗಮಿದಂ ಸಾಕ್ಷಾತ್|

ಅನಿಷ್ಟ ಪರಿಹಾರತಃ |

ಧಾರಯೇ ದವ ಧಾನೇನ

ಶರೀರೇ ಸರ್ವದಾ ಬುಧಃ || 6-51

ಮೂರ್ಧ್ನಿ ವಾ ಕಂಠದೇಶೇ ವಾ

ಕಕ್ಷೇ ವಕ್ಷಃಸ್ಥಲೇಪಿ ವಾ |

ಕುಕ್ಷೌ ಹಸ್ತಸ್ಥಲೇ ವಾಪಿ

ಧಾರಯೇಲ್ಲಿಂಗ ಮೈಶ್ವರಮ್ || 6-52

ನಾಭೇರಧಸ್ತಾಲ್ಲಿಂಗಸ್ಯ

ಧಾರಣಂ ಪಾಪಕಾರಣಮ್ |

ಜಟಾಗ್ರೇ ತ್ರಿಕಭಾಗೇ ಚ

ಮಲಸ್ಥಾನೇ ನ ಧಾರಯೇತ್ || 6-53

ಲಿಂಗಧಾರೀ ಸದಾ ಶುದ್ಧೋ

ನಿಜಲಿಂಗಂ ಮನೋರಮಮ್ |

ಅರ್ಚಯೇದ್ ಗಂಧಪುಷ್ಪಾದ್ಯೈಃ

ಕರಪೀಠೇ ಸಮಾಹಿತಃ ||6-54

ಬಾಹ್ಯ ಪೀಠಾರ್ಚನಾ ದೇತತ್

ಕರಪೀಠಾರ್ಚನಂ ವರಮ್ |

ಸರ್ವೆಷಾಂ ವೀರಶೈವಾನಾಮ್

ಮುಮುಕ್ಷೂಣಾಂ ನಿರಂತರಮ್ || 6-55

ಬ್ರಹ್ಮವಿಷ್ಣ್ವಾದಯೋ ದೇವಾಃ

ಮುನಯೋ ಗೌತಮಾದಯಃ |

ಧಾರಯಂತಿ ಸದಾ ಲಿಂಗಮ್

ಉತ್ತಮಾಂಗೇ ವಿಶೇಷತಃ || 6-56

ಲಕ್ಷ್ಮ್ಯಾದಿಶಕ್ತಯಃ ಸರ್ವಾಃ

ಶಿವಭಕ್ತಿವಿಭಾವಿತಾಃ |

ಧಾರಯಂತ್ಯಲಿಕಾಗ್ರೇಷು

ಶಿವಲಿಂಗಮಹರ್ನಿಶಮ್ ||6-57

ವೇದಶಾಸ್ತ್ರಪುರಾಣೇಷು

ಕಾಮಿಕಾದ್ಯಾಗಮೇಷು ಚ |

ಲಿಂಗಧಾರಣಮಾಖ್ಯಾತಮ್

ವೀರಶೈವಸ್ಯ ನಿಶ್ಚಯಾತ್ || 6-58

ಋಗಿತ್ಯಾಹ ಪವಿತ್ರಂ ತೇ

ವಿತತಂ ಬ್ರಹ್ಮಣಸ್ಪತೇ |

ತಸ್ಮಾತ್ಪವಿತ್ರಂ ತಲ್ಲಿಂಗಮ್

ಧಾರ್ಯಂ ಶೈವಮನಾಮಯಮ್ || 6-59

ಬ್ರಹ್ಮೇತಿ ಲಿಂಗಮಾಖ್ಯಾತಮ್

ಬ್ರಹ್ಮಣಃ ಪತಿರೀಶ್ವರಃ |

ಪವಿತ್ರಂ ತದ್ಧಿ ವಿಖ್ಯಾತಮ್

ತತ್ಸಂಪರ್ಕಾತ್ ತನುಃ ಶುಚಿಃ || 6-60

ಅತಪ್ತತನುರಜ್ಞೋ ವೈ

ಆಮಃ ಸಂಸ್ಕಾರವರ್ಜಿತಃ |

ದೀಕ್ಷಯಾ ರಹಿತಃ ಸಾಕ್ಷಾತ್

ನಾಪ್ನುಯಾಲ್ಲಿಂಗಮುತ್ತಮಮ್ || 6-61

ಅಘೋರಾಪಾಪಕಾಶೀತಿ

ಯಾ ತೇ ರುದ್ರ ಶಿವಾ ತನೂಃ |

ಯಜುಷಾ ಗೀಯತೇ ಯಸ್ಮಾತ್

ತಸ್ಮಾಚ್ಛೈವೋಘವರ್ಜಿತಃ || 6-62

ಯೋ ಲಿಂಗಧಾರೀ ನಿಯತಾಂತರಾತ್ಮಾ

ನಿತ್ಯಂ ಶಿವಾರಾಧನಬದ್ಧಚಿತ್ತಃ |

ಸ ಧಾರಯೇತ್ ಸರ್ವಮಲಾಪಹತ್ಯೈ

ಭಸ್ಮಾಮಲಂ ಚಾರು ಯಥಾ ಪ್ರಯೋಗಮ್ ||6-63

ಇತಿ ಲಿಂಗಧಾರಣಸ್ಥಲಂ ಪರಿಸಮಾಪ್ತಂ

ಓಂ ತತ್ಸತ್ ಇತಿ

ಶ್ರೀ ಶಿವಗೀತೇಷು ಸಿದ್ಧಾಂತಾಗಮೇಷು -

ಶಿವಾದ್ವೈತವಿದ್ಯಾಯಾಂ ಶಿವಯೋಗಶಾಸ್ತ್ರೇ,

ಶ್ರೀ ರೇಣುಕಾಗಸ್ತ್ಯ ಸಂವಾದೇ

ಶ್ರೀವೀರಶೈವಧರ್ಮ ನಿರ್ಣಯೇ,

ಶ್ರೀಶಿವಯೋಗಿ ಶಿವಾಚಾರ್ಯ ವಿರಚಿತೇ ಶ್ರೀಸಿದ್ಧಾಂತ ಶಿಖಾಮಣೌ

ಗುರುಕಾರುಣ್ಯಸ್ಥಲ ಲಿಂಗಧಾರಣಸ್ಥಲ

ಪ್ರಸಂಗೋ ನಾಮ ಷಷ್ಠಃ ಪರಿಚ್ಛೇದಃ||